"Raunveruleikastjórnmálamaður."

Orðið "raunveruleikastjórnmál" eða "realpolitik" fékk einkum flug á valdatíma Willy Brandt í Vestur-Þýskalandi þegar hann leitaðist við að móta nýja utanríkisstefnu Vestur-Evrópu og Vesturveldanna gagnvart Sovétríkjunum í Kalda stríðinu með því að meta stöðuna milli austurs og vesturs af raunsæi.

Með því að koma á friðsamlegri sambúð hinna ólíku kerfa vonaðist Brandt til að aukin menningarleg og viðskiptaleg samskipti við Rússa opnaði glufu fyrir vestræn áhrif austur fyrir járntjald.

Þegar hættan var mesgt á því að Ukraínudeilan færi algerlega úr böndunum fyrst eftir að Rússar innlimuðu Krím og átökin í austurhluta Ukraínu stigmögnuðust dag frá degi þeyttist Angela Merkel eins og þeytispjald á milli höfuðborga vestrænna ríkja til að ráða ráðum sínum með æðstu mönnum þar og móta sameiginlega utanríkisstefnu, sem byggði ekki síður á raunsæi en hugsjónum.

Í þessu sýndi Merkel aðdáunarverðan dugnað og lipurð sem skipaði henni fremst í sveit valdamanna á Vesturlöndum. Stefnan var að vísu og er umdeild eins og eðlilegt er í jafn flókinni, viðkvæmri og óvissri stöðu og uppi er í spennuþrungnu ástandi í Austur-Evrópu.

En Angela Merkel er afar sterkur stjórnmálamaður, sem stundar sín "raunveruleikastjórnmál" af mikilli list og elju.

Persónuleg reynsla hennar að hafa alist upp í Austur-Þýskalandi og komist til æðstu metorða í sameiginlegu Þýskalandi hefur áreiðanlega reynst henni drjúgt veganesti við að öðlast skilning og reynslu til að mynda grundvöll fyrir sterka stöðu sína.     

 


mbl.is Stoltenberg dáist að drykkjuþoli Merkel
Tilkynna um óviðeigandi tengingu við frétt

Gleðin víða í dag.

Á ferðalagi í dag um Reykjavík og Suðurland mátt sjá gleðina skína víða í morgun.

Í Vesturbænum aðstoðaði ég litskrúðugar ungar konur við að "gæsa" eina þeirra við mikinn fögnuð. 

Litskrúðugt og ljósklætt fólk mátti sjá á öllum götum í þessari Vesturbæjarferð minni og þegar "Menningarveisla Sólheima" hófst eftir hádegið fyrir austan, skein einskær gleði af hverju andliti enda logn og heiðríkja í kvosinni, þar sem Sóheimar eru.Sólheimar, kór.

Menningarveislan í tilefni af 85 ára afmæli Sólheima og 30 ára afmæli Íslandsgöngu Reynis Péturs Ingvarssonar býður upp á ýmsar mjög áhugaverðar sýningar á þessum einstæða stað, þar sem mannúð, mildi og jafnrétti eru í hávegum höfð og hin umhverfisvænu mannvirki og starfsemi öll vekja athygli víða um lönd. 

Hljómleikar í kirkjunni voru einkar gefandi og ánægjulegir.

Þar flutti um 20 manna hljómeyki heilmikla tónlistardagskrá með kórsöng, tvísöng og einsöng vistmannakórs við undirleik fyrsta flokks hljóðfæraleikara.

Afar áheyrilegur hljóðfæraleikur og eistök sönggleði söngfólksins heillaði áheyrendur. Sólheimar. Áhorfendur.

 

Við heimkomu eftir svona gefandi sumardag er heldur betur búið að safna orku á sálargeymana.    


mbl.is „Þetta er sönn gleði“
Tilkynna um óviðeigandi tengingu við frétt

Sérkennilegt atvik.

