Koma skikki á þetta til framtíðar.

Það hefur dregist of lengi að koma skikki á það hvernig eignarhaldi á landi er háttað hér á landi. Fyrir bragðið þokast hægt og bítandi í þá átt að fjársterkir og valdamiklir einstaklingar, fyrirtæki og félög eignist þegjandi og hljóðalaust stór svæði, heilu dalina og sveitirnar. 

Verða þá bændur og aðrir leiguliðar líkt og var á myrkustu öldum Íslandssögunnar. 

Næsta skref gæti síðan að eignarhaldið færist yfir á enn sterkari útlendinga. 

Nú þarf að sýna framsýni og horfa ekki aðeins á það, hver það er í augnablikinu, sem eignast landareign, heldur það, hverjir það gætu orðið, sem hann  selur það eða erfa það eftir hann.

Er þá hollt að minnast þess þegar Einar Þveræingur benti á það að enda þótt Noregskonungur sá, sem ásældist Grímsey, væri hinn ágætasti maður, eins og hinn ríki Kínverji gæti svo sem vel verið, væri hitt ekki vitað hvernig afkomendurnir yrðu og þaðan af síður hverjir það yrðu sem hann gæti selt landi, eða til hvers hann myndi vilja selja það. 

Það þarf að vera pottþétt að íslensk löggjöf sé skotheld, svo að ekki sé hætta á að við vöknum of seint upp við það að hafa misst landið éða megnið af því úr höndum okkar. 

Ég hef áður lýst þeirri skoðun minni að heppilegustu fjárfestingarnar væru svipaðar og Friðrik Pálsson hefur gert með Hótel Rangá í landi Lambhaga á Rangárvöllum, en jörðin Lambhagi er áfram í eigu bóndans þar. 

Friðrik hefur haft trú á fjárfestingum í íslenskri ferðaþjónustu og allir hafa uppskorið ríkulega af því. 

Til vara mætti íhuga, hvort koma mætti á svipaðri skipan og er í sjávarútvegi, að útlendingar mættu ekki eiga meira en 49% viðkomandi eignar. 

Nú vill svo til að ríkið mun eiga rúman fimmtung Grímsstaða og hefur því rétt sameignaraðila, sem getur orðið aðhald fyrir nýjan erlendan eiganda. 

En hugsanlega er það ekki nóg og þá má spyrja, fyrst þessi erlendi maður hefur tröllatrú á möguleiknum sem fjárfesting í ferðaþjónustu gefur, hvort honum nægi ekki að eiga 49% jarðarinnar  úr því að hann telur eign á landi vera forsendu fyrir ferðaþjónustuinni. 

Við verðum að horfa langt fram á veginn, ekki bara niður á tær okkar, og velta fyrir okkur öllum möguleikum á framhaldinu. 

Dapurlegt er ef það fer þannig að það verður útlendingur sem sér betur möguleika nýrrar ferðaþjónustu hér en við sjálfir. 

Á að selja Grímsstaði?

Athugasemdir

[Landfari, 31.8.2011 kl. 17:44]

Sammála

[Jón Logi (IP-tala skráð) 31.8.2011 kl. 20:05]

Fyrst það þykir ekkert tiltökumál að sökkva landi til að festa orkusölu áratugi fram í tímann (og þannig er þegar búið að binda hvað, - 80% af þeirri orku sem framleidd er á landinu), þá sé ég ekkert að því að gera e-k leigusamning við kappann, ef að ríkið er tilbúið að ganga inn í kaupin þ.e.a.s. Það má líka binda skilmála í kaupsamning, t.d. endurkaupsrétt. Allt hægt.

Sé hans tilgangur sá sem hann segir, þá ætti hann ekki að koka á langtímaleigu frekar en kaupum.

Þetta er annars kyndugt allt saman. Þó að þetta séu kannski 20 milljarðar sem hann hyggst nota í startið á þessari FERÐAÞJÓNUSTU, eru þetta smápeningar á við það sem Íslenska ríkið hefur verið að veltast með sem ábyrgðaraðili í virkjanaframkvæmdum. En þarna gætu verið lúmskt mörg störf í kortinu, svo og mjög lítil eða engin röskun á umhverfi. Enda er það tilgangurinn, sé það satt sem kappinn segir.

Það væri því grátlegt ef þetta klúðraðist.

Það er líka skondið að sjá ESB sinna finna þessu allt til foráttu, því að ef aðild gengi eftir, þá væri þetta vísast hægt, og ef ekki Kínverji, þá alveg eins einhver önnur samsteypa frá.....Lux ? Belgíu? Þýskalandi?

ATH að Opel í Kaiserslautern tilheyrir GM í USA og Kastalinn í Lorelei tilheyrir eða tilheyrði Japana. Kínverjar kaupa nú í nokkrum stíl skóglendi í Þýskalandi til framtíðar. Ég er reyndar ekki viss hvort það er í Baden Wurtenberg eða Pfalz, - skiptir ekki máli.

Af sérstökum ástæðum hef ég oft slysast til þess að sitja til borðs með alls konar forstjórum og framámönnum erlendum, s.l. 20 ár eða allt að því. Var ég oft spurður hvort ekki væri hægt að kaupa eins og 1. stk dal á Íslandi sér til skemmtunar. Mér var skemmtun að því að segja að svo væri ekki. En nú er öldin önnur.

Ég veit um heilt svæði í erlendri eigu, og er ekki viss hvernig þar er háttað með aðgang innfæddra. Og svo slatta af bújörðum. Þetta er því ekkert nýtt, bara það stórt að menn vakna til vitundar.

