Hetjuleg frammistaða, munaði grátlega litlu.

Síðasti leikur Íslands á HM var afrek af liðsins hálfu. Í 70 mínútur lék þetta lið líkt og því væri frekar spáð sigri á HM en Króötum, sem hafa verið taldir líklegir til að ná í verðlaunasæti. 

Þegar rykið verður sest munu leikurinn við Argentínu, barátta liðsins allt til enda og frammistaða íslensku áhorfendanna verða lengi í minnum haft. 

Liðið kom inn í lokakeppnina með tvo öfluga lykilmenn sína búna að vera í meiðslum vikum og mánuðum saman og rétt ná að sleppa inn á mótið, auk þess sem hinn þriðji, Jóhann Berg, meiddist og missti af leiknum við Nígeríu. 

Horfum fram og tökum myndarlega á móti þeim þegar þeir koma heim! 


mbl.is Ísland úr leik á HM
Tilkynna um óviðeigandi tengingu við frétt

Einfeldni Trumps, Harley-Davidson var þegar byrjað á breytingum.

Þótt Harley-Davidson hafi verið og sé enn eitthvert sterkasta tákn Bandaríkjanna í smíði á farartækjum, sýnir undrun Trumps á ákvörðunum þess að "gefast upp" og færa hluta framleiðslu sinnar úr Bandaríkjunum, skammsýni og fáfræði forsetans.

Hann hélt að leiðin til að gera Bandaríkin voldug á ný væri að reisa tollamúra til að verjast því að framleiðslan í landinu stóðst ekki því besta innflutta snúning.Harley Davidson 750

Viðbúið var að þær þjóðir, sem tollaárásin var gerð á, myndu svara henni.   

Á síðustu misserum hefur reyndar hið gróna og fræga fyrirtæki verið að fikra sig áfram með breytingar, sem Trump hefði átt að fylgjast með. 

Meðal annars sækja vatnskældar gerðir á hjá verksmiðjunumm, Harley byrjaði fyrir tveimur árum að framleiða  750 cc hjól sem er minna og ódýrara en gengur og gerist um Harley, og það hafði hafið framleiðslu á þessari gerð af Harley-Davidson á Indlandi. 

Hjólið er léttara en önnur hjól frá fyrirtækinu og myndi hér á landi kosta hálfri milljón króna minna en ódýrasta Harley-hjólið hingað til. 

Aðdáendur Harley-Davidson tala um að ákveðinn "lífsstíll" fylgi þessum hjólum og tryggðin við þau hefur verið mikil. 

En samkeppnin á alþjóðamarkaði er afar hörð og það er ekki um annað að ræða fyrir hið gróna bandaríska fyritæki en að gera framleiðsluvöruna fjölbreyttari og samkeppnishæfari. 

Í Evrópu hafa þessi hjól selst það vel, álíka vel og t.d. Yamaha, Kawasaki og KTM, og það er mikilsvert fyrir verksmiðjuna að halda sessi sínum þar. 

Dýrustu hjólin kosta sem svarar tíu milljónum króna og eru lúxusfarartæki. 

Ákvörðun Trumps hefur eingöngu hraðað þessari þróun hjá Harley-Davidson og veldur því að mun fleira starfsfólk fyrirtækisins missir vinnuna í Bandaríkjunum en ella hefði orðið.  


mbl.is Flytur hluta starfseminnar frá Bandaríkjunum
Tilkynna um óviðeigandi tengingu við frétt

"Það getur allt gerst í beinni útsendingu..."

Þessi orð Agnesar Bragadóttur á spennuaugnabliki í þættinum "Á líðandi stundu" 1986 voru hent á lofti af mörgum. 

Ekki hefur þurft annað en að gjóa augunum á sjónvarpsskjáinn undanfarna daga til að sjá ótrúleg atvik, eins og til dæmis það, hve litlu munaði að Marokkó og Íran slægju út stórveldin Spán og Portúgal í gær. 

Þýsk nákvæmni birtist með eftirminnilegum hætti í ótrúlegri aukaspyrnu á lokamínútu, sem sópaðði öllum þremur stigum leiksins til meistaranna frá HM 2014. 

Í leikjum Íslands, hliðstæðum þeim sem fer fram í dag á milli Króatíu og Íslands, hafa úrslit orðið á ýmsa vegu og gangur leikja ekki síður, samanber leikurinn við Englendinga á EM. 

