Trump í klípu í Sýrlandi.

Donald Trump fór mikinn í kosningabaráttu sinni fyrir forsetakosningarnar 2016 þegar hann fordæmdi Barack Obama og Hillary Clinton fyrir stefnu þeirra á málefnum Sýrlands. 

Hann gekk svo langt að segja og endurtaka það meira að segja, að Hillary og Obama væru meðal stofnenda Íslamska ríkisins. 

Ekki slapp George W. Bush forseti og flokksbróðir Trumps undan gagnrýni hans því að ef nokkur Bandaríkjaforseti átti þátt í því að skapa jarðveg fyrir ISIS var það hann með innrásinni í Írak. 

Bush yngri skellti skollaeyrum við aðvörunarorðum rágjafa, sem faðir Bush hafði tekið mark á, þess efnis að með innrás væri verið að leysa úr læðingu öfl sem enginn sæi fyrir hvaða usla gætu valdið. 

Svipað mátti raunar segja um "Arabíska vorið 2011" þótt ósvífið hafi verið að taka Hillary og Obama út úr og stimpla þau sem stofnendur ISIS. 

Trump lofaði kjósendum 2015 að taka upp breytta stefnu í stað þeirra sem hefðu kostað Bandaríkjamenn gríðarlegar fjárhæðir vegna hervæðingar. 

En hann var varla kominn í embætti fyrr en hann boðaði stóraukin útgjöld til hermála og í Sýrlandi eru Kanarnir í mikilli klípu. 

Rússar hafa löngum verið gagnrýndir fyrir staðfastan stuðning sinn við Assad Sýrlandsforseta, en það hefur hins vegar einfaldað aðstöðu þeirra, - það hefur alltaf verið og verður alltaf vitað hvar Rússarnir standa. 

Ef af innrás Tyrkja í Kúrdahéruðin verður, og her Assads tekur á móti, er Trump í vanda. 

NATO ríki komið í hernaðarátök við land, þar sem skjólstæðingur Rússa er við völd. 

Flækjustigið er reynar miklu flóknara en þetta, og eins gott að Trump eigi góða ráðgjafa og hlusti vel á ráð þeirra. 

Þjáningar jukust á meðan beðið var

Vekur athygli að komast í 60 mínútur.

Fáir fréttatengdir sjónvarpsþættir eru þekktari en 60 mínútu þátturinn hjá CBS.

Við þáttinn hefur alla tíð starfað sjónvarpsfólk í fremstu röð en síðustu misserin hafa orðið nokkur kynslóðaskipti við fráfall eða fráhvarf sumra af þekktustu og reyndustu burðarása þáttarins. 

En maður kemur í manns stað. 

Miklar innri kröfur um fagleg vinnubrögð í hæsta gæðaflokki hafa lengi einkennt þáttinn og vinnsluna á honum og því er afar forvitnilegt um hvað Anderson Cooper er að vinna við í Íslandsheimsókn sinni. 

Eins og ævinlega getur það skipt máli fyrir land og þjóð að komast í sviðsljós fjölmiðla heimsins, ekki síst þegar jafn þekktur þáttur og 60 mínútur á í hlut. 

Er þess skemmst að minnast, að gosið í Eyjafjallajökli og mikil umfjöllun um Ísland á meðan á því stóð og fyrst á eftir, skóp grundvöllinn af einhverri mestu uppsveiflu í íslenskum efnahagsmálum í sögu landsina í formi margfalt fleiri ferðamenna en nokkurn óraði fyrir. 

Cooper ásamt 60 minutes á Íslandi

Viðfangsefnið: 50 þús.fleiri bílar eftir 22 ár en nú?

Samgöngukerfi Reykjavíkur þekur þegar 50% af flatarmáli byggðarinnar. Ef fjölga á íbúum um þriðjung á höfuðborgarsvæðinu, eða um 70 þúsund, mun bílum að óbreyttu fjölga um minnst 50 þúsund, og það stóra bíla ef marka má bílaauglýsingar blaðanna. Það dæmi gengur ekki upp að óbreyttu. 

Að sjálfsögðu verður að spýta í lófana varðandi gerð mislægra gatnamóta og annarra umbóta á gatnakerfinu, þótt ekki væri nema til að auka öryggi, en augljóst er að fleira þarf til, því að það er einfaldlega ekki til flatarmál fyrir alla þessa fjölgun bíla og vaxandi kröfur um að þeir séu sem stærstir og lengstir. 

Þess vegna þarf aðgerðir til aukinna afkasta miðað við rými. 

1. Endurskipulag gatnakerfisins til að auka flæði, að þvi takmarkaða leyti sem það er hægt. Nýjar leiðir eins og Sundabraut o. fl.

2. Fleiri stuttir bílar. Dæmi: 100 þúsund bílar fara um Miklubraut um Ártúnsbrekku. Ef meðallengd þeirra styttist um 50 sentimetra  að jafnaði, úr 4,6 metra meðallengd niður í 4,1, (úr Passat niður í Póló)  verða 50 kílómetrar, sem nú eru þaktir bílum á degi hverjum, auðir á hverjum degi. Þessu má ná með ívilnandi aðgerðum sem miðast við lengd bíla. Því minna rými, sem bíllinn tekur, því minna borgar sá sem um borð er fyrir afnotin af takmarkaðri lengd götunnar/vegarins. Og öfugt. 

2. Fleiri hjól, reiðhjól og vélknúin hjól og brýr og nýjar leiðir fyrir þau. Hvert hjól býr til rýni fyrir einn bíl, sem annars hefði ekki pláss. Eftir þriggja ára reynslu mína á þessu sviði hef ég staðið sjálfan mig að fordómum gegn þessum samgöngumáta, sem mynduðust í þau 55 ár, sem ég var ekki á hjóli.  

3. Almenningssamgöngur, strætó og Borgarlína í rólegri en markvissri þróun þar sem þess er gætt, að þessi samgöngumáti losi meira rými en það tekur upp  varðandi pláss hvers vegfarenda.  

Borgarlínan hápólitískt álitaefni

Önnur golfkona íþróttamaður ársins næst?

Fyrir örfáum misserum hefði sá, sem hefði spáð því að golfkona yrði valin íþróttamaður ársins 2017 verið álitinn léttgeggjaður. 

Hvað þá ef hann hefði spáð því að önnur golfkona yrði íþróttamaður ársins árið á eftir og tvær konur yrðu þá meðal tíu tilnefndra til verðlaunanna. 

Valdís Þóra Jónsdóttir og Ólafía Þórunn Kristinsdóttir varpa nú saman ljóma á landið á firnasterku alþjóðlegu golfmóti og sýna fram á þegar vilji og geta fara saman, geta órafengnir draumar ræst.  

Valdís þriðja og Ólafía með frábæran hring

Nýjasta virkjanaæðið: Eftirsókn eftir vindi og sæstreng.

Nýlega notaði forstjóri Orku náttúrunnar orðið "virkjanaæði" um það ástand, sem ríkti hér á landi í orkumálum. 

Nú stingur nýjasta tegund þess upp kollinum: Risavaxin vindorkuver. 

Stórbrotnar hugmyndir um þau spretta ekki upp af tilviljun. Nokkur áhrifaatriði má nefna: 

1.

Óheyrilegar háar orkutölur og eftir því gróðavon. Stærsta vindorkuver heims á að rísa vestarlega í Kína, langt inni á meginlandi Asíu og geta afkastað 20 þúsund megavöttum, sem er álíka mikið og 30 Kárahnjúkavirkjanir.

Vindorkuverið, sem fyrir liggur í viljayfirlýsingu sveitarstjórnar Dalabyggðar og eigenda jarðarinnar Hróðnýjarstaða, skammt frá Búðardal, að skuli verða sett á skipulagið þarna, á að hafa allt að 130 megavatta uppsett afl.

Það er litlu minna en afl stórvirkjunarinnar Blönduvirkjunar, sem er 150 megavött. Landvernd minnist á "sambærileg svæði" og verndarsvæði og þessi 40 mastra skógur af 150 metra háum möstrum á Hróðnýjarstöðum mun sjást frá mestallri Hvammssveit í því héraði landsins sem býr yfir hvað mestum sagnaslóðum. 

Vindorkugarðar voru fegraðir mjög á fundi í Dalabúð á dögunum, hávaðinn í myllunum sagður ekki meiri en frá ísskáp og þegar horft væri lóðrétt niður á myllurnar, sýndust þær mjög smáar!  

2. 

Virkjanasprengja.  Virkjanahugmyndir, jafnvel á virkjunarkostum í verndarflokki, hrúgast inn í tugum.  Fyrir liggur yfirlýsing forstjóra Landsvirkjunar á aðalfundi fyrirtækisins fyrir þremur árum um að fyrir árið 2025 verði búið að tvöfalda raforkuframleiðslu Íslands frá því sem nú er. Það þýðir, að 2025 framleiddum við tíu sinnum meiri raforku en við þurfum til okkar eigin heimila og fyrirtækja. Les: Stóriðja. 

3. 

Sæstrengur. Forstjóri Landsvirkjunar sagði líka á fyrrnefndum fundi að það væri ekki spurning um hvort, heldur hvenær lagður yrði sæstrengur milli Íslands og Skotlands. 

Þetta tengist þeim ágalla vindorkuvera að vera afllaus í logni og sæstrengur hefði gríðarlega þýðingu fyrir stórfella vindorkuvæðingu Íslands, því að þá yrði hægt að selja vindorku til Evrópu hvenær sem væri, sem er mikill munur miðað við það að geta aðeins selt Landsvirkjun takmarkað magn sem passar við sveiflujöfnun í lónum hennar.  

Allt tal um að hægt yrði að safna á rafhlöður orku vindorkuvera á við margar Kárahnjúkavirkjanir er út í hött, svo mikið af rafhlöðum þarf til að geyma svona mikla orku. Til samanburðar má nefna að rafbílavæðing landsins felur aðeins í sér um að ræða örfá prósent af orkuframleiðslu landsins og samt er rætt um vandamál varðandi rafgeymana sem þarf fyrir bílana. 

 

Vindorkuver rísi ekki á verndarsvæðum

Tökum Kanann á þetta: Hver græðir?

"Hver hagnast? Hver græðir?" spurðu Rómverjar þegar glöggva þurfti sig á málum og upplýsa þau. 

Banaríska útgáfan er: "Follow the money." Rekið slóð peninganna. 

Hver græðir á sölu stórvirkra skotvopna eins og notuð voru við fjöldamorðin í Flórída og Las Vegas: 

Svar: Vopnaframleiðendur, vopnasalar og byssugleðimenn. 

Hver græðir á því ef að krafan verður að kennarar og lögreglumenn við skólana verði vopnaðir jafn afkastamiklum hríðskotabyssum og fjöldadráparar, af því að augljóst var að lögreglumaður fyrir utan skólann hefði gengið út í opinn dauðann á móti yfirburðum fjöldamorðingjans í vopnaburði?

Svar: Vopnaframleiðendur, vopnasalar og byssugleðimenn. 

Höldum áfram með "follow the money": 

Hver græðir á því að öflug samtök vopnaframleiðenda, vopnaslar og samtök skotglaðra byssueigenda moka jafnvirði milljarða íslenskra króna í að styrkja bandaríska stjórnmálamenn fjárhagslega: 

Svar: Spilltir þingmenn. 

Og þar með er slóðin komin á gamalkunnugt svið: Hið baneitraða samband stjórnmála og viðskipta. Spillt stjórnmál í sinni grimmustu mynd. 

