Verst að þau skilja þetta ekki sjálf. "Enginn betri en Sigmundur Davíð."

Ömurlega litið traust til Alþingis og Borgarstjórnar Reykjavíkur hefur náð nýjum lægðum. 

Vantraustsástandið hefur ríkt mjög lengi, og það eitt sýnir, að fólkið, sem stendur að þessum stofnunum skilur þetta ekki sjálft. 

Nú er komin lítils háttar lagfæring á vísu frá 2015 varðandi fjarveru Sigmundar Davíðs í nefndarstörfum, sem hann bregst við með því að standa fyrir tveggja daga málþófi á þingi. 

 

Forystu Miðflokksins féllust hendur. 

Á fundi hjá nefndinni enginn sendur. 

Þangað fór enginn inn í skrafið, 

því enginn er betri en Sigmundur Davíð. 


mbl.is Traust til Alþingis minnkar mjög
Tilkynna um óviðeigandi tengingu við frétt

25 falt óréttlæti hið minnsta.

Ísland átti aungvan min meðal vestrænna þjóða nema Færeyinga þegar óheyrilegum þrýstingi var beitt á okkur í upphafi Icesave-samninganna. 

Það verður að meta aðgerðir íslenskra embættismanna og Alþingismanna með hliðsjón af ástandinu á hverjum tíma, því að tíminn vann með okkur. 

Eina leiðin til að berjast gegn þessu var að nýta sér alla möguleika, sem gáfust til að tefja málið og draga það á langinn, og nota þann tíma vel til að benda á hið mikla óréttlæti, sem fólst í því að pína hvern íslenskan skattgreiðanda til að borga 25 sinnum hærri upphæð vegna Icesave heldur en hvern hollenskan eða breskan skattgreiðanda. 

Það var heldur betur "Versala-samninga"svipur á þeirri kröfu. 

Tvöföld töf vegna beitingar málskotsréttar forseta Íslands kom sér vel og gaf dómendum í EFTA-dómsstólnum tíma til að finna tæknilega röksemd, sem okkur sjálfum hafði sést yfir, til þess að eyða kröfunni á okkar að fullu og öllu. 

Tíminn, sem gafst, gerði það líka mögulegt að komast út úr eins konar brunaútsöluástandi á erlendum eignum Landsbankans og fá meira fyrir eignirnar en leit út fyrir í upphafi. 


mbl.is Icesave var á máli Versala-samninga
Tilkynna um óviðeigandi tengingu við frétt

Eins konar Höfða-fundur?

Þegar fundi Gorbatsjof og Reagans í Höfða lauk, var honum "slitið án samkomulags", rétt eins og fundinum í Hanoi núna  og báðir aðilar lýstu yfir miklum vonbrigðum. 

En haldið var opinni leið til þess að vinna áfram að því að þoka málum áfram, og það tókst ári síðar. 

Þótt textinn að loknum fundi núna sé svipaður og 1986 er ómögulegt að bera þetta tvennt saman að öðru leyti, því að það strandaði á ólíkum atriðum. 

1986 var það til dæmis "Stjörnustríðs"- eða geimvarnaáætlun Bandaríkjamanna, sem hefur raunar ekki dúkkað upp síðan, - í 33 ár. 


mbl.is Fundi slitið án samkomulags
Tilkynna um óviðeigandi tengingu við frétt

Búinn að gefa tóninn: "Ekkert að flýta mér"?

Það getur verið misjafnt, hvort það sé jákvætt eða neikvætt að breyta um stefnu eða hegðun í samræmi við nýjar upplýsingar eða aðstæður. 

Þegar herskáar og ógnvekjandi yfirlýsingar Bandaríkjaforseta fyrir tveimur árum í garð Norður-Kóreu eru bornar saman við kúvendingu, sem nú virðist orðin hjá honum í garð einræðisherrans í því ríki kúgunar og sults, er hægt að túlka það sem varasama eftirgjöf. 

Um alllangt skeið hafa Norður-Kórea og Venesúela verið nefnd í sömu andránni sem dæmi um skipbrot kommúnismans. 

En olíuauðurinn í Venesúela ræður áreiðanlega mestu um það, hve hart Bandaríkjamenn sækja í að "fjárfesta í" ( les: eignast) þessum auði og nýta sér hrun landsins. 

Á tímabili eftir að Kóreustyrjöldinni lauk ríkti mikil spilling í Suður-Kóreu og efnahagurinn var ekki beysinn. 

Sem dæmi má nefna að svo seint sem 1986 voru framleiddir 130 þúsund bílar í landinu, en aldarfjórðungi seinna voru þeir orðnir 30 sinnum fleiri, fjórar milljónir, fleiri en Frakkar, Bretar og Ítalir framleiða samanlagt!  

Landið hafði risið úr öskustó og er nú eitt af helstu iðnríkjum heimshlutans. 

Og þessi endurfæðing er líklega ástæða þess, hvernig Trump hefur kúvent gagnvart Norður-Kóreu. 

Það eru fyrst og fremst Suður-Kóreumenn sem neyðast til að friðmælast við þjóðbræður sína, vegna þess að hinn kosturinn; kjarnorkustríð, er ekki í boði. 

Suður-Kóreumenn og Japanir eru afar mikilvægir bandamenn Bandaríkjamanna í Asíu og því er vel, að Trump reynir frekar að leysa vandamálin á svæðinu á friðsamlegan hátt heldur en að láta sverfa til stáls. 

Ef honum tekst það, fær hann prik frá síðuhafa. 

 

 

 

 


mbl.is Trump tilfinningaríkur á Twitter
Tilkynna um óviðeigandi tengingu við frétt

Íþróttir og listræn samkeppni fara ekki vel saman við stjórnmál.

Í heimildamynd um bandaríska blökkumanninn Jesse Owens og afrek hans kom fram, að litlu hefði munað að hann neitaði að keppa á Ólympíuleikunum 1936 til að mótmæla því að þeir væru haldnir þar í landi. 

Ef hann hefði gert það hefðu afrek hans þar aldrei verið unnin og haft margfalt meiri áhrif en það að hann hefði neitað. 

Margar vestrænar þjóðir sniðgengu Ólympíuleikana 1980 í Moskvu vegna innrásar Sovétmanna í Afganistan og þess var síðan hefnt af kommúnistaríkjunum með því að sniðganga Ólympíleikana 1984 í Los Angeles. 

Tvennir Ólympíuleikar voru þannig stórskaðaðir af pólitískum orsökum sem eftir á reyndist vera meira en lítið hræsnisfull hjá þjóðum, sem sjálfar hernámu Afganistan 2001.  

Hvað útilokun Suður-Afríku snerti, var hún vegna þess að gróf brot á Ólympíuhugsjóninni viðgengust í aðskilnaðarstefnuna þar í landi, sem var látin bitna á svörtum íbúum landsins. 

Nasistar pössuðu sig á því að engin mismunun væri á Ólympíuleikunum sjálfum, og hið hlálega var að í Berlín upplifði Jesse Owens það í fyrsta sinn á ævinni að geta verið herbergisfélagi með hvítum og farið með hvítum og svörtum í búningsklefa og bað. 

 


mbl.is Úkraína hættir við þátttöku í Eurovision
Tilkynna um óviðeigandi tengingu við frétt

Of seint fyrir Edduna núna, en borð fyrir Báru á næsta ári.

Í hálfkæringi sagði síðuhafi á Edduverðlaunahátíðinni fyrir fjórum dögum, að hann teldi að beint sjónvarp frá Alþingi ætti að flokkast undir barnaefni og vera tilnefnt til Edduverðlauna, því að þarna væri oft um háklassa sandkassaleik að ræða. 

Ekki óraði hann fyrir því að við fyrsta tækifæri væri engu líkara en að hluti þingmanna hefði tekið þetta bókstaflega í gær og í nótt, því að í meira en 14 klukkustundir samfleytt héldu nokkrir þingmenn Miðflokksins uppi svörum og andsvörum hvor við annan um sama málsefnið, án þess að séð yrði að aðrir þingmenn væru í tómum þingsalnum. 

Ef þeir fundu tilefni til þess að ræða fundarstjórn frú forseta, gerðu þeir það sem og klæðaburð einhverra þingmanna, sem aldrei sáust á meðan síðuhafi sat sem bergnuminn og horfði á þessa snilld. 

Þessi frammistaða hefði getað skilað þeim Eddu núna, ef þeir hefðu fattað gildi tækifærisins fyrr, en huggun er, að héðan af kemur þessi útsending vel til greina á næstu Edduhátíð. 

Alls konarl útskýringar mátti sjá á samfélagsmiðlum í gær, svo sem að Sigmundur Davíð hefði ekki mætt á nefndarfund þar sem meirihlutinn afgreiddi málið úr nefndinni. 

Uppákoman í gær hefði haft tvíþættan tilgang:  Að hefna fyrir þetta og að sýna fram á mátt, mannfjölda og atgerfi stærsta stjórnarandstöðuþingflokksins. 

Í leiðinni var hægt að ræða um snilld formannsins í tengslum við Icesavemálið stanslaust í í meira en 14 klukkustundir. 

Síðuhafi vill bæta við möguleikanum á að hafa borð fyrir Báru og hampa Eddunni að ári. 


mbl.is Fundi slitið 5:21
Tilkynna um óviðeigandi tengingu við frétt

Hvernig kom rafdrifið við sögu við fall út úr bíl?

"Boltinn sprakk og Fram vann" var einu sinni fyrirsögn á íþróttafrétt. Þetta var gott dæmi um það hvernig hægt er að vekja slíka forvitni með fyrirsögn fréttar, að flestir sem sjá hana, eru knúnir til að lesa hana. 

En í þessari frétt var ekki minnst á boltann, enda er ekki yfirleitt minnst á hann í fréttum af boltaíþróttum. 

Svipað gildir um fyrirsögnina "Féll úr rafmagnsbifreið á ferð." Hún vekur forvitni um það hvaða þátt rafmagnið átti í slysi, út því að það er sérstaklega nefnt í fyrirsögninni. 

Spurningar vakna: Er fólki hættara við að falla úr rafmagnsbílum en öðrum bílum? Hvernig getur rafdrifið átt þátt í slíkum slysum? 

Í fréttinni kemur síðan ekkert í ljós, sem bendir til þess að rafkerfið hafi átt þátt í falli starfsmannsins, en sagt er að bíllinn hafi verið staddur á flughlaði Leifsstöðvar. 

Og spurningarnar verða fleiri: Ef maður hefði fallið úr bíl á flughlaði fyrir 15 árum, hefði fyrirsögnin þá orðið svona: "Féll úr dísilbíl á ferð"?

Eða: "Féll úr bensínknúnum bíl á ferð"?

 


mbl.is Féll úr rafmagnsbifreið á ferð
Tilkynna um óviðeigandi tengingu við frétt

30 ára ending húsa eðlileg?

Fyrr í þessum bloggpistlum hefur verið bent á þá brotalöm í íslenskum byggingariðnaði, sem birtist í óeðlilega lítilli endingu margra bygginga. Dæmi um slíkt er hús OR, en afar misjöfn ending fleiri íslenskra húsa vekur spurningar. 

En ekki má gleyma því, að flutt hafa verið inn frá útlöndum íbúðarhús, sem sérfróður byggingafræðingur telur að séu engan veginn gerðar fyrir íslenskar aðstæður og muni vart endast í meira en 30 ár. 

Í slíku felst að sjálfsögðu gríðarlegt tjón fyrir þá, sem verða eigendur þessara húsa þegar ósköpin dynja yfir. 

Íslenskar byggingar eru alveg sérstaklega stór hluti af þjóðarbúskapnum og þjóðlífinu vegna óblíðs veðurfars og um að ræða verðmæti sem skipta í það minnsta hundruðum milljarða króna. 

Rannsóknastarfsemi á þessu sviði hefur verið fjársvelt og kominn tími til að fara rækilega í saumana á svo veigamiklu máli. 


mbl.is „Blaut tuska“ verkalýðshreyfingarinnar
Tilkynna um óviðeigandi tengingu við frétt

Ætluðum niður í bæ en var stefnt upp í Mosó. Erlendis í eigin borg.

Stundum þegar síðuhafi á erindi í sumum af nýrri hverfum höfuðborgarsvæðisins finnst honum hann vera kominn í útlenda borg. 

Kannast ekkert við húsin, einkum í skammdegismyrkrinu, og á stóru svæði í Körum og Sölum Kópavogs er ekki götuskilti á einni einustu götu, sem liggur út úr fjölmörgum hringtorgum á því svæði. 

Ef komið er niður í gömlu miðborgina í Reykjavík og ætluninn að þefa af gamalkunnugri íslenskri og reykvískri stemningu, er svipað uppi á teningnum, að það eru tómir útlendingar og eins og komið sé í erlenda borg. 

Á Laugavegi og vestur úr eru margar af grónum verslunum horfnar og auð húsakynnin víða. 

Eitt sinn ætluðum við hjónin að fara með strætó frá Spönginni niður í bæ. 

Fórum inn í vagn, sem samkvæmt merkingu virtist eiga að fara í vesturátt. 

Ekkert þýddi að tala við vagnstjórann, hann skildi ekki íslensku og trauðla ensku og ók af stað með því að taka beygju í hálfhring og stefna í austur. 

Fljótlega kom í ljós að hann var á leið upp í Mosfellsbæ. 

Þá forðuðum við okkur úr vagninum og hófum förina fótgangandi til baka, komin miklu lengra frá ákvörðunarstað en í upphafi. 


mbl.is Tóku strætó þegar enginn kom
Tilkynna um óviðeigandi tengingu við frétt

Áfall fyrir sumar byggðir á austanverðu landinu.

Árið 2015 veiddust um 352 þúsund tonn af loðnu við landið, eða meira en 100 þúsund tonnum meira en veiddist af þorski.

Að vísu er verðmæti á hverju tonni af loðnu margfalt minni en af þorski, en þetta mikla magn segir þó þá sögu, að fyrir þá staði á austanverðu landinu og allt vestur til Vestmannaeyja, þar sem loðna hefur verið brædd, hafa loðnuveiðar og loðnuvinnsla verið snar þáttur í atvinnulífi og verðmætasköpun. 

Loðnuaflinn var rúmlega 100 þúsund tonn 2014 og 2016, en rauk upp í tæp 200 þúsund árið 2017. 

En nú hefur heldur betur sigið á ógæfuhliðina og ekki sjánleg loðna í þeim mæli að hægt sé að leyfa neinar veiðar úr stofninum. 

Ef það er endanleg niðurstaða að loðnan sé nær uppurinn er það auk þess neikvætt fyrir afkomu þorsksins sem lifir að hluta til á því að éta loðnu. 


mbl.is Loðnuleit lokið og enginn kvóti
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband