Getur sjálfstýringin varast gömlu konuna og augnabliks blindandi kvöldsól?

Mikil bjartsýni hefur ríkt varðandi sjálfstýrða bíla og heyrst hafa spár um yfirtöku þeirra í umferðinni innan fárra ára.

Í fróðlegu viðtali í 60 mínútum varaði einn af helstu bandarískum kunnáttumönnum um þessi mál við of mikilli bjartsýni.

Það ætti eftir að þróa sjálfstýringarkerfið bæði í bílunum og aðstæður í gatnakerfinu til þess að líkja til fulls eftir mati góðra bílstjóra á aðstæðum í akstri.

Inni í svari sérfræðingsins komu vangaveltur eins og það hvernig bílstjórinn ætti að meta fyrirætlanir og viðbrögð gömlu konunnar sem væri stödd við gangstéttarbrúnina.

Hafi sjálstýribúnaðurinn í Teslunni greint ljósleitan vöruflutningabíl sem hluta af björtum himni er þess samt að gæta að ökumenn geta gert hliðstæð mistök.

Dæmi um það er þegar prýðilegur bílstjóri, sem var að aka í beygju eftir aðrein frá Grensásvegi inn á Miklubraut í vor, varð fyrir því að lágum en sterkum kvöldsólargeisla sló framan í hann eitt örstutt augnablik svo hann blindaðist á versta augnabliki þegar hjólreiðamaður var að komast þvert fram hjá honum á gangbraut, sem liggur yfir aðreinina.

Afleiðingin varð árekstur með brotinni framrúðu bílsins, ónýtu reiðhjóli og slösuðum hjólreiðamanni.

100% öruggt sjálfstýringarkerfi verður seint búið til en hins vegar hægt að fækka heildartíðni slysa. Síðan er matsatriði hve langt á að ganga í sjálfvirkninni.

Munum skrýtluna um sjálfvirka tilkynningabúnaðinn, þar sem röddin sagði: "Búnaðurinn, sem þessi tilkynning er hluti af, er fullkominn, - hann getur aldrei bilað...aldrei bilað....aldrei bilað....aldrei bilabilabilabilabilabilabila...."

 


mbl.is Rannsaka banaslys í sjálfstýrðum bíl
Tilkynna um óviðeigandi tengingu við frétt

5:3 hefði verið skárra en 5:2.

Ef bolti fer í hönd leikmanns inni í vítateig svo að hann breytir um stefnu og þar með gangi leiksins, ber að dæma vítaspyrnu.

Skiptir þá engu þótt um óviljaverk sé að ræða.

Í því tilfelli sem hollenski dómarinn dæmdi ekki vítaspyrnu á franskan sóknarleikmann vegna þess að boltinn fór í framhandlegg hans og breytti ekki um stefnu, hélt Frakkinn hendinni frá sér.

Ef hann hefði haldið henni þétt að líkamanum hefði boltinn í fyrsta lagi ekki farið í höndina og í öðru lagi hefði ekki ekki verið dæmd hendi.

Að vísu er ekki 100% gefið að Gylfi Þór hefði skorað úr vítaspyrnu en hann er nú samt afburða góð vítaskytta.

5:3 úrslit hefðu verið mun skárri en 5:2.

Og enn á eftir að sjá hvort annað lið en það íslenska á eftir að skora fleiri mörk hjá hinum firnasterku Frökkum.


mbl.is Dómarinn sendur heim
Tilkynna um óviðeigandi tengingu við frétt

Óðurinn til gleðinnar.

Óðurinn til gleðinnar er einkennisleg Söngvakeppni evrópskra sjónvarpsstöðva og að mig minnir sambands sjónvarpsstöðvanna.

Fölskvalaus lífsgleði og kærleikur á milli fólks eru dýrmætustu fyrirbrigði mannlífsins, þjóðlífsins og lífs mannkynsins á jörðinni.

Einlæg gleði barnanna í El-Kere, Gurra og Omorade, strákofaþorpum í dreifbýli hins örfátæka landi Eþíópíu, er mér eftirminnilegri þegar ég lít yfir farinn æviveg en stærstu hljómleikar hljómsveita eða hátimbraðir íþróttaviðburðir og flugsýningar.

Lífsgleði og baráttugleði örþjóðarinnar Íslendinga hrífur milljónaþjóðir heims meira en flest annað.    


mbl.is Frakklandsforseti dáðist að Íslendingum
Tilkynna um óviðeigandi tengingu við frétt

Bloggfærslur 5. júlí 2016

Innskráning

Ath. Vinsamlegast kveikið á Javascript til að hefja innskráningu.

Hafðu samband