En siðblindan í öllu sést síðan á því, að fulltrúi byssuglaðra sakar þá, sem vilja hamla gegn þessu brjálæði um að draga málið niður í pólitískt svað.  

Aðhafðist ekkert er árásin var í gangi

Þrjár ástæður og víða örtröð.

Sagan af holunni í Mosfellsbæ og örtröð á verkstæðum vegna sprunginna dekkja er ekkert einsdæmi þessa umhleypingadaga. 

Ég átti leið á dekkjaverkstæði í miðri Reykjavík á mánudag og þriðjudag og þar var örtröð bílstjóra með sprungin dekk eftir að hafa lent í holum. 

Ástæðurnar eru nokkrar: 

1.

Tískan, harður húsbóndi.  Bílaeigendur láta blekkjast af auglýsingum um ágæti þess að felgur séu stórar og halda að það þýði þykkari dekk.

En þetta er öfugt, stærri felgum hefur fylgt að dekkin verði lægri og breiðari, þannig að hér á árum áður, þegar hæð dekkja frá götu upp í felgu var í kringum 16 sentimetrar á meðalstórum bílum, er þessi hæð dottin niður í minna en 10 sentimetra. Dekk sem er af stærðinni 175/55-15, þ. e. 15 tommu felga og dekk sem er 17,5 sentimetra breitt, tæplega 7 tommur, líta töff út, en þá gleymist að talan 55, þýðir hlutfallið á milli breiddar og hæðar dekksins er 55 á móti 100, þ.e, 175x55 eru 9,5 sentimetrar.

Ytra ummál dekks á svona 15 tommu felgu er 15 plús 7,5 tommur eða 22,5 tommur. 

Til samanburðar var dekk á 13 tommu felgu af stærðinni 6,40 x 13 eða 25,8 tommur. Og dekkið 6,4 tommu hátt frá jörð upp í felgu, en aðeins 3,8 tommur frá jörðu upp í felgu á stærðinni 175x55.    

2. 

Skammsýnis sparnaður við það að hafa malbikið aðeins 5 sm þykkt. Til samanburðar er malbikið á flugbrautum Reykjavíkurflugvallar 10 sentimetra þykkt. 

3. 

Önnur skammsýni, lélegt efni í slitlaginu. 

Tugir bíla skemmdust í sömu holu

Misjafnir tossalistar. Fjölga byssum til að minnka dráp með þeim?

Svonefndir tossalistar segja misjafnar sögur af þeim sem nota þá. Vafasamt er að tossalisti Trumps á fundi með eftirlifendum skotárásarinnar hafi orðið honum til framdráttar, vegna þess hvert innihald hans var. 

Og merkilegt er að forsetinn skyldi snúa listanum að viðstöddum og þeim myndavélum, sem voru á staðnum, en ekki að sjálfum sér. 

Sýnir merkilega sjálfhverfu að því leyti, að engu er líkara en að hann hafi haldið, að af því að hann sá ekki hvað stóð á honum, myndi listinn koma betur út fyrir hann en ella, en í staðinn gaf hann færi á að flestir aðrir en hann sæu hann og undruðust, hvað á honum stóð. 

Tossalistar hjá Bandaríkjaforsetum er svosem ekki nýtt fyrirbrigði. 

Þekkt varð það, þegar aðstoðarmenn gaukuðu litlum miða að Ronald Reagan Bandaríkjaforseta, þegar hann var í kvöldverðarboði hjá Íslendingum, en á þeim miða stóð að hann ætti ekki að gleyma loftferðasamningum BNA og Íslands og ívilnunum Kana varðandi Icelandair. 

Þetta misheppnaðist alveg. Reagan skildi hvorki upp né niður í því sem stóð á miðanum, enda kom síðar í ljós að hann var kominn með fyrstu einkenni Alzheimerssjúkdómsins sem varð honum síður að aldurtila. 

