Spurning um skilaboð.

Porsche 911 frá árinu 1979 er ekki hvaða bíll sem er. Árið 1978 ætluðu verksmiðjurnar að hætta að framleiða þennan einstæða bíl og settu á markaðinn Porsche 928 sem arftaka. 

Porsche 911 var með stóra loftkælda boxer-sexu fyrir aftan afturhjól og afturdrif, og þyngdarhlutföllin í bílnum voru þannig, að það átti að vera ómögulegt að hægt væri að ráða við hann í sviptingum á miklum hraða. 

Hann var líka erfiður við að eiga við vissar aðstæður en hins vegar með alveg sérstaklega góða spyrnugetu og í höndum á snillingum eins og sænska rallökumanninum Per Eklund náði hann að vera í fremstu röð á erfiðustu rallmótum heims. 

Arftakinn var hins vegar með átta strokka vatnskælda vél frammi í og hefðbundna driflínu þaðan aftur í afturhjólin eins og hundruð annarra bílgerða. Eini munurinn á honum og öðrum bílum af "Panhard-fyrirkomulagi, algengasta fyrirkomulaginu langt fram eftir síðustu öld, var sá að gírkassinn var hafður við afturhjólin til þess að ná fram 50-50 þyngdarhlutföllum milli fram- og afturhjóla.  

Porsche 928 var valinn bíll ársins í Evrópu 1978 og er eini sportbíllinn sem hefur hlotnast sá heiður. 

En allt kom fyrir ekki. Bíllinn seldist illa, enda dýr og höfðaði ekki til þeirra sem sóttust eftir hreinræktuðum sportbíl, þar sem ekki væri verið að eltast við málamiðlanir. 

Verksmiðjurnar urðu að selja Porsche 911 áfram og tókst ekki að drepa hann. 

Að þessu leyti var hann í svipaðri stöðu og Lada Niva og Landrover Defender, sem stóðu af sér banatilræði framleiðenda sinna. 

Þegar þetta er skoðað sést, að skilaboðin sem send eru með því að eyðileggja í auglýsingu Porsche 911 af nákvæmlega þeirri árgerð sem lifði af banatilræði framleiðenda sinna og gerðist með því einstæður bíll, eru afleit og sýna annað hvort vanþekkingu á eðli málsins og lítilsvirðingu gagnvart verðmætum eða afleitan smekk, nema hvort tveggja sé. 

Þetta er spurning um þau skilaboð sem myndskeiðið sendir, ekki um það hvort  viðkomandi eintak var óökuhæfur bíll eða ekki eins og reynt er að halda fram til að klómar í bakkann.

Og þau skilaboð hafa sannarlega reynst afleit.

Porsche 911 lifir enn í meginatriðum, stuttur, með vélina fyrir aftan afturhjólin, en raunar búið að vera að endurbæta hann það lengi, að einhvern tíma á ferlinum varð hann kannski ekki "ekta" 911.

Erfitt er að benda nákvæmlega á það hvenær búið var að eiga of mikið við hann, kannski 1998 þegar vatnskæld vél tók við af loftkældri, kannski þegar nýr undirvagn var gerður í fyrra skiptið af tveimur.

En ósvikinn Porsche 911 á engan sinn líka í bílaflota heimsins.  

Bílaáhugafólk er brjálað yfir þessari auglýsingu

"GAGA" ("MAD") er óviðunandi ógn. Ekki gleyma Hamborg 1943.

Tilvist kjarnorkuvopna heimsins er óviðunandi ógn við líf mannkynsins og lífríki jarðar.

"GAGA" kenningin (Gagnkvæm Altryggð Gereyðing Allra), - á ensku "MAD" (Mutual Assured Destruction), sem kjarnorkuvopnabirgðir heimsins og hernaðaráætlanir byggjast á, er yfirgengilegur fáránleiki og glæpur.

Japanir voru byrjaðir á samningaumleitunum 1945 en það hentaði ekki Bandamönnum.

Búið var að eyða nær öllum skipa- og flugvélaflota landsins, drepa 100 þúsund manns í einni loftárás á Tokyo og eyða helmingi allrar borgarbyggðar í landinu.

Bandaríkjamenn voru með áætlun um að varpa alls sex kjarnorkusprengjum í viðbót næstu mánuði.

Í upphafi var Kyoto, án nokkurs hernaðarlegs gildis, jafnvel helgari borg en Róm er fyrir kristna menn, efst á dauðalistanum á þeim forsendum að með því að eyða henni væri hægt að valda hámarks andlegu og líkamlegu tjóni, ekki bara vegna helgi borgarinnar og ómetanlegra menningarminja, heldur vegna þess að í borginni væri saman komið mest af hæfileikaríku og menntuðu fólki á einum stað, hægt að eyða hámarki andlegrar getu og valda mesta mögulega andlegu áfalli!

Einum manni, Henry L. Stimson hermálaráðherra, tókst að stöðva þessa vitfirrtu hugmynd.

Hiroshima og Nagasaki voru ekki mannskæðustu stóru hryðjuverkin. Fyrsta hryðjuverkið af þessari stærð í sögu lofthernaðar var árásin á Hamborg í júlí 1943 þar sem rúmlega 42600 voru drepnir, fleiri en í Nagasaki, en að vísu á þremur dögum í stað eins. Og síðar áttu fleiri eftir að deyja af afleiðingum árásarinnar á Nagasaki.  

Í Hamborg varð til í fyrsta sinn fyrirbrigðið "eldstormur" af þeirri stærð að ekkert jafn stórt hafði áður sést, - þar sem eldhafið varð svo öflugt, víðfeðmt og eyðandi, að það myndaði kerfi af stormum eða eins konar "eldstrokkum" (samanber skýstrokkum) sem sogaði fólk og lausa hluti inn í sig úti um alla borgina og steikti allt sem á vegi varð. 

Árásin var réttlætt með þörfinni á að eyðileggja höfnina og iðnfyrirtæki, en til þess þurfti ekki að drepa allt þetta fólk og gereyða heilum íbúðahverfum, sjá myndir frá Hamborg eftir árásirnar. 

Hamborg vill gleymast enn má ekki gleymast.   

Hamborg, Dresden, Tokyo, Hiroshima, Nagasaki. Með þessum stríðsglæpum var að vísu verið að hefna fyrir Guernica, Coventry og Belgrad, hina nýju tegund hryðjuverka og stríðsglæpa sem nasistar innleiddu, en söm var þó gerð allra sem að þessum skelfilegu árásum stóðu.

GAGA var næstum búið að leiða gereyðingu yfir mannkynið 1983 vegna bilunar í tölvu.

Eins og varðandi árás á Kyoto kom einn maður kom í veg fyrir stórslys og var refsað fyrir það. Mannkynið má ekki sætta sig við slíkt ástand.  

 

 

  

Fullkomin tortíming