Snilld náttúrunnar í Hornbjargi.

Eitt af því sem ég er smeykastur við þegar ég flýg flugvélum er að rekast á aðra flugvél. 

Engar reglur nákvæmar reglur gilda um það hve nálægt flugvélar mega hvor annarri eða hver annari þegar flugmenn ákveða í sameiningu að fljúga hópflug. Slíkt er samkomulags- og matsatriði hjá þeim.

En ég er alltaf mjög smeykur við slíkt flug.

Þess vegna var það einhver mesta upplifunin á þeim árum sem ég kleif oft stærstu fuglabjörgin á Vestfjörðum og fór ofan í þau að sjá, hvernig hundruð þúsunda fuglager gat flogið um loftið án þess að séð væri að nokkru sinni yrði árekstur.

Hraðinn á þeim var oft mikill og þeir flugu þvers og kruss í allar áttir eins og ekkert væri.

Gaman væri ef hægt væri að rannsaka það til fulls hvernig þeir fara að þessu.

Jafnvel þegar hrun verður í björgunum og þéttur sægur fugla flýgur upp í ofboði verða engir árekstrar. Snilld náttúrunnar!   

Fjórir létust í flugslysi

Hrapaði flugvélin?

Alveg frá því að ég man eftir mér hefur það verið siður að afgreiða sem flest flugslys með því að segja að viðkomandi flugvélar hafi "hrapað". 

Í mörgum tilfellum hefur samt ekki verið um það að ræða. 

Þannig var flugvélinni Geysi flogið á Bárðarbungu árið 1950 án þess að hún "hrapaði". 

Ekkert í fréttinni af flugvélinnni í Indónesíu bendir til þess að hún hafi "hrapað." 

Komið hefur fram að mjög slæmt veður var á svæðinu og að hún hafi farist utan í fjallshlíð. 

Henni gæti því vel hafa verið flogið utan í fjallið af einhverjum ástæðum og allt of snemmt að fullyrða að flugvélin hafi hrapað, allra síst í fyrirsögn, nema að það hafi beinlínis komið fram. 

Flugvélin hrapaði

Syðri-Hitulaug mun taka forystuna aftur.

Syðri-Hitulaug nokkrum kílómetrum fyrir norðan vegamót leiðarinnar yfir Dyngjuháls og leiðarinnar norður og austur fyrir Trölladyngju hefur verið frábærasta náttúrulaugin á hálendi landsins að mínum dómi.

Hún er skammt austan við Skjálfandafljót og það sem sker úr um það, að ég set hana efsta á lista, er það, að hvergi er útsýni yfir jafn stórt svæði á hálendinu og úr þessari laug eða annað eins ósnortið víðerni að sjá.

Í suðri gnæfa Dyngjuháls, Vatnajökull og Bárðarbunga yfir auðnina, í suðvestri er Tungafellsjökull, og í  vestri eru Sprengisandur, Fjórðungsalda og Hofsjökull með sitt Miklafell. Þessi víði sjóndeildarhringur er 270 gráður.  

Nýja laugin við Holuhraun hefur skotist á toppinn hvað snertir stærð, staðsetningu, tilurð og aðstæður, en hennar bíður því miður hægfara kólnun, sem á eftir að verða til þess að Syðri-Hitulaug kemst fram úr henni.  

Albesta náttúrulaug landsins

Edinborg og Osló, - andstæður við Þrándheim og Reykjavík.

Aldrei er góð vísa, í þessu tilfelli vísa um varasama ákvörðun, of oft kveðin.

Í Edinborg og Osló var ákveðið að reisa nýja nútímaspítala frá grunni á nýjum stað. Ég hef skoðað spítalann í Osló og fjallað um hann í sjónvarpi, besta spítala í Evrópu, sem Norðmenn töldu fyrirmynd og mæltu með. 

Í Þrándheimi var farið í "bútasaum" á gamla staðnum og búið til skrímsli, sem ég skoðaði líka og fjallaði um og Norðmenn segja að sé víti til varnaðar.

Tveir sérfræðingar hafa komið fram á Íslandi til að fjalla um málið.

Annar var bandarískur, á vegum Læknafélags Íslands, og reyndist auðvitað vera sérfræðingur í bútasaumi á spítölum í Bandaríkjunum.

Hinn var evrópskur, kom fram í Kastljósi og ég hlakkaði til.

Vonaðist að einhver kæmi sem segði frá fleiri tegundum af spítölum en bútasaumsspítölum.

En auðvitað var það borin von.

Haldið þið ekki að þessi sérfræðingur hafi einmitt verið sá, sam hannaði bútasaums-skrímslið í Þrándheimi!    

„Það er allt í lagi að skipta um skoðun“