Flokkarnir á víxl með og á móti þjóðaratkvæðagreiðslum.

2009 vildu Sjálfstæðisflokkur og Framsókn láta kjósa um það, hvort fara ættu í aðildarviðræður við ESB en Samfylking og Vinstri grænir voru á móti.  

Píratar og Björt framtíð voru ekki til 2009, en uppistaðan í Pírötum kom úr Hreyfingunni og í Bjartri framtíð úr Samfylkingunni og því frekar andstaða þar á bæ. 

Allir flokkar töluðu með því fyrir kosningar 2013 að kosið yrði um aðildarviðræður eftir kosningar, en Sjallar og Framsókn drógu lappirnar og snerust gegn því á sama tíma og Samfylking, Vinstri grænir, Björt framtíð og Píratar voru með því. 

Allir flokkar hafa því á víxl verið bæði með og á móti þjóðaratkvæðagreiðslu um þetta sama mál eftir því hvernig vindurinn hefur blásið og í hvað aðstöðu þeir voru, og furðulegt allan tímann af hverju þjóðin má ekki sjálf taka beina ákvörðun í þessu máli. 

Kjósa um ESB við upphaf samstarfs

Magnað að sjá Dag í ham.

Það var magnað í dag að sjá Dag Sigurðsson í ham í leikhléi í síðari hálfleiks Svía og Þjóðverja. Staðan var 23:23 og allt í járnum.

Dagur fór hamförum, bæði við að skilgreina leikinn, hvað færi aflaga og hvað þyrfti að gera, og ekki síður við að gefa leikmönnum sínum línuna, og stappa í þá stálinu, berja í þá kjark, ákafa og einbeitingu.

Þarna sást enn eitt dæmið um það hvað öflugur þjálfari getur gert fyrir lið sitt.

Ekki ónýtt fyrir okkur að eiga slíkan mann til að varpa ljóma á föðurland sitt.  

Engin Svíagrýla hjá Degi Sig

Firringin vex.

Það var ekki einróma hrifning yfir geimferðakapphlaupi Bandaríkjamanna og Sovétmanna fyrir hálfri öld. Til voru þeir sem gagnrýndu, að á meðan báðar þjóðirnar voru með óleyst stór félagsleg og þjóðfélagleg vandamál á jörðu niðri, skyldi svimandi upphæðum eytt í þessi vísindi. 

En þó voru þetta svonefnd risaveldi, og vegna vígbúnaðarkapphlaupsins á milli þeirra var hernaðarleg þýðing geimskotanna mikil, enda var svonefnd stjörnustríðáætlun Bandaríkjamanna eitt erfiðasta viðfangsefni þeirra Reagans og Gorbatjofs á fundum þeirra. 

Í Norður-Káreu búa nú um 24 milljónir manna eða meira 12 sinnum færri en í voru í Bandaríkjunum einum fyrir hálfri öld, og hagkerfið í Norður-Kóreu aðeins brot af hagkerfi Kananna.

Milljónir svelta í Norður-Kóreu og þess vegna er það merki um vaxandi firringu að hinir spilltu valdhafar skuli ætla sér að fara til tunglsins.  

Norður-Kórea stefnir á tunglið

Menn ulla á staðreyndir á jarðskjálftaslóðum.

Á svæðinu frá nyrðri hluta Tröllaskaga austur í Öxarfjörð er þekkt jarðskjálftasvæði, þar sem verða einhverjir hörðustu jarðskjálftar hér á landi. 

Nefna má skjálftann á Dalvík 1934 sem olli gríðarlegu tjóni, við mynni Skagafjarðar 1963, sem fannst vel í Reykjavík, og skæðan skjálfta með miklu tjóni á Kópaskeri í janúar 1976. 

Eins og gefur að skilja verður mest tjón á mannvirkjum af standa nærri upptökum hans. 

Þannig var það á Dalvík 1934 og Kópaskeri 1976, en skjálftinn út af Skagafirði gerði minni usla.

