Tvísaga Trump.

Donald Trump barði sér mjög á brjóst í kosningabaráttunni í fyrrahaust, sagðist hafa verið á móti árás Bandaríkjamanna og Breta á Írak 2003 og að hún og síðar stuðningur Baracks Obama við uppreisnina gegn Assad Sýrlandsforseta hafi verið svo forkastanleg, að í raun sé efnavopnaárás Assads í Idlib-héraði Obama að kenna! 

Nú lætur Trump Bandaríkjaher gera árás í Sýrlandi á þá herstöð, sem talið sé að efnavopn Sýrlandshers hafi komið frá, en þess er sérstaklega getið, að varast hafi verið að ráðast á meinta efnavopnageymslu þar. 

En vörn Sýrlandsher varðandi skelfilegar afleiðingar efnavopna í árás hersins um daginn, er einmitt sú að uppreisnarmenn hafi geymt þar efnavopn, sem hafi sprungið í árásinni. 

Sem sagt: Að uppreisnarmenn hafi haft efnavopn undir höndum, sem Obama beri ábyrgð á að hafi verið þar!  

Eins og í mörgu hefur Trump orðið margsaga einu sinni enn, flækir málið og gerir það hættulegra, og gerir nú Rússum og Pútín gramt í geði, sem segja, að með þessu hafi forsetinn staðið að árás á sjálfstætt ríki. 

Þar að auki þykir það vafasamt heima fyrir, að þetta var gert án vitneskju þingsins. 

Á sama tíma sem Trump hefur verið að vingast við Pútín, reitir hann Rússlandsforseta til reiði. 

Hernaðarbrölt Trumps og orð og gerðir hans allt eru fullar af hættulegum mótsögnum.  

 

Bandaríkin gerðu árás í Sýrlandi

Athugasemdir

[Þorsteinn Briem, 7.4.2017 kl. 17:40]

Rússar gerðu sjálfir árás nýlega á sjálfstætt ríki og innlimuðu hluta þess, Krímskaga, í Rússland.

Þeir hafa því engan ástæðu til að vera reiðir eða hneykslaðir í þessum efnum.

[Þorsteinn Briem, 7.4.2017 kl. 18:12]

"Þeir hafa því enga ástæðu til að vera reiðir eða hneykslaðir í þessum efnum," átti þetta nú að vera, áður en "Þorvaldur hinn síreiði S" kemst í málið.