19.5.2015 | 21:52
Finnska lagið var bara ekki nógu gott?
Söngvakeppni evrópskra sjónvarpsstöðva er söngvakeppni eins og nafnið bendir til. Spurningin er; Hvað er lagið gott? Og þá er textinn hluti af laginu að sjálfsögðu.
Í fyrra fannst mér hollenska lagið best. Það lifir líka eftir keppnina.
En austurríski sigurvegarinn vakti mesta athygli og boðskapur hans var athyglisverður.
Nú var boðskapur finnsku pönkaranna afar mikilvægur og snart mig, ekkert síður en Reynir Pétur gerði það fyrir réttum 30 árum áður en landsmenn höfðu hugmynd um tilvist hans.
En mér fannst lagið, sem Finnarnir fluttu, einfaldlega ekki nógu gott og finnst að þeir hefðu átt skilið að fá að flytja betra lag.
Efst á listanum hjá mér að svo komnu eru því lög Ítala, Ástrala og Rússa. Og vonandi kemst María áfram á fimmtudaginn.
Hvorug Norðurlandaþjóðin áfram | |
Tilkynna um óviðeigandi tengingu við frétt |
Bloggar | Slóð | Facebook | Athugasemdir (4)
19.5.2015 | 19:33
Lækkun olíuverðsins skekkir umræðuna.
Fyrsta verðhjöðnun í Bretlandi í 55 ár sætir tíðindum og sömuleiðis hefur það sætt tíðindum hér á landi að síðustu misserin hefur íslenska hagkerfið sótt í sig veðrið.
Alls konar ástæður eru nefndar en sú þeirra, sem er langstærst og raunar forsenda fyrir öllum hinum, hin einstæða og mikla lækkun olíuverðs, er varla nefnd á nafn.
Ástæðan er skiljanleg því að í flestum löndum er þetta utanaðkomandi ástæða, sem stjórnvöld hvers lands hafa ekki komið nálægt.
En það eru augljóslega ekki lítil áhrif sem olíuverðið hefur, svo gríðarlega stóran hlut sem olían á í þjóðarbúskap allra landa á okkar tímum.
Mikilvægt er að hafa fyrir sér rétta mynd af helstu áhrifavöldum í hagkerfinu þegar verið að kryfja það til mergjar og skiptast á mismunandi skoðunum.
Hætt er við því að tími þurfi að líða við lítt breytt ástand þar til hægt verður að meta helstu þættina nógu vel og þeirri skekkingu umræðunnar linir, sem lækkun olíuverðsins hefur valdið.
Verðhjöðnun í fyrsta sinn í 55 ár | |
Tilkynna um óviðeigandi tengingu við frétt |
Bloggar | Breytt s.d. kl. 19:49 | Slóð | Facebook | Athugasemdir (0)
19.5.2015 | 08:15
Svipuð vandamál víða um heim.
Sjá má fjallað um það að vandamál vegna flóttafólks frá Norður-Afríku til Suður-Evrópu sé eingöngu því að kenna að fólkið sé flest múslimatrúar og aðlagi sig ekki að aðstæðum í Evrópu, heldur búi til hryðjuverkahópa sem ætli að rústa vestrænu þjóðskipulagi.
Múslimatrú sé því ógnin mikla og að nauðsynlegt sé að koma öllu múslimatrúarfólki úr landi.
Sagt er að það séu það "mistök en ekki mannúð" að taka á móti þessu fólki og leyfa tilvist þess nema það verði áfram heima hjá sér.
En í svona tali felst mikil einföldun því að svipuð vandamál eru víðar.
Í Bandaríkjunum er svipað vandamál fólgið í milljónum löglegra og ólöglegra innflytjenda úr suðri. Þar er svipaður söngur heimamanna, sem benda á að þessir innflytjendur aðlagi sig ekki að bandarísku þjóðskipulagi, heldur "rotti sig saman" í sérstökum fátækrahverfum, glæpatíðni sé mun meiri hjá því en öðrum og tilvist þessa fólks ógni öryggi Bandaríkjamanna.
Munurinn á röksemdunum vestra og því sem kyrjað er í Evrópu er hins vegar sá, að trúarbrögðum er ekki blandað inn í hana í Ameríku, því að innflytjendurnir vondu eru nefnilega kaþólskir mestan part.
Röksemdirnar um hærri glæpatíðni, sérstök fátækrahverfi þar sem "hyskið rottar sig saman" og ógn við vestrænt samfélag hefur líka alla tíð verið notað gegn blökkufólki í Bandaríkjunum og sagt fullum fetum að stuðningur við jafnréttisbaráttu blökkufólks og innflytjendur sé "ekki mannúð heldur mistök."
Í Bandaríkjunum þekkist líka sams konar vandamál og í Evrópu. Innflytjendurnir taka að sér láglaunastörf sem eru grunnurinn að því að hinn velmegandi hvíti meirihluti geti haldið sínum kjörum án þess að vinna störf sem hann vill ekki vinna.
Þetta á við í Þýskalandi og fleiri Evrópuríkjum um Tyrki og aðra innflytjendur sunnan að.
Einn munur er þó á Bandaríkjunum og Evrópu. Andúðin á innflytjendum í Bandaríkjunum á erfiðara uppdráttar en í Evrópu af því að Bandaríkin eru upphaflega innflytjendasamfélag og það að taka á móti innflytjendum á meðan mesti innflytjendastraumurinn var, var mannúð og nauðsyn en ekki mistök.
Og lunganum af blökkufólkinu, sem flutt var inn til að verða ófrjálsir þrælar, var ekki hægt að kenna um að ryðjast óboðið inn í landið. Það fluttist ekki inn af eigin völdum, heldur skófluðu hvítir menn því ófrjálsu inn í landið til að vinna erfiðustu og verstu störfin.
Grípa til aðgerða gegn smyglurum | |
Tilkynna um óviðeigandi tengingu við frétt |
Bloggar | Breytt s.d. kl. 08:20 | Slóð | Facebook | Athugasemdir (2)