Það er táknrænt fyrir stefnu meirihluta á Bandaríkjaþingi og Donalds Trumps, að koma fram með tillögur um að vopna bandaríska kennara, en einmitt það mun að sjálfsögðu stórauka sölu á skotvopnum vestra og gagnast þeim, sem bera fé á bandaríska þingmenn með himinháum styrkjum til þess að fá þá til að ganga erinda byssuframleiðenda. 

 

Tossalisti Trumps vekur athygli

Aukið aðgengi skapar aukna notkun.

Eitt af viðurkenndum og marg prófuðum grundvallaratriðunum í meðferð fíkni- og vímuefnasjúklinga svo að þeir geti haldið sé frá neyslu þeirra, er að þeir forðist þá staði og aðstæður þar sem fíknin æsist upp. 

Því víðar og því meira sem aðgengið er, þeim mun meiri hætta á neyslu. 

Þetta á augljóslega líka við byssusjúka menn og það er ótrúleg staðhæfing hjá forseta Bandaríkjanna að mikið og áberandi framboð á stórvirkum stríðstólum hafi ekkert að segja í þessum efnum, morðóðir menn muni samt drepa fólk.  

Eins og fjöldamorðinginn í Las Vegas var gott dæmi um, réði aðgengi hans að stórvirkum morðvopnum mestu um það hve marga hann drap.

Þegar morðfíknin byggist á því að drepa sem flesta, ræður afl og stærð fáanlegra morðvopn mestu um það hve langt morðinginn kemst.  

 

„Hún var myrt í síðustu viku“

Olían orðunum sterkari.

Margar stórar yfirlýsingar voru gefnar á Parísarráðstefnunni 2015 og mörg sterk orð skrifuð á blöð. En þegar um eins mikla freistingu og aukna notkun olíu er að ræða, hrökkva orð og skjöl skammt. 

Dæmisagan um Litlu gulu hænuna svífur yfir vötnum. Í aðeins þremur ríkjum Asíu, Kína, Indlandi og Indónesíu, býr tæpur helmingur mannkyns. 

Þar er rík tilhneiging til að iðnvæða og neysluvæða þjóðirnar svo að þær geti fengið sinn skerf af takmörkuðum auðlindum jarðar í áttina að bruðli hinna vestrænu þjóða, sem hafa notið uppgripa og neyslu olíualdarinnar á undan þeim. 

Þegar notkun olíu er skoðuð og sett sem hluti af línuriti yfir aldirnar, steinöld, bronsöld o.s.frv., verður línan yfir orkunotkun olíualdarinnar eins og risavaxinn spjótsoddur upp og síðar niður þegar olían þverr á öld, sem er aðeins brotabrot í tímalengd af öðrum þróunaröldum mannkynsins. 

Vegna sívaxandi kröfuharðs mannfjölda verður neyslan samtals svo gríðarmikil þegar þessar þjóðir seilast í olíuauðinn. 

Þótt bílarnir, sem til dæmis Indverjar eru að þróa, sýni mikla hugkvæmni í nýtni á rými og orku, er þess að gæta, að þessir stuttbílar eða örbílar koma í staðinn fyrir milljónir vélhjóla, og eyða því meiri orku og auðlindum en vélhjólin þegar aðeins einn er um borð. 

Myndin hér að ofan er af einum af nýjum indverskum bílum með mikla nýtni á rými, Bajaj Qute að nafni. Til að hægt sé að koma fjórum fullorðnum fyrir í svona bíl, sem er aðeins 2,75 m langur og 1,31 m breiður, og með örlítilli vél, 13 hestafla 217 ccc, aðeins 400 kíló á þyngd, verður að hafa hann svo háan, að þeir sem eru frammi í, þar á meðal bílstjórinn sitji í nógu háum sætum frá gólfitil þess að fótleggirnir séu lóðréttir og spari þannig hálfan metra í gólfrými. 

Þetta virkar hlægilegt farartæki, en umferðaröngþveiti indverskra stórborga er áhrifamikil útskýring. 

Olíuotkun áfram í vexti næstu 20 árin