Ég átti heima á 12. hæð í blokkinni að Austurbrún 2 þegar Skagafjarðarskjálftinn varð, og ástæða þess hvað hann fannst vel þarna uppi var sennilega að sveifla kom á blokkina.

Þegar litið er á kort af skjálftaslóðum á tengdri frétt á mbl.is er sérmerktur brotasveimur sem liggur frá Bakka á Húsavík í áttina að Þeystareykjum.

Páll Einarsson jarðfræðingur hefur bent á þetta og þar með þá staðreynd, að líklega er verið að reisa verksmiðju á nákvæmlega allra versta stað á Íslandi hvað varðar jarðskjálftahættu, þannig að talsvert hefði munað um það að færa verksmiðjustæðið eitthvað til.

En menn ulla á þetta og það að ekki séu miklar líkur á því fyrir hverja kynslóð út af fyrir sig þótt þarna komi sá stóri skjálfti, sem ekki er spurning um hvort komi, heldur hvenær.     

 

Skjálfti upp á 3,7 stig

Þrjú meginstef: Landslagsheildir, vistkerfi og afturkræfni.

Þrjú ofangreind meginstef umhverfis- og náttúruverndarstefnu virðast Landsvirkjun og virkjanamönnum alveg hulin. 

Dæmi um þetta er mat á úmhverfisáhrifum fyrirhugaðra virkjana á við Kröflu, Leirhnjúk og Gjástykki, sem Landsvrikjun hefur láti verkfræðistofu gera, en þar er fullyrt að aðeins tvær landslagsheildir séu á svæðinu, Gæsafjöll við vesturjaðar þess og hins vegar suðausturhlutinn, sem samsvarar nokkurn veginn því svæði, sem Landsvirkjun vill bæta við núverandi virkjunarsvæði. 

Þetta er svo hróplega á skjön við þá augljósu staðreynd, að vettvangur Kröfluelda 1975-84 og Mývatnselda á fyrri hluta átjándu aldar, er auðvitað landslagsheild í óvenju skýrum skilningi, enda lögðu iðnaðarráðherra og umhverfisráðherra það til skömmu fyrir kosningar 2007 að þessi landslagsheild nyti sérstakrar meðferðar Alþingis, ef það ætti að fara að krukka í hana. 

Þetta er heild á borð við frægustu málverk heims, sem engum dytti að fara að krukka í. 

Svipað á við um vistkerfi á borð við Þjórsárver og vistkerfið á vatnasviði skagfirsku jökulsánna, sem virkjanafíklar girnast mjög að umturna.

En afturkræfni er kannski aðalatriðið, hvort hægt sé að snúa gerðum hlut til baka.

Það er stundum hægt þegar um er að ræða tær og hrein vatnsföll, en öðru máli gegnir um íslensku jökulárnar, sem fylla upp heilu dalina af aur, sem þær bera í miðlunarlón.

Maður gapti á sínum tíma við að sjá, að Villinganesvirkjun í Skagafirði, hluti af virkjunum á vatnasviði skagfirsku jökulánna, flaug í gegnum mat á umhverfisáhrifum þótt viðurkennt væri að lónstæði virkjunarinnar myndi fyllast upp á nokkrum áratugu, svo að miðlunin yrði ónýt sem og gljúfrin, sem nú þykja eitthvert besta flúðasiglingasvæði Evrópu.

En þetta mat var það næsta á eftir matinu á Kárahnjúkavirkjun, þegar Davíð Oddsson forsætisráðherra sagði að það yrði ekki liðið að "kontóristar úti í bæ" gætu stöðvað virkjunarframkvæmdir.

Að lokum hinn stóri munur á virkjun og verndun.

Verndun kemur ekki í veg fyrir að það verði virkjað síðar.

En virkjun kemur oftast í veg fyrir að hægt sé að fá hið umturnaða land til baka.  

Landsvirkjun gagnrýnir rammaáætlun