Hvernig ætlaði Emirates að gera þetta? Nú þarf að ganga í takt.

Klukkan tifar hratt þessa dagana, þegar leysa þarf úr flóknum, nýjum og erfiðum viðfangsefnum á skömmum tíma, og það þarf að ganga í takt. 

Ekki skortir mannvalið í því efni, ef aðeins er athugað, hvað hið tilfinningaríka hæfileikafólkk hefur sagt um hvert annað í gegnum tíðina. 

Ef Svandís er "einhver besti heilbrigðisráðherra, sem við höfum haft í langan tíma", eins og Kári segir, þurfum við á henni að halda. 

Ef Þórólfur er sjarmerandi, aðlaðandi og snjall maður, þurfum við líka á honum að halda. 

Og Kári sjálfur er afburðamaður á sínu sviði, sem þjóðin hefur notið góðs af og þarf á að halda. 

Það þarf að nálgast verkefnið framundan við opnun landsins með opnum huga og sallarólegum huga. 

Skoða alla möguleika, þar sem um margar aðferðir getur verið að ræða.  Hvað til dæmis um flugfélagið Emirates sem kvaðst hafa á takteinum aðferð til að afgreiða hvert smit á 10 mínútum?  


mbl.is Kári sagði Svandísi hrokafulla
Tilkynna um óviðeigandi tengingu við frétt

Áfram "gölluð vara"?

Icelandair flugfélagið var komið ansi langt á þeirri braut að endurnýja Boeing 757 flota sinn með Boeing 737 Max. 

Síðan kom í ljós að sú vél var svo gölluð vara, að það kostaði tvö mannskæð flugslys hjá öðrum flugfélögum.  

Breytingin úr Boeing 757 yfir í Boeing 737 Max var skiljanleg í ljósi samfelldra viðskipta Icelandair og Boeing í áratugi. Ekki þurfti að kaupa nýja flugherma og æfa alla flugmenn í þeim upp á nýtt eins og gerst hefði, ef keppinauturinn, Airbus 320 neo hefði orðið fyrir valinu. 

Sú flugvél hafði hins vegar þann kost fram yfir Boeing 737 að nýir og bráðnauðsynlegir hreyflar komust fyrir undir vængjunum, en á Boeing 737 varð að færa þá framar og ofar með þeim afleiðingum að flugeiginleikar vélarinnar röskuðust og þurfti nýtt og flókið tölvustýrt kerfi, MCAS, til að hægt væri að fljúga henni af öryggi undir sömu tegundarskilgreiningu. 

Nú er í gangi það 787 heilkenni, að sífelldar tafir eru á því að Boeing hafi leyst hin erfiðu vandamál sem upp komu; og hvað 737 varðaði það, sem því fylgdi upphaflega að framleiða flugvél með röngum þyngdarhlutföllum. 

Ef Icelandair stendur frammi fyrir því að þurfa ekki að aka við Max-vélum gæti það hugsanlega orðið auðveldara en ella, ef millilandaflugið í heiminum verður lengri í lægð eftir kórónuveikifaraldurinn.  

Hér á síðunni hefur frá upphafi þessa máls verið bent á þá staðreynd, að sá galli Max vélanna, sem skipti höfuðmáli, var að þyngdarhlutföllin væru röng í vélunum. 

Það liggur í orðanna hljóðan, að þyngdarhlutföll í flugvélum vega þungt. 


mbl.is Þurfa ekki að taka við Max-vélum
Tilkynna um óviðeigandi tengingu við frétt

Einfaldasta ráðið fyrir marga: Það er kólnun en ekki hlýnun.

Það hefur verið alþekkt í hitabylgjum undanfarinna ára í Evrópu, að fólk með öndunarfærasjúkdóma deyji af völdum hitanna og óloftsins. 

