Byrjun á stækkandi vanda.

Eitt sinn var Fönikía, þar sem nú eru Túnis og Líbía. Fönikíka var stórveldi í krafti auðlinda landsins, sem fyrst og fremst fólust í góðum skilyrðum fyrir landbúnað. 

Sama má segja um stórveldistíma Mesópótamíu, þar sem nú er Írak. 

Nú eru eyðimerkur, þar sem áður voru blómleg héruð, stór hluti beggja landa. 

Hlýnun lofthjúpsins og auknir þurrkar gera ástandið verra, auk þess sem Afríka er sú álfa þar sem búist er við mestri fólksfjölgun. 

Hnignun landgæða er mest af mannavöldum og við það bætist annað sem er af mannavöldum, en það eru stórfelldir styrkir vegna landbúnaðar í Evrópu og innflutningstollar til þess að koma í veg fyrir að samkeppnisfær landbúnaður sunnar geti fengið að njóta sín. 

Allt frá ráðstefnunum í Ríó, Kyoto og Kaupmannahöfn hefur síðasti aldarfjórðungur verið markaður nær algeru getu- og viljaleysi leiðtoga þjóðanna til þess að láta af rányrkju og skammtímagræðgi. 

Því miður eru litlar líkur á að útkoman úr Parísarráðstefnunni í haust breyti miklu en þá er sennilega síðasta tækifærið til þess að mannkynið sjái að sér.

Vandinn, sem felst í fólksflóttanum frá Afríku til Evrópu, er aðeins byrjunin á því að margs konsar afleiðingar sinnuleysis þjóðanna fari að herja á þær með vaxandi þunga.  

 

 

Reyndi að smygla 18 flóttamönnum

Meira en 20 ára gömul lausn færð úr bíl í flugvélar.

Meiripartinn af ferli bílanna hefur verið hægt að færa framsæti þeirra fram og aftur til þæginda fyrir farþegana.

Þetta hefur gert mögulegt að gefa nægilegt og þægilegt rými fyrir framsætisfarþegana en einnig til þess að rýma fyrir stórum farþegum í aftursæti og raða fólki þannig á milli fram- og aftursæta að sem best rými fáist fyrir alla.

1992 kom Renault Twingo á markaðinn og var búinn ýmsum nýjungum. Meðal þeirra var sú nýjung að ekki einasta var hægt að færa framsætin fram og aftur, heldur einnig aftursætin og auka þar með farþegarými í þeim á kostnað farangursrýmis.

Útkoman varð sú að Renault Twingo, aðeins 3,43 m á lengd og næst stysti bíllinn á markaðnum, var með meira fótarými fyrir farþega en flestir aðrir bílar, bæði stórir og smáir. 

Merkilegt er að þessi einfalda lausn skuli ekki hafa breiðst út.

Og gildi hennar er augljóst hvað snertir flugvélar, þar sem fólk þarf að sitja í sama sætinu svo klukkustundum skiptir.

Nú er loksins hægt að fara að raða bæði fólki og sætum í flugvélar og hefði mátt gerast fyrr.

Nú er komin fram gerbreytt gerð af Twingo sem er ekki síður merkilegur en fyrsta gerðin, því að vélin er komin aftur í bílinn, en hálf öld er síðan síðustu rassvélarbílarnir, Hillman Imp, Fiat 850, Simca 1000 og Skota 1000 MB urðu síðustu nýju litlu fólskbílarnir komu fram með þá tilhögun.

Mótbárurnar gegn slíkum bílum voru ýmsar, aðallega að þeir áttu til að skvetta út rassinum í of kröppum beygjum og áttu til að yfirhita sig og soga inn ryk að aftan, svo að eitthvað sé nefnt.

Auk þess voru nýju framdrifsbílarnir með möguleika á afturdyrum með stækkuðu farangursrými við að fella aftursætisbökin niður.

Porsche 911 og Smart hafa leyst tvö þessara vandamála með því að hafa vatnskassann fremst í bílnum og tölvustýrða skrikvörn og nú hafa Smart og Renault ruglað saman reitum sínum þannig að Smart og Twingo eru í raun sami bíllinn, en Twingo bara lengri gerð með fimm dyrum í stað þriggja á Smart. 

Og með því að hafa þakið um 15 sentimetrum hærra og vélina svo vel lagða niður á milli afturhjólanna í staðinn fyrir aftan þau eins og á fyrrnefndum rassvélarbílum, er Twingo nú með sömu möguleika og framdrifnu bílarnir til þess að vera eins konar skutbílar með niðurfellanlegum aftursætisbökum og stóru farangursrými með afturdyrum. 

Ég hefði viljað sjá hina nýju Fiat 500 og Wolksvagen Bjöllu standa vörð um vélina aftur með svipaðri lausn og nú hefur verið gripið til á Renault Twingo. 

En þess má geta að fyrsti franski bíllinn, sem seldist í fleiri en milljón eintökum var Renault 4CV, sem var með vélina aftur í og afturhjóladrif. 

Hanna færanleg flugvélasæti

Heildarmyndin er mikilvægust.

Þegar rætt er um hlýnun lofthjúps jarðar og þá staðreynd að aldrei síðustu 800 þúsund ár hefur verið meiri koltvísýringur í andrúmsloftinu en nú, gleyma menn sér oft við að horfa á mismunandi veðurfar á einstökum svæðum eða tímabundnar sveiflur í nokkur ár eða áratugi. 

Með slíku er meginatriðinu drepið á dreif, sem er meðalhitinn á jörðinni, samsetning lofthjúpsins og súrnun sjávar. 

Flestar spár síðustu 20 ár hafa gert ráð fyrir mismikilli hlýnun eftir heimshlutum og verið nokkuð svipaðar þessi ár hvað varðar það að hlýnunin verði minni á einstökum svæðum, eins og til dæmis á Norður-Atlantshafi og þá einkum suðvestur af Íslandi. 

En þetta svæði er svo lítill hluti af jörðinnni að hin mikla hlýnun á Norðurheimskautssvæðinu og yfir meginlöndunum yfirskyggir jafnvel kólnun við Ísland. 

Forsetinn segir Himalajaísinn að hverfa