[Bergþóra Sigurðardóttir (IP-tala skráð) 31.8.2011 kl. 20:05]

Ómar, Hvað er hægt að koma fyrir stórum flugvelli í landi Grímstaða?

[Sigurður Þorsteinsson, 31.8.2011 kl. 20:28]

Oft er það svo að oft verða til ,,slys" þegar málin hafa ekki verið skoðuð vel tímanlega. Hvað gæti gerst ef þessi kaup ganga eftir? Nú er tíminn til þess að spyrja spurninga. Við fáum ábendingar um að spyrja spurninga nú í erlendum fjölmiðlum. Nú ættu íslenskir fjölmiðar að taka málið upp. Það má vel vera að eftir slíkar spurningar þá væri niðurstaðan að þessi viðskipti séu fyllilega eðlileg og ekki þurfi að koma til fyrirvarar eða breytingar á lögum eða reglugerðum. Það er þá að vel hugsuðu máli. Þetta mál þarf einmitt að hugsa vel.

[Ingvi Rúnar Einarsson, 31.8.2011 kl. 20:40]

Ég er sammála þér,að það verði að koma skikk á þessa hluti.-Vatnalög þurfa vera að fullu afgreidd,áður en samþykki er veitt.-Allar veðsetningar á eignarhlut lands yrðu bannaðar.-(Brennt barn forðast eldinn.)Við verðum að geta sett það í lög,jarðir verði ekki veðsettar,líkt og óveiddur fiskur .-Það er annað mál með mannvirki,sem hugsanlega verði reist.

[Einar Karl, 31.8.2011 kl. 22:22]

Rétt hjá þér Ómar. Auðvitað skiptir ekki öllu máli í þessu samhengi hvort auðmaðurinn heitir Huang Nubo eða Björgólfur Thor.

Jörðin umtalaða er 300 ferkílómetrar, næstum jafnstór og allt Gazasvæðið. 0.3% Íslands. Tíu svona dílar og við höfum selt 3% landsins til fulltrúa Alþýðulýðveldisins.

Mínar hlugleiðingar hér: Hvað þýðir að eiga land?

[Ómar Ragnarsson, 1.9.2011 kl. 00:02]

Það er flugvöllur í landi Grímsstaða, sem er viðurkenndur og skráður í handbók Flugmálastjórnar. Hann kom í góðar þarfir þegar rúta valt í Hólsselskíl fyrir áratug, því að þyrla Landhelgisgæslunnar komst ekki norður (ég komst það reyndar) og hægt var að fá Twin Otter vél frá Akureyri til að sækja slasaða á Grímsstaðaflugvöll.

Þetta atvik og atvik þegar báðir hreyflar Fokker F50 misstu afl á leið til Egilsstaða fyrir nokkrum árum voru hvatning fyrir mig að merkja góðan flugvöll á náttúrugerðu flugvallarstæði á Brúaröræfum milli Kárahnjúka og Brúarjökuls. 

Það væri áreiðanlega hægt að gera miklu stærri flugvöll við Grímsstaði en er þar nú, ef nógu miklir peningar eru fyrir hendi. 

[Jón Logi (IP-tala skráð) 1.9.2011 kl. 00:23]

Ingvi Rúnar:

"Allar veðsetningar á eignarhlut lands yrðu bannaðar." & "Við verðum að geta sett það í lög,jarðir verði ekki veðsettar,líkt og óveiddur fiskur"

Má þá ekki líka banna allar veðsetningar með hluta í hverju sem er? Kynntu þér þetta aðeins betur.....Jörð er einfaldlega fasteign, mælanleg eftir hornapunktum, og á ekkert sammerkt með óveiddum fiski.

Annars, - það er gott flatlendi þarna við, og svo vestur um. Aðal-landslagið liggur í austur, og svo í suð-austur. En ekkert mál með flug þangað, þetta liggur það hátt. Þarna er hægt að gera völl fyrir 747 ef vill....

Austur um gangandi  lendir maður þess vegna í Jökuldal, og svo niður í Vopnafjörð. Líka hægt að villast um "haug" og enda þar í endalausum ranghölum sem mörgum hafa grandað í fjallferðum á öldum áður.

Suður um stefnir maður á Vatnajökul.

Þetta miðast við göngu eða jeppa/fjórhjól. Í flugfæri eru tækifærin endalaus eins og Ómar mun/hefur bent á. 

Þetta er sjálfsagt það sem kínakappinn er að spá í, ásamt næði fyrir hina moldríku. Það hefur jú komið til tals að reisa geimstöðvarhótel svo að eitthvað sé nefnt. Svona hótel á Íslandi býður upp á furðu stuttar vegalengdir fyrir ýmsa. Jöfr frá Rússlandi og Austurlöndum, og feimnar kvikmyndastjörnur. Þetta er ódýrara en að búa til eyju í Dubai...

[Ómar Ragnarsson, 1.9.2011 kl. 14:13]

Ákvæði um eignarhald útlendinga sambærileg við þau sem gilda um eignarhlut þeirra í sjávarútvegsfyrirtækjum myndu gera þetta mál viðráðanlegra.

Hugsa mætti sér að Huang Nubo eignaðist 49% hlut í jörðinni Grímsstaðir og að íslenska ríkið yki hlut sinn úr 22,5% þannig að 51% jarðarinnar yrðu í eigu Íslendinga. 

Kannski hugsar Nubo eins og Íslendingar hafa löngum gert að vilja frekar eiga hluti en leigja þá, til dæmis fasteignir og farartæki.