Þess vegna er bara að senda strákunum fjöldaskilaboð með "essemmessi" hugaraflsins í kvöld. 


mbl.is Svona vinnum við Króata í kvöld
Tilkynna um óviðeigandi tengingu við frétt

"Rigningarsumarið mikla" 1955.

Hið afbrigðilega veðurfar í maí og júní er alls ekkert einsdæmi. 

"Rigningasumarið mikla" 1955 verður lengi í minnum haft og hægt verður að minnast þess við mörg tækifæri þegar svipuð fyrirbæri láta á sér kræla. 

Eins og þessa dagana var rigningunni misskipt, en bara miklu lengur, ekki aðeins hér á landi, heldur líka erlendis, því að þegar suðlægar og rakar vindáttir blésu, var rignining sunnanlands en bjart veður norðanlands og enn bjartara og hlýrra í Norður-Evrópu. 

Þetta eindæms veðurlag stóð mestallan heyskapartímann og varð til mikilla leiðinda á rigningarsvæðunum. 

Í Danmörku fékk þetta sumar hins vegar heitið góðviðrissumarið mikla, því að þar var hálfgert sólarlandaveður þann tíma, sem rigningin plagaði sunnlenska bændur og meiri hluta Íslendinga sem mest. 

Ég var svo heppinn að dvelja í sex vikur í Kaupmannahöfn einmitt þennan tíma með um þrjátíu öðrum íslenskum skólakrökkum víða að af landinu, sem þangað voru boðnir til að vera á dönskum heimilum í boði Kola- og stálsambandi Evrópu", en dvölin endaði með heilmikilli alþjóðlegri æskulýðsráðstefnu. 

Við sluppum því við rigningarsumarið mikla heima og nutum hins gagnstæða í Höfn.  


mbl.is Landið klofið með tilliti til veðurs
Tilkynna um óviðeigandi tengingu við frétt

Spurningin um J.R., sem sagði svo mikið um Dallas-þættina.

Án persónunnar J.R. og leiks Larry Hagmans sem þessi skúrkur hefðu Dallasþættirnir varla fengið þann skerf af áhorfi og umtali, sem þeir fengu. 

Ég minnist þess að á þessum árum miðuðust flestar áhorfstölur við áhorfi á Dallas, sem náði 75 prósentum, sem væri líklega ómögulegt núna. 

Þó gerðist það einu sinni 1985 að Stiklu-þáttur við Eyjafjörð með Árna Tryggvason á báti sínum í Hrísey komst í sömu tölu. 

J.R. var persóna sem hafði þann stóra kost varðandi athygli og umtal, að allir gátu elskað að hata hann. 

Sumir af vinsælustu íþróttamönnum sögunnar voru með svona eiginleika, eins og til dæmis Michael Schumacher kappakstursmaðru. 

Það er lítið dæmi um ýmislegt fáránlegt í kringum Dallas-þættina, svo sem í kringum spurninguna, sem brann á allra vörum um víða veröld: Hver skaut J.R.?

Hún var einmitt á allra vörum þegar Helga konan mín fór í einnar viku ferð úr landi, en þá voru Dallasþættirnir sýndir þar einni viku á undan sýningunum á Íslandi.

Þegar Helga kom heim var hún ekki alveg viss á þessu atriði, en vildi þó komast að því, svo lítið bæri á. 

Hún spurði því: "Er J.R. ennþá dauður?" og uppskar lítið þakklæti þeirra, sem hún spurði.  

 

 


mbl.is Hvernig myndi Ewing hitta okkur í dag?
Tilkynna um óviðeigandi tengingu við frétt

Ókostur mannfæðarinnar.

Ein af ástæðunum fyrir því, hve mikla undrun furðu langvarandi velgengni íslenska landsliðsins í knattspyrnu hefur verið, er sú að að öðru jöfnu eiga þjóðir, sem eru hundrað sinnum eða þúsund sinnum fjölmennari en við meiri möguleika á að finna afburða hæfileikafólk en við. 

Þjóðverjar eru til dæmis 250 sinnum fleiri en við, og hjá slíkum þjóðum getur heill landsliðshópur verið skipaður mönnum, sem allir spila með frægustu liðum heims, sem berjast um toppinn í öflugustu úrvalsdeildunum. 

Í íslensku fótboltalandsliði geta í mesta lagi verið þrír til fjórir slíkir menn, en það þýðir að þeir verða helst allir að vera heilir og í sínu besta formi í hverjum leik. 

Hjá okkar liði vill svo til að þrír burðarásar liðsins hafa allir orðið á glíma við meiðsli á þessu ári, nú síðast Jóhann Berg. 

Langvarandi fjarvera landsliðsfyrirliðans Arons Einars kom honum í koll í hitaleiknum við Nígeríumenn og við Aron er ekki að sakast í því efni. 

Engin þjálfun kemur algerlega í staðinn fyrir leikþjálfun. 

Breiddin inni á vellinum er því ekki aðeins erfitt viðfangsefni fyrir íslenska landsliðið, heldur ekki síður breiddinn á bekknum. 

Langflest liðin á HM núna hafa mun meiri breidd leikmanna en við, til dæmis bæði Króatía og Belgía, svo að dæmi séu nefnd.

Á ferli íslenska liðsins hafa Lars Lagerback og síðar Heimir Hallgrímsson spilað afburða vel úr sínum spilum, og vonandi tekst það í leiknum á morgun. 

 


mbl.is Ókostur fyrir okkur
Tilkynna um óviðeigandi tengingu við frétt

Hve langt getur hinn nýi siður gengið?

Þegar tóbaksreykingar jukust jafnt og þétt um miðja síðustu öld, einkum hjá konum, var mönnum ekki ljós skaðsemi þeirra. Framleiðendurnir héldu því blákalt fram, til dæmis í yfirheyrslum þingnefndar Bandaríkjaþings, að þær væru algerlega skaðlausar, og gerðu allt sem í þeirra valdi stóð til að auka söluna. 

Þeir fengu helstu Hollywoodstjörnurnar til að auglýsa retturnar sem hreystimerki. 

Þegar söm stjörnurnar fóru að hrynja niður úr lungnakrabba, svo sem töffarinn mikli Humphrey Bogart og söngvarinn Nat King Cole, forhertust tóbaksframleiðendur og nýtt sér fjárhagslegt bolmagn sitt til að seinka eða koma í veg fyrir að hið sanna kæmi í ljós. 

Til dæmis kom það afar seint fram hve skaðvænlegar óbeinar reykingar væru. 

Með þessu stuðluðu þeir beinlínis að ótímabærum sjúkdómum og dauðdaga hjá milljónum manna. 

Á okkar tímum eru vísindalegar rannsóknir á heilsufarslegum atriðum mun betri en áður var. 

Þó sýnir ópíuóðalyfjafaraldurinn að fjársterkir framleiðendur heilsuspillandi efna geta komið í veg fyrir það svo skipti áratugum, að skaðsemi slíkra efna komi fram, því að lengi vel voru þessi lyf auglýst með "vísindarannsóknum" sem sýndu að þau væru ekki ávanabindandi, heldur þvert á móti töframeðöl sem minnkuðu notkun fíkniefna. 

Í ljósi þessa er nauðsynlegt að sannreyna það sem best að rafretturnar séu skaðlausar eða að minnsta kosti svo margfalt skaðlausari en sígarettur að það sé talið að sá fórnarkostnaður í fjármunum og fíkn, sem gjalda þarf með samfelldri aukningu á notkun þeirra, langt umfram naúðsynlega notkun þeirra, sem eru að hætta að reykja, sé ekki talin ástæða til afskipta. 

Fróðlegt verður að sjá, hve lengi hin stórvaxandi notkun rafretta getur gengið og hvað það hámark verður sem þá blasir við. 

Þegar fyrr í vor var minnst á þetta mál hér á síðunni spruttu upp menn, sem sökuðum mig um hálfgerðan fasisma og ofstopa gegn rafrettunum með því að dirfast velta vöngum yfir þessu. 

Sér þess þó hvergi stað, að um slíkt sé að ræða, - aðeins almennar umræður um algerlega nýjan sið og fíkn hjá þúsundum fólks. 


mbl.is Taka nú rafrettur með í reikninginn
Tilkynna um óviðeigandi tengingu við frétt

Plast er ekki ómissandi, - það er stutt síðan það var ekki til.

Uslinn, sem plast er þegar farið að valda í lífríki hafsins og byrjuð að teygja sig upp á land  er skýr vísbending um að aðgerðir til varnar mega ekki bíða. 

Ástæðan liggur í augum uppi og er tvíþætt:

Plastið endist svo lengi, tekur jafnvel aldir að brotna niður. Það plast sem þegar er komið í umferð verður ekki upprætt nema að mjög litlu leyti. 

Hin ástæðan er sú, að það er tiltölulega stutt síðan plastið var fundið upp, og hið mikla tjón sem það hefur samt valdið á þessum stutta tima, er váboði fyrir framtíðina, nema hart verði brugðist við. 

