Mörður hét maður. Hann var illmenni.

Lýsing Njálu á Merði Valgarðssyni er stutt og hnitmiðuð. Hann var illmenni. Punktur. Svona hefur þetta alltaf verið frá örófi alda, að sumir virðast fæddir siðblindir og alræmdir fyrir undirferli, lygar og ofbeldisverk.

Misjafnt er hvernig svona menn fá útrás fyrir þessa eiginleika sína.

En í hópi hinna siðblindu skrímsla hjá Ríki Islams hljóta slíkir menn að blómstra og leita þangað úr öllum áttum.

Og það er eitt af því sem gerir það svo snúið að fást við hryðjuverkafólkið. Það fer svo fjölbreyttar leiðir og sprettur upp á ólíklegustu stöðum, allt eins úr röðum vel stæðs fólks á Vesturlöndum, sem úr röðum fátæks fólks í Arabalöndunum. 

 

„Hann var bölvaður skíthæll“

Öfgar í veðrinu eins og spáð var.

Það hefur vakið athygli að undanförnu að veðurlag hefur verið sérstaklega hlýtt bæði í Norður-Ameríku og á meginlandi Evrópu.

Hins vegar hefur illyrmislegur helblár kuldapollur verið á svæðinu milli Grænlands og norðausturstrandar Kanada, og vitað er að fyrir suðvestan Ísland hefur sjór orðið svalari en áður síðustu misserin.

Það er í samræmi við nánast allar tölvuspár vísindamanna varðandi hlýnun lofthjúpsins.

Undanfarnar vikur hefur veðrið yfirleitt verið hlýrra hér á landi en spáð hefur verið og hefur sést vel að það hefur verið að þakka hinum mikla hlýja loftmassa yfir Evrópu sem hefur þrýst sér til norðvesturs og haldið í við kuldann fyrir norðvestan Ísland.  

Í ferð um Bæjaraland í Þýskalandi og Austurríki fyrir tíu dögum var stundum allt að 22ja stiga hiti og heiðskírt, mjög óvenjulegt miðað við árstíma.

En nú virðist hið óhjákvæmilega að gerast að kuldapollurinn sækir í sig veðrið í bókstaflegri merkingu og sækir til suðausturs með þeim afleiðingum, að reyndir veðurfræðingar eiga erfitt með að trúa þeim veðuröfgum sem virðast blasa við.

Hér á landi eru allmargir sem miða trú sína á það að hlýnun jarðar sé tilbúningur við það að á okkar hnattsvæði, eða suður af landinu, eru sjór og þar af leiðandi loft heldur svalari en fyrsta áratug aldarinnar.

En þótt okkur sýnist þetta býsna stórt svæði, gildir um meðalhitann á jörðinni að hann heldur áfram að hækka til lengri tíma litið, rétt eins og hann hefur gert meira en heila öld.

Að vísu koma nokkurra ára sveiflur upp og niður, en þegar horft er yfir allt þetta tímabil í heild sést, að smám saman verður hitinn á toppum og í lægðum línuritsins hærri og hærri.

Spá allt að 30°C hitasveiflu

Ekki staðið við forsendu Schengen samstarfsins.

Ein af forsendum Shcengen-samstarfsins á sínum tíma var, að með því að einfalda landamæravörslu í Evrópu þannig að í stað margra landmæra með takmarkaðri getu í mannafla til eftirlits, væru ytri landamæri með miklu nákvæmara og skilvirkara eftirliti.

Til þess að þetta hefði getað gengið eftir, hefðu ríkin, sem í samstarfinu voru, orðið að standa sameiginlega kostnað af stórbættu eftirliti á ytri landamærunum, svo að það virkaði almennilega.

Þetta hefur greinilega ekki verið gert.

Dæmi um vandræðin sem nú steðja að innri landamærum í álfunni mátti sjá á landamærum Þýskalands og Austurríkis um daginn þegar minnst tíu kílómetra löng röð bíla myndaðist af því að vegurinn yfir landamærinn var þrengdur niður í eina akrein.

Set hér inn ljósmynd sem var tekin út um framrúðuna meðan beðið var þarna í um klukkustund eftir því að komast í gegn, og samt var engin leið fyrir lögreglu sem þarna var, að skoða nema örlítinn hluta af bílamergðinni.

47 ríki eru aðilar að Evrópuráðinu og 27 að ESB. Hagkvæmni greiðra flutninga fólks og varnings yfir landamæri eins og eru í Norður-Ameríku og í Evrópu er ein höfuðforsendan fyrir því að æðakerfi efnahagslífsins sé skilvirkt.

Í Bandaríkjunum er höfuðáherslan lögð á ytri vörslu ytri landamæri ríkjanna en ekki reynt að hafa slíkt við á innri landamærunum.

Samt streyma ólöglegir innflytjendur inn í landið en væru miklu fleiri ef lélegri vörslu væri dreift út um öll landamæri ríkjanna innan BNA. Greið umferð milli ríkjanna er ein af forsendum efnahagslífi landsins.

Í Evrópu var ætlunin að ná fram svipaðri hagkvæmni, og voru Norðurlöndin innbyrðis í fararbroddi í þeim málum.

En ljóst er að landamæravarslan er hvergi nærri nógu öflug.   

Alvarlegar glufur í eftirlitinu

Aldrei að breyta vinningsliði?

Úrslit í vináttulandsleikjum geta kannski skipt máli þegar FIFA raðar landsliðum á styrkleikalista, - ég veit ekki hvernig því er nákvæmlega háttað.

En héðan af mun það ekki skipta öllum máli í hvaða sæti á styrkleikalista landslið verða þegar kemur að því að hefja leik á EM næsta sumar, heldur einungis geta liðsins í vörn og sókn í viðkomandi meistaramótsleik.

Þá er gott að hafa notað undirbúningsmánuðina fyrir mótið til þess að skoða sem best alla möguleika á uppstillingu liðins þegar komið verður að ögurstundu, - ekki úrslit í einstaka vináttulandsleikjum meira en hálfu ári fyrr.

Benda má á, að heimsmeistarar Þjóðverja töpuðu fyrir Frökkum í vináttulandsleiknum sögulega þegar hryðjuverkaárásirnar voru gerðar í París. Engum dettir samt í hug að á EM segi þau úrslit neitt um það hvernig þýska liðið stendur sig þá.

Þegar litið er á markatölurnar í undankeppni EM sést að aðall íslenska liðsins í henni var duglegasta, best skipulagða og agaða vörn undankeppninnar, sem hélt markinu hreinu leik eftir leik, jafnvel gegn sterkum knattspyrnuþjóðum.

Stundum er sagt: "Never change a winning team!" og einnig sagt í íslensku máltæki að ekki eigi að skipta um hest í miðri á.

En íslenska landsliðið er ekki komið út í ána og vonandi er að þeir Lars og Heimir séu að gera rétt með því að nota vináttulandsleiki til þess að prófa mismunandi uppstillingar á liðinu og þreifa fyrir sér um mannabreytingar, án þess að missa sjónar á nauðsyn þess að þegar á hólminn verður komið á mótinu sjálfu næsta sumar, standi slípað, agað og reynslumikið lið inni á vellinum þegar þjóðsöngvarnir verða leiknir.

Draumabyrjun dugði ekki til gegn Slóvakíu