Í sumar mun COVID-19 verða viðbót í þeim efnum. En harðsnúinn hópur fólks mun, ef að líkum lætur, halda því fram að þessi ótti og viðvaranir Veðurfarsstofnunar Sameinuðu þjóðanna séu bara áróður byggður á þeim tvíþættu lygum 1. að veðurfar á jörðinni sé sífellt að hlýna og 2. að hlýnunin sé af mannavöldum. 

Merkilegur þessi fyrri hluti hinna nýju trúarbragða, en þó verður á það að líta að ef númer 1 er rangt verður númer 2 það sjálfkrafa og málið þar með útrætt. 

 

 


mbl.is Samspil veirunnar og hitabylgju áhyggjuefni
Tilkynna um óviðeigandi tengingu við frétt

Þegar einn gluggi lokast, opnast stundum annar.

Eftirtektarverður árangur hér á landi í baráttunni gegn COVID-19 hefur að sönnu kostað efnahagslegar fórnir. 

Á móti kemur, að í nýrri samkeppni þjóðanna um það að leita uppi ný sóknarfæri í opnun á flugferðir, höfum við eins og er góða stöðu, sem gæti komið okkur vel. 

Þó ber að hafa í huga hið fornkveðna að best sé að ganga hægt um gleðinnar dyr og betri sé einn fugl í hendi en tveir í skógi. 


mbl.is Vilja opna á flugferðir til Íslands
Tilkynna um óviðeigandi tengingu við frétt

Samsvarar 135 látnum af völdum COVID-19 hér.

4000 plús látnir i Svíþjóð samsvarar því að 135 væru látnir hér í staðinn fyrir þá 10 sem við höfum misst á álíka löngum tíma. 

Þessi áframhaldandi ótíðindi frá náinni frændþjóð okkar snertir okkur kannski meira en ef fjarlægari og óskyldari þjóð ætti í hlut, ekki síst þegar þess er gætt hvað læknisfræðileg og velferðarleg tengsl eru mikil á milli okkar og þeirra og hvað við höfum litið mikið upp til Svía sem fyrirmyndarþjóðar á flesta lund. 

Hvernig má það verða að munurinn sé svona mikill?  

Heyrst hefur sagt, að Svíar muni vinna þennan mun upp síðar ef eða þegar önnur bylgja komi. 

En meðan dregur áfram í sundur með þjóðunum, Svíum í óhag, þyrfti alveg sérstaklega alvarlegt bakslag að koma hjá okkur til þess að vinna upp svona gríðarlega margfaldan mun. 


mbl.is Yfir 4 þúsund látnir í Svíþjóð
Tilkynna um óviðeigandi tengingu við frétt

Það var mikið!

Í áratugi hefur það dregist úr hömlu að leysa umferðarvandann á gatnamótum Bústaðavegar og Reykjanesbrautar á mun ódýrari og hagkvæmari hátt en haldið var fram. 

Eftir Hrunið 2009 féllust þeir sem réðu ferðinni í uumfarðarmálum í Reykjavík á þá afarkosti að engar stórar samgönguframkvæmdir yrðu í Reykjavík næsta áratug!  

Í staðinn var farin öfug leið við gerð nýs Álftanesvegar í stað mun ódýrari breytinga á eldri veginum. 

Loksins nú hillir undir lausn við enda Bústaðavegar, sem var löngu tímabær. Þetta er  lengi búinn að vera einn helsi slysa- og umferðarvandastaður í gatnakerfi borgarinnar.

Því ber að fagna, þótt seint sé, að loksins nú fari að sjá fyrir endann á þessu löngu tímbæra verkefni.  


mbl.is Finna þarf leið fyrir borgarlínu
Tilkynna um óviðeigandi tengingu við frétt

Vindmyllur geta verið bæði tækifæri og ógn.

Halldór Magnússon skrifa grein um vindmyllur í Morgunblaðinu og finnur að því að umhverfisverndar- og náttúruverndarfólk láti sér ógn af þeim sér í léttu rúmi liggja. 

Ekki getur síðuhafi tekið það til sín. 