Út því að það var hægt að komast hjá því að nota plast fyrir aðeins tæpri öld, ætti nútíma hugvit og tækni að geta leyst úr þessu viðfangsefni. 

 


mbl.is ESB leggur til bann við plastumbúðum
Tilkynna um óviðeigandi tengingu við frétt

Þegar Ari Vatanen hótaði að hætta vegna Michelle Mouton.

Það er ekki nýtt að konur verði fyrir ákveðnum fordómum varðandi akstur bíla.

Ari Vatanen var einn allra besti, ef ekki besti rallökumaður heims í kringum 1980 og hampaði heimsmeistaratitli. 

Á tímabili var hann helsta átrúnaðargoð mitt og fleiri vegna snilldaraksturs.  

En hann var svo óheppinn að geta ekki strax gengið í hóp þeirra ökumanna aem óku á aldrifsbílunum sem slógu í gegn 1981, en veitti þeim samt harða keppni á afturdrifs Escort bíl sínum . 

Hann lét það ekki á sig fá að tefjast við að komast á aldrifsbíl, en fór hins vegar í baklás þegar franska rallökukonan Michelle Mouton fór að blanda sér í toppbaráttuna á Audi Qoattro, komst á verðlaunapalla og ógnaði meira að segja körlunum í keppninni um sjálfan heimsmeistaratitilinn. 

Hún naut þess að búið var að þróa öflugt vökvastýri fyrir keppnisbíla, sem minnkaði átökin við stýrið. 

Þetta ergði Vatanen svo mjög að hann sagðis myndu hætta að keppa ef Mouton yrði heimsmeistari.

Þetta þótti mér ljóður á ráði hans, en Mouton varð ekki heimsmeistari og Vatanen hélt áfram keppni.  


mbl.is Kona frá Sádi-Arabíu ók í formúlu 1
Tilkynna um óviðeigandi tengingu við frétt

"Gamla konan á gangstéttinni..."

Þáttuinn 60 mínútur var með athyglisverða umfjöllun um sjálfkeyrandi bíla fyrir nokkrum vikum. 

Í þættinum var rætt við marga, sem voru afar bjartsýnir á það að sjálfkeyrandi bílar væru um það bil að byrja að taka við í umferðinni í stórum stíl. 

Eina viðtalið, þar sem annað sjónarmið kom fram, var við mann, sem fréttamaður þáttarins sagði vera í helstu lykilstöðunni í þessum málum. 

Sá maður sagði, að áætlanir um stórfellda og almenna notkun sjálfkeyrandi bíla væri byggðar á allt of mikilli bjartsýni. 

Það gæti verið meira en áratugur þar til slíkir bílar yrðu almennir. 

Hann sagði ástæðuna vera þá, að umferðin væri miklu flóknari en svo að hægt væri að koma fyrir nægilegri gervigreind í bílunum, sem leysti úr öllum viðfangsefnum. 

Tók hann sem dæmi gamla annars hugar konu eða karl, sem stæði á gangstétt og tæki allt í einu upp á því að ana út á götuna í veg fyrir bílinn. 

Þessi gangandi vegfarandi gæti fyrir atvikið hafa sýnt af sér hegðun eða útlit, sem fengi glöggan bílstjóra til að hafa varann á, en gervigreindarbúnaður sjálfkeyrandi bíls næmi alls ekki. 

Í þessu sambandi má minna á eitt af þeim fjórum atriðum, sem valda því að að jafnaði er tvöfalt meiri hætta á því að lenda í alvarlegu slysi eða banaslysi á vélhjóli heldur en á bíl. Ef vélhjólamaður passar upp á þessi fjögur atriði, getur hann minnkað áhættuna af vélhjólsakstrinum um helgimg og gert það álíka hættulegt að aka á vélhjóli og fylgir því að meðaltali að aka bíl: 

1. Vera alls gáður. 55% bana- og alvarlegra slysa á vélknúnum hjólum eru vegna ölvunar eða annarlegs ástands ökumanns vélhjólsins. Samsvarandi tala á bílum er fjórfalt lægri. 

2. Vera með lokaðan hlífðarhjálm á höfði. 

3. Gera ráð fyrir því að enginn í kringum hann í umferðinni sjái vélhjólið og að þess vegna megi búast við hverju sem er af þeirra hálfu, til dæmis því að ana fyrirvaralaust fyrir vélhjólið hvenær og hvar sem er. 

4. Að vera í góðum vélhjólaklossum á fótunum. 

 


mbl.is Horfði á Hulu undir stýri
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband