"Tungan gerir okkur að þjóð, hvar sem við erum niður komin í veröldinni."

Af mörgu þörfu, eftirminnilegu og áhugaverðu, sem forsætisráðherra sagði í áramótaávarpi sínu nú rétt áðan um mikilsverð málefni líðandi stundar, held ég að varnaðarorð hans varðandi stöðu og framtíð íslenskrar tungu muni lifa einna lengst ofangreind setning muni lifa lengst, þessi hér: 

"Tungan gerir okkur að þjóð, hvar sem við erum niður komin í í veröldinni." 

Mæli hann manna heilastur. 

Þörf að endurskoða peningastefnuna

Vantar ekki enn eitthvað upp á góða landkynningu?

Það er ekki liðin öld síðan Halldór Laxness birti sína mögnuðu lýsingu á þeim ósiðum, sem viðgengjust á okkar landi. 

Á þeim tíma var meirihluti sveitabæja landsins enn torfbæir, ekkert vegakerfi sem hægt var að nefna því nafni og enn aldarfjórðungur þar til flugvellir, allt malarvellir, yrðu gerðir. 

Margt annað var eftir því, þar á meðal siðmenning þjóðarinnar. 

Það er athyglisvert að Íslendingar sem hafa verið erlendis taka eftir því hvað almenn kurteisi og tillitssemi eru miklu meiri víðast erlendis en hér á landi. 

Náttúruverðmæti Íslands er helsta aðdráttaraflið fyrir þá flóðbylgju ferðamanna, sem eru undirstaðan undir bættum þjóðarhag, en sinnuleysi okkar gagnvart ástandi þeirra og alltof almennt tillitsleysi og óreiða almennt er slæm landkynning að ekki sé talað um þá græðgi, sem ferðafólkið mætir oft af okkar hálfu. 

Ferðamaður flúði fullan leigusala

Pútín og þrjár vikurnar.

Þegar utanríkisráðherra Rússlands lét í það skína í gær að hann myndi reka 35 bandaríska sendimenn frá Rússlandi lá beinast við að skrifa pistil hér á síðunni um  það, að Pútín væri sallarólegur í þessu máli, vitandi það að að aðeins þrjár vikur væru í það að Donald Trump tæki við embætti. 

Hins vegar myndi brottrekstur bandarískra sendimanna gera stöðuna vandasama fyrir Trump þegar hann tæki við. 

En Pútín tók ráðin af utanríkisráðherra sínum og ákvað að leika snjallasta leikinn, að gera ekkert í málinu. Þrjár vikur eru stuttur tími í langvarandi samskiptum þjóðanna og skoða þarf taflið langt fram í tímann. 

Fyrir bragðið verður Trump með alveg frítt spil eftir að hann tekur við embætti við að efna loforð sín um að breyta afstöðu Bandaríkjamanna gagnvart Rússum. 

Trump hrósaði Pútín

Glampi frá Loga?

7,5% fylgi er svo sem ekkert til að hrópa húrra fyrir hjá flokki, sem var með 12,9% fyrir tæpum fjórum árum og um 30% árið 2009. 

En eftir að Samfylkingin hefur verið föst í innan við fimm komma eitthvað prósent fylgi ansi lengi, er aukning upp í 7,5% þó hreyfing upp á við, hversu lengi sem hún nú stendur. 

Það má láta sér detta í hug að Logi Már Einarsson formaður eigi kannski þátt í þessu. 

Hann hefur komið vel fyrir í sambandi við stjórnarmyndunarviðræður, sem Samfó hefur tekið þátt í, og þegar ég starfaði í nefnd um umhverfismál undir hans stjórn fyrir nokkrum árum, þar sem skoðanir voru skiptar, vakti það athygli mína hve vel honum fórst nefndarstjórnunin úr hendi og hve vel honum tókst að laða fólki til samstarfs og samkomulagsvilja, sem leiddi til árangurs.  

Samfylkingin eykur fylgi sitt

Bragi Árnason veðjaði á sólarorkuna fyrir löngu.

Í áhugaverðu útvarpsviðtali Ara Trausta Guðmundssonar við Braga Árnason fyrir um fimmmtán árum var Bragi eindregið þeirrar skoðunar að bein beislun sólarorkunnar væri framtíðarlausnin í orkubúskap mannkynsins. 

Hann benti á gnægð hennar, enda væri jarðefnaeldsneyti afurð sólarorku fyrri tímaskeiða á jörðinni. 

Á þeim tíma virtist þetta afar ólíkleg framtíðarsýn, svo örskammt sem nýting sólarorku var komin þá og svo örðugt sem það sýndist tæknilega að geta beislað hana. 

Bragi varð þekktur víða um lönd á áttunda áratugnum fyrir rannsóknir sínar á notkun vetnis sem orkubera, og meðal þeirra stórfyrirtækja, sem athuguðu möguleikana á að knýja bíla á þann hátt, voru Toyotaverksmiðjurnar. 

Þær hafa hafið framleiðslu á vetnisbíl og sett hann á markað en eins og er, þykir hann ansi dýr, en hins vegar mikil framför í drægi rafbíla. 

Það þótti bara drjúgt að Nissan Leaf byði upp á 24 kílóvattstundir, en nú er Renaylt Zoe kominn með 40 kílóvattstundir og Opel Ampera-e með 60. 

Vetnisbíll Tojuta hefur þó þann kost ennþá fram yfir rafknúna bíla að hafa mun lengra drægi á hverri hleðslu en í ljósi tregrar sölu hans, hefur Toyota aukið áhersluna á rafbíla og blendingsrafbíla. 

En hafi Bragi Árnason ekki reynst forspár um mikið gengi vetnisbíla virðist mun stærri og mikilfenglegri spá hans um sólarorkubyltingu vera mun nær því að rætast. 

Og stóri munurinn er að sjálfsögðu sá, að sólarorkan er beisluð beint og af sólarorku er þvílíka gnægð að finna, að aðeins þarf að beisla lítinn hluta þeirra orku sem sólin býr til á jörðinni til þess að anna allri orkuþörf mannkynsins. 

Spurningin nú sem fyrr er aðeins hvernig hægt sé að beisla hana. 

 

Græn orka skákar jarðefnaeldsneyti

Pútín hinkrar í þrjár vikur.

Svartur hefur leikið í óvenjulegu tafli sem hefur verið í gangi í haust í samskiptum Rússa og Bandaríkjamann, en Pútín, sem var snöggur að leika, hinkrar sallarólegur í í þrjár vikur þar til búið verður að skipta um manninn, sem leikur hvítu mönnunum.

Pútín liggur ekkert á. Hann fékk sinn mann kjörinn vestra, en ólíklegt er að fikt í tölvuhakki hafi ráðið úrslitum í forsetakosningunum í haust.

Hið óánægða verksmiðjuverkafólk, sem misst hefur vinnuna á undanförnum árum í ríkjunum í ryðbeltinu svonefnda þar sem stolt og þungamiðja yfirburða iðnaðarveldis BNA áttu einstæðan blómatíma fyrir hálfri öld, hefði kosið Trump hvort eð var.  

Fleiri leikir í taflinu í formi refsiaðgerða eru til þess gerðir að koma Trump í óþægilega stöðu en ekki endilega óviðráðanlega stöðu.

Forseti í stöðu "lamaðrar andar" (lame duck) hefur oft takmarkaða möguleika til aðgerða.

Það er þá helst í málum, þar sem lagaumhverfi mála, eins og til dæmis varðandi tilskipun í olíuvinnslumálum, sem byggist á gömlum lögum, sem Obama getur bundið hendur Trump.

Slíkt virðist ekki eiga við um það sem nú er í gangi vegna meintra tölvuárása Rússa.

Fremstur meðal jafningja í frægasta sigri Íslendinga.

Enginn einn íþróttaviðburður hefur komið Íslandi eins rækilega á kortið hjá heimsbyggðinni og Evrópumeistaramótið í knattspyrnu. 

Íslenska liðið fór langt fram úr væntingum með því að komast í átta liða úrslit og senda sjálfa Englendinga út úr keppninni. Að öllum líkindum frækilegasta frammistaða örþjóðar í þessari vinsælustu íþrótt veraldar. 

Í ofanálag gerðu íslenska liðið og íslenskir áhorfendur "Víkingaklappið" svonefnda heimsfrægt. 

Klappið var að vísu fengið að láni hjá skoska knattspyrnuliðinu Motherwell en íslensk varð frægð þess. 

Geir Hallsteinsson, sem tekinn var í Frægðarhöll ÍSÍ sagði í þakkarávarpi sínu að í flokkaíþrótt gæti enginn náð langt einn og sér. 

En meiri galdramann með boltann hef ég ekki séð um dagana en Geir. 

Og seint verður það sagt um botnliðið Swansea að þar lyfti frábær liðsheild Gylfa á þann stall sem hann hefur komist í ensku úrvalsdeildinni. 

Gylfi er í hópi skæðustu sóknarmanna deildarinnar ÁN þess að vera í stjörnuliði. 

Í leikjunum á EM og í undankeppni mótsins átti Gylfi einstakan þátt í velgengni liðsins með því að fórna sér algerlega bæði í vörn og sókn og vera jafnvígur á hvort tveggja. 

Fremstur meðal jafningja í liðinu. 

Sagt er að í íþróttum enginn betri en mótherjinn leyfir. Hrafnhildur Lúðvíksdóttir og fleiri í hópnum, sem valið var úr að lokum í kvöld, hefðu kannski orðið íþróttamenn ársins ef ekki hefði komið til hin frábæra frammistaða Gylfa Þórs í þeirri íþróttakeppni, sem hefur varpað skærasta ljósinu á íslenskar íþróttir, land og þjóð síðan á dögum gullaldarfrjálsíþróttamanna okkar á árunum 1946-1951. 

Gylfi íþróttamaður ársins 2016

70 prósent brautarinnar er innan brautarkerfis hinna brautanna.

70 prósent NA-SV brautarinnar á Reykjavíkurflugvelli, eða hátt á áttunda hundrað metra vegalengd, er innan brautarkerfis hinna brautanna. Léttar flugvélar gætu lent á þessum kafla hennar þegar of mikill hliðarvindur er á hinum brautunum tveimur, og Twin Otter vélarnar á Akureyri gætu lent á hluta af þessari vegalengd í suðvestanátt. 

Þess má geta að brautin er alls 990 metrar og öll sú vegalengd er í góðu lagi og enn hefur engin hindrun verið reist við brautarenda. 

Fokker F50 vélarnar lentu stundum til suðvesturs í hvössum suðvestanvindi. 

Þótt Hæstiréttur hafi gert ríkinu skylt að standa við bókstaf í samningi við borgina um þessa braut, hefur Hæstiréttur ekki tekið samningsréttinn af þessum samningsaðilum. 

Þeir myndu hafa fullan rétt til að gera nýjan samning til að fara eftir. Til dæmis að nota megi brautina á hverjum þeim tíma þegar flugtæknileg atriði gera það mögulegt rétt eins og aðrar brautir. ("On condition").

Mikið af umræðunni um þetta mál hefur farið í að bera saman ósambærilega hluti og til dæmis að leggja að jöfnu flugeiginleika þriggja gerða farþegaflugvéla, Boeing 757, Dash 8 og Beechraft King Air.

Boeingþoturnar eru um 22 sinnum þyngri en King Air.

Dash 8 er meira en fimm sinnum þyngri en King Air. 

King Air getur því lent á mun styttri brautum en stærri vélarnar, en þolir að sama skapi mun minni hliðarvind. 

Þess vegna getur King Air ekki lent í Keflavík í miklum hliðarvindi þótt 757 geti það, og þegar hliðarvindur fer yfir ákveðin mörk í Reykjavík á Dash 8 auðveldara með að lenda en King Air.

Sömuleiðis segir það lítið um notagildi NA-SV brautarinnar þótt Dash 8 geti ekki notað þá braut í veðri sem King Air getur það.

NA-SV brautin í Keflavík er án merkinga og hefur grotnað niður síðan henni var lokað fyrir mörgum árum.

Þau 70 prósent NA-SV brautarinnar í Reykjavík, sem eru hluti af brautakerfi hinna brautanna, verða hins vegar áfram í svipuðu ástandi og brautarkerfið sjálft, sem var endurnýjað á vandaðan hátt fyrir 18 árum.  

 

„Brautin hefur ekkert breyst“

Lykilorð beiðni SDG: "Þrátt fyrir að engu hafi verið haldið leyndu."

Lykilorð beiðni Sigmundar Davíðs Gunnlaugssonar um að Ríkisútvarpið biðji hann og konu hans afsökunar vegna "framgöngu Ríkisútvarpsins eru liklega þau, að hann hafi löngum sætt ofsóknum af hálfu RÚV "þrátt fyrir að engu hafi verið haldið leyndu" um aflandsfélagið Wintris. 

Þessi orð eru athyglisverð í ljósi þess að strax árið 2009 þegar Sigmundur Davíð hóf mikil afskipti sín sem alþingismaður og formaður Framsóknarflokksins af stjórnmálum, einkum viðskiptum Íslendinga við erlenda kröfuhafa, vissu íslenskir kjósendur ekkert um þetta aflandsfélag, Wintris, eignarhlut SDG í því, og enn síður um sölu þess á einn dollar á sama tíma og aðal viðfangsefni stjórnmála hans, bæði þá sem þingmanns og síðar sem forsætisráðherra voru einmitt kröfuhafar á borð við þau hjón. 

Fyrstu Sigmundar Davíðs við spurningum fréttamanns um Wintris fólust í örvæntingarfullri viðleitni til að þykjast lítið sem ekkert vita um það, reyna að þræta fyrir það og afvegaleiða spyrjandann. 

Nú fullyrðir hann hins vegar að "engu hafi verið haldið leyndu." 

Þarfnast þetta ekki nánari skýringar?

Fer fram á afsökunarbeiðni

Kemur ein sala á dag öllu í lag? "Seljum fossa og fjöll"?

Í gær var frétt um kaup Indverja, sem sveipaður er dul, á skika fyrir vatnsverksmiðju á Borgarfirði eystra. Ekki fyrsta vatnsævintýrið og ekki fyrsti erlendi landakaupamaðurinn, því að ekki eru nema nokkrir dagar síðan Grímsstaðir á Fjöllum voru seldir og ríkisvaldið hundsaði áskoranir um að jörðin yrði þjóðareign.

Til lítils var það fyrir okkur, tvo bloggara hér á blog.is, Styrmi Gunnarsson og mig, að skrifa ásamt fjölda Íslendinga undir áskorun um að gæta landsins okkar.  

Í dag er það Fjaðrárgljúfur, sem er til sölu, og það yrði í stíl við annað ef þetta einstæða gljúfur færi sömu leið og svo margt söluvænt fer um þessar mundir. 

Vitað er að erlendir fjárfestar eru á góðri leið með að eignast smám saman heilt hérað, Vopnafjörð. 

Danir settu undir svona leka þegar þeir gengu í ESB og gátu fengið undanþágu til að tryggja samsvarandi eignarhald dönsku þjóðarinnar á dönsku landi og bústöðum. 

En í EES-samningnum var ekki um neitt slíkt að ræða, við vorum sennilega ekki í neinni aðstöðu til þess og erum það sennilega ekki að setja nein skilyrði, verðum bara að taka sjálfvirkt frá tilskipunum, sem eru ákveðnar við samningaborð, sem við eigum enga aðild að. 

Dropinn holar steininn, segir máltækið, og með svipuðu áframhaldi kunnum við að vakna upp við vondan draum. 

Þetta slapp fyrstu 20 árin í EES en nú eru hugsanlega að renna upp nýir tímar, sem leiða hugann að því sem Flosi Ólafsson söng hér um árið: 

"Seljum fossa og fjöll! /

Föl er náttúran öll!  /

Og landið mitt taki tröll!" / 

Nota Bieber í íslenskri auglýsingu