Hér á síðunni hefur margsinnis undanfarin ár verið fjallað um vindmylluæðið, sem nú hefur blossað upp eins og faraldur hér á landi, og í blaðagrein í Fréttablaðinu skrifað síðuhafi grein um aðsteðjandi ógn að náttúru landsins undir heitinu "Tíu vegvísar og heilög vé." 

Þessir vegvísar eru reyndar orðnir 15 nú, og felast allir í yfirlýsingum helstu valdamanna landsins undanfarin ár um þá brýnu þörf "til að vinna gegn orkuskorti íslenskra heimila og fyrirtækja" að fjórfalda eða jafnvel fimmfalda núverandi orkuvinnslu og leggja tvo sæstrengi hið minnsta milli Íslands og Evrópu. 

Myndu íslensk heimili og fyrirtæki þá væntanlega fá til sín 5 prósent þessarar orku en stóriðjan og / eða orkumarkaður Evrópu 95 prósent. 

Fimmtándi vegvísirinn var að detta inn í gær í formi málaferla og mótmæla fjárfestanna gegn því að vindorkan falli undir Rammaáætlun, og skuli vindorkan undanþegin, einfaldlega vegna þess að aðeins vatnsorka og gufuaflsorka sé nefnd í áætluninni. 

Eitt atriði er aldrei nefnt í umræðunni um vindorkuna, en það er sú staðreynd, að í viðhorfskönnun hjá erlendu ferðafólki, hefur það sagt, að háspennulnur og vindmyllur trufli mest og skemmi fyrir upplifun þess af því, sem langflest þeirra eru komin til að njóta; einstæð og ósnortin náttúra Íslands. 

Við þetta má einnig bæta sögufrægustu byggðum Íslands, svo sem sagnaflestu sýslunni, Dalabyggð. 

Þar hafa fjárfestar sýnt einbeittan vilja til að reisa risavaxin vindorkukver við Búðardal og á Laxárdalsheiði. 

Vindorkugarðurinn við Búðardal myndi blasa við frá nær öllu sögusviði Laxdæla sögu, og á þeim forsendum hefur síðuhafi lagst gegn slíku orkuveri þar, nema færð yrðu rök fyrir því að þarna væru bestu aðstæður landsins til að reisa slíkt risamannvirki. Sem er þó er strax hægt að fullyrða, að er ekki raunin.  

Áður en vaðið væri í að umturna öllu útsýni og ásýnd Dalabyggðar væri nauðsynlegt að drífa í því að afmá þá skammarlegu vanrækslu sem falist hefur í því að láta ár og áratugi líða án þess að gera neitt marktækt í því að skoða, hvaða áhrif orkuvinnsla, sem þakið gæti allt landið frá hálendinu og út í sjó, gæti haft. 

Nú kunna einhverjir að segja að það sé alltaf sama sagan, að náttúruverndar- og umhverfisverndarfólk sé "á móti öllu," "á móti rafmagni" og vilji að þjóðin fari aftur inn í torfkofana." 

En það þarf ekki annað en að fara einn hring um landið til að sjá, að af þeim virkjunum, sem reistar hafa verið, eru tæplega 30 stórar virkjanir, sem þetta voðalega fólk samþykkti, allt frá Sogsvirkjununum til Búðarhálsvirkjunar og stækkunar Búrfellsvirkjunar. 

Vindorkan hefur ýmsa kosti, svo sem að framleiða hreina og endurnýjanlega orku og að mannvirkin eru að mestu afturkræf. 

Sú þögn, sem Halldór Magnússon kvartar yfir, er vegna þess að nauðsynleg vinna við mat á umhverfisárhrifum 34 stórvirjana upp á næstum fimm Kárahnjúkavirkjanir hefur alveg verið vanrækt. 

Byrja þyrfti á því að ákveða, á hvaða svæðum vindorkuverin valda minnstum umhverfisáhrifum og hvar þau valda mestum umhverfisáhrifum. 

 

 


"Þau voru við." "Milljón er tala."

Allt þetta fólk.

Enginn er eins og neinn annar.

Öll þessi líf.

Allar þær sálir, sem endalaus fjölbreytni skannar. 

 

7,7 milljarðar núlifandi jarðarbúa falla undir ofangreinda lýsingu. 

Á þessu ári verða rétt 70 ár, síðan flugvélin Geysir fórst á Bárðarbungu og fór í spað. 

Um borð voru sex manns og á nokkrum dögum urðu nöfn þeirra þjóðþekkt á þann hátt, að fyrir marga,sem þessa daga muna, eru þau öll enn í minni og slysið og einstæðir eftirmálar þess ljóslifandi. 

Björgun bandarísku skíðaflugvélarinnar ofan af jöklinum er eitt af tíu atriðum, sem bandaríska tímaritið Readers Digest birti og taldi vera þau merkustu í sögu flugvélar, sem Eisenhower hershöfðingi nefndi sem eitt af helstu tækjunum, sem bandamenn notuðu til að vinna sigur í Heimsstyrjöldinni. 

Nefna má eitt atriði í sögunni af Geysisslysinu, sem breyttist úr miklu áfalli í það að verða hluti af svonefndu Loftleiðaævintýri, sem einnig varð einstakt í þjóðarsögunni á sinn hátt.

Hugsanlega hefði Geysisslysið ekki greypst á jafn árhifaríkan hátt í þjóðarvitundina, ef hundruð manna hefðu verið um borð.

Ein ástæðan, burtséð frá óvenjulegum aðstæðum, gæti verið sú, að þau voru hæfilega mörg; sex að tölu. Þar með gátu allir tengt sig við þau persónulega; "þau voru við" eins og sagt er í COVID-19 grein um hina dánu í þeim faraldri. 

Þessi orð eru höfð eftir Jósep Stalín:  "Að drepa einn mann er morð. Að drepa milljón manns er tala."

Grimmileg orð en lýsa því fyrirbæri þegar ógnarhá tala verður að persónulausum massa. 

Hliðstæða þess, að þegar myndirnar birtust eftir stríðið af hrikalegum haugum fórnarlamba Helfararinnar, voru þær áhrifamiklar. 

En þegar gerð var sjónvarpsþáttaröð þremur áratugum síðar um eina fjölskyldu, sem lenti í helförinni varð hún miklu áhrifameiri. 

"Þau voru við."  


mbl.is Listi yfir látna á forsíðu: „Ólýsanlegur missir“
Tilkynna um óviðeigandi tengingu við frétt

Samskeyti stýrisáss og stigbrettis geta verið veikur punktur á rafskutlum.

Rafskutlur voru áberandi í gærkvöldi í miðbænum í Reykjavík, og á dögunum fletti síðuhafi upp á upplýsingum um þær á netinu, sem voru birtar í Bretlandi eftir reynsluferðir á þeim. 

Einn helsti kostur þeirra er sá, að hægt er að brjóta þau saman og leggja í bíl. Skúturnar hafa nefnilega yfirleitt frekar stutt drægi, í mesta lagi 15-20 kílómetra, og henta því vel í blandaðri ferð á bíl, til dæmis rafbíi, með rafskutluna innanborðs. 

Fyrir forvitni sakir var farið inn á netið fyrir nokkrum vikum til að kynna sér rafskutlur, sem einn af fjölmörgum innflutningsaðilum bauð upp á. 

Sjá mátti á Yotube reynsluferðir á þeim, og var þar margt fróðlegt að sjá, þar sem nefndir voru helstu kostir og gallar hverrar gerðar. 

Tvennt var það, sem helst var fundið að á fleiri en einni gerð: 

1. Samskeytin á milli stýrisáss og stigbrettis á þeim stað þar sem losað er um festingu og stýrisásinn felldur um liðamót að stigbrettinu. Í einu tilfelli hafði sá, sem