Miðaldafyrirkomulag sægreifa og leiguliða í sjávarútvegi.

Að hluta til ríkir miðaldakerfi í sjávarútvegi á Íslandi þar sem eru orðnar til stéttir aðalsmanna og leiguliða, annars vegar sægreifanna, sem eru handhafar auðlindarinnar, og hins vegar þeirra sem verða að leigja kvóta af þeim á uppsprengdu verði. 

Einhvern veginn verður að að byrja að losa um þessar viðjar sem eiga ekki heima á 21. öld. 

Þorsteinn Pálsson á að baki mikla reynslu en jafnframt það að hafa staðið nógu lengi til hliðar við  pólitískt argaþras til að geta laðað fram í krafti traustvekjandi persónuleika síns sátt eða í það minnsta löngu tímabærar útbætur á vettvangi sjávarútvegsmála. 

Þorsteinn Pálsson leiðir nefndina

Athugasemdir

[Hábeinn (IP-tala skráð) 9.5.2017 kl. 01:38]

Að hluta til ríkir miðaldakerfi í húsnæðismálum á Íslandi þar sem eru orðnar til stéttir aðalsmanna og leiguliða, annars vegar eignaaðalsins, sem eru handhafar fasteignanna, og hins vegar þeirra sem verða að leigja af þeim á uppsprengdu verði. Einhvern veginn verður að að byrja að losa um þessar viðjar sem eiga ekki heima á 21. öld.

Að hluta til ríkir miðaldakerfi í landbúnaði á Íslandi þar sem eru orðnar til stéttir aðalsmanna og leiguliða, annars vegar eignaaðalsins, sem eru handhafar jarða, og hins vegar þeirra sem verða að leigja af þeim á uppsprengdu verði. Einhvern veginn verður að að byrja að losa um þessar viðjar sem eiga ekki heima á 21. öld.

Að hluta til ríkir miðaldakerfi í samgöngumálum á Íslandi þar sem eru orðnar til stéttir aðalsmanna og leiguliða, annars vegar eignaaðalsins, sem eru handhafar ökutækjanna, og hins vegar þeirra sem verða að leigja af þeim á uppsprengdu verði. Einhvern veginn verður að að byrja að losa um þessar viðjar sem eiga ekki heima á 21. öld.

Fyrir daga kvótakerfisins ríkti miðaldakerfi í sjávarútvegi á Íslandi þar sem voru stéttir aðalsmanna og leiguliða, annars vegar sægreifanna, sem eru áttu skip og báta, og hins vegar þeirra sem urðu að leigja tækin af þeim á uppsprengdu verði. 

Það vill svo til að margt er leigt. Það er ekki tímaskekkja og kemur miðöldum ekkert við. Yfir 95% kvóta greifanna eru verðmæti sem þeir hafa keypt. Keypt eins og hús, bíl, jarðir eða skip. Innan við 5% af kvótanum er enn í eigu þeirra sem fengu gefins kvóta. Það er undarleg sú krafa að menn láti frá sér verðmæti sem þeir borguðu fyrir án endurgjalds og sú hugsun að leiga á verðmætum sé tímaskekkja.

[Þorsteinn Briem, 9.5.2017 kl. 01:51]

"1. gr. Nytjastofnar á Íslandsmiðum eru sameign íslensku þjóðarinnar."

"Úthlutun veiðiheimilda samkvæmt lögum þessum myndar ekki eignarrétt eða óafturkallanlegt forræði einstakra aðila yfir veiðiheimildum."

Lög um stjórn fiskveiða nr. 116/2006