Svo vill til að ég átti leið austur og upp Ártúnsbrekku í þéttri umferð á vinstri akrein klukkan rúmlega ellefu, þegar bílarnir fyrir framan mig hægðu svo snögglega á sér, að það mátti hafa sig allan við að lenda ekki aftan á þeim. 

Þeir sveigðu síðan skarpt til hægri inn á mið-akreinina þar sem þessi skyndilega röskun varð líka truflandi fyrir umferðina sem þar var á fullri ferð. 

Bílarnir voru að sveigja þetta vegna þess að úti við vegriðið í miðju vegar lá pallbíll á hvolfi undir kerru sem var föst við hann. 

Ekki var neinn að sjá mann á inni í bílnum eða nálægt honum og enginn aðvörunarþríhyrningur hafði verið settur upp til þess að vara ökumenn við. 

Enginn hafði hringt í fréttastofu RUV og lögregla virtist ekki hafa komið á staðinn. 

Óneitanlega sérkennilegt atvik. 


mbl.is Pallbíll á hvolfi í Ártúnsbrekku
Tilkynna um óviðeigandi tengingu við frétt

Algeng hegðun í umferðinni.

"Frekjukallahegðunin" sem svo er nefnd en fer þó ekki alveg eftir kynjum, er áberandi í íslenskri umferð. 

Dæmi um það eru til dæmis þau vandkvæði sem eru á því að skipta um akrein eða að deila umferðinni jafnt þar sem tvær akreinar renna saman í eina. 

Það virðist vera almenn hugsun að sá bílstjórinn, sem aki mun hraðar, eigi forgang ef annar bílstjóri gerist svo djarfur að vilja koma yfir á akreinina, sem "frekjukallinn" hefur eignað sér. 

Þessi bílstjórar leggjast á flautuna ef einhver ætlar sér að komast inn í autt bil fyrir framan þá á hringtorgum, gatnamótum eða akreinum. 

Þeir telja sig eiga forgang þar sem tvær akreinar renna saman í eina, ef þeir eru á beinu akreininni, þótt hvítu örvarnar, sem eru á aðreininni séu alþjóðlegt merki um það að umferðin eigi að renna ljúflega saman í fyrirbæri, sem er kallað "rennilás" eða "tannhjól" og er sjálfsagt mál í öðrum löndum en ógn við "frekjukallana" hér. 

Eitt einkenni þeirra er það að þeir telja sig eiga heimtingu á að "gefa séns" þegar þeim dettur það í hug, þótt það kosti oft verulega truflun á umferðarflæðinu, því að þessir ökumenn geta látið sér detta þetta í hug hvar sem er.

Einn þeirra, bílstjóri á flutningabíl, hægði á sér og stöðvaði bílinn uppi við umferðareyju á Álfheimum hjá Glæsibæ, tvöfaldri umferðargötu með alls fjórum akreinum.

Næsti bílstjóri fyrir aftan hélt að bilun hefði orðið í flutningabílnum og færði sig því um set og ók fram með flutningabílnum, sem skyggði á svæðið, sem var vinstra megin fyrir framan hann. .

Þá kom í ljós að flutningabílstjórinn var að gefa konu með barnavagn og gangandi barn "séns", sem ætlaði að stytta sér leið yfir fjórfalda götu með umferðareyju, en var þó aðeins um 50 metra frá gangbraut, sem lá yfir götuna. Engin leið var fyrir næstu bílstjóra fyrir aftan flutningabílinn að sjá þessa fjölskyldu þarna á ferð á umferðareyjunni. 

Eftir þetta atvik hringdi flutningabílstjórinn nokkru síðar í ökumann bílsins, sem ók fram með honum, og hótaði honum öllu illu fyrir að hafa næstum því valdið slysi!

Hafði flutningabílstjórinn greinilega tekið niður númer hins bílsins og fundið símanúmer ökumannsins!   


mbl.is „Frekjukallahegðun“ á Snorrabraut
Tilkynna um óviðeigandi tengingu við frétt

Bloggfærslur 6. júní 2015

Innskráning

Ath. Vinsamlegast kveikið á Javascript til að hefja innskráningu.

Hafðu samband