Allir eru að fá sér, kosningaskjálftinn byrjaður.

Skötuveislan í Garðinum er auglýsing fyrir Ásmund Friðriksson.

Ragnheiður Elín þrýstir sér í fréttir í dag og vill nú allt fyrir Reykjanesbraut gera, en eins og svo oft áður er það eftir dauðaslys sem boltinn fer að rúlla.

Elliði Vignsson er líka áberandi í fréttum þessa daga, en auðvitað er það einber tilviljun að þessi þrjú komast í sviðsljós fréttana þessi dægrin þegar kosningaskjálftar sjást á pólitískum skjálftamælum.

Bjarni Benediktsson grefur upp gömlu loforðin frá 2013 varðandi gamla fólkið og heilbrigðiskerfið, og úr þvi að það mun kosta mikil útgjöld hjá ríkissjóðnum hands, verður að þola það að Eygló Harðardóttir og Regnheiður Elín heimti líka sitt úr þeim sjóði.

Já, eins og sagði í slagaranum endurvakta, allir dansa (kosninga)konga, allir eru að fá sér (úr ríkissjóði).  


mbl.is Þrír máta oddvitastól sjálfstæðismanna
Tilkynna um óviðeigandi tengingu við frétt

Fleiri ferðamenn, já. Fleiri flutningabílar, ?

Nú eru miklu fleiri ferðamenn á landinu en nokkru sinni fyrr. Þeir bætast við heimamenn, meðal annars í umferðinni. Fjölgun ferðamanna hlýtur því að kalla á aukna umferð, og þegar gott veður í mestallt sumar bætist við, auk þess sem auknar tekjur af þeim kalla á hagvöxt og aukinn kaupmátt, hlýtur umferðin að aukast.

Annað einkenni virðist áberandi þegar ekið er um helstu umferðaræðar innan borgarinnar og út frá henni: Fjölgun stórra flutningabíla í umferðinni.

Í þau skipti sem ég hef átt leið austur fyrir fjall að undanförnu vegna gerðar stórs hljómdiskaalbúms með mörgum nýjum lögum, hefur vaxandi fjöldi malarflutningabíla og annarra stórra flutningabíla vakið athygli mína og minnt á síðustu misserin fyrir Hrunið.

 


mbl.is Nýtt umferðarmet í höfuðborginni
Tilkynna um óviðeigandi tengingu við frétt

Barry Goldwater í öðru veldi?

Fyrir 52 árum valdi Republikanaflokkurinn öldungardeildarþingmanninn Barry Goldwater frá Arizona sem frambjóðanda sinn.

Goldwater hafði ýmislegt til síns ágætis á þröngum sviðum.

Hann var til dæmis flugmaður og afar mikill áhugamaður um framfarir á því sviði, - nokkuð sem féll vel í kramið hjá mér á þeim árum, - en það drukknaði í samanburði við það, hve hann var harður hægri maður, heiðblár úti á jaðri flokksins.

Svo fór að Lyndon B. Johnson valtaði yfir Goldwater í kosningunum, enda var Vietnamstríðið enn ekki farið að belgjast út eins og síðar varð og þótt Johnson væri oft óprúttinn og jafnvel ósvífinn stjórnmálamaður, var hann snillingur í að vinna fylgi á Bandaríkjaþingi fyrir málefnum sínum.

Menn hafa fært að því rök að hefði John F. Kennedy verið áfram forseti hefði hann ekki náð eins langt í að koma tímamótamannréttindalöggjöf í gegn og Johnson.

Einn stjórnmálamaður, sem Johnson sótti hart að í einrúmi til að fá hann til að skipta um skoðun, lýst því síðar, að það hefði verið hamförum líkast hvernig Johnson beitti sér, því að hann gat verið einstaklega grófur og óheflaður, þegar sá var gállinn á honum. 

Á tiltölulega stuttum einkafundi þeirra hellti hann úr sér þvílíku magni af smjaðri, skömmum, hóli, hótunum, gylliboðum, svívirðingum og vinarhótum að með eindæmum var.

Niðurstaðan varð tilboð, sem ekki var hægt að hafna.

Republikanaflokkurinn lærði af óförum Goldwaters, en nú eru þeir að mestu horfnir yfir móðuna miklu sem drógu þann lærdóm, og Donald Trump virðist að sumu leyti vera Barry Goldwater í öðru veldi, því að auk þess að setja fram enn meiri rembustefnu en Goldwater, minna andstæður og þverstæður í málflutningi Trumps á lýsinguna af hamförum LBJ þegar hann var í sem mestum ham.

 


mbl.is Trump frambjóðandi repúblikana
Tilkynna um óviðeigandi tengingu við frétt

Bloggfærslur 20. júlí 2016

Innskráning

Ath. Vinsamlegast kveikið á Javascript til að hefja innskráningu.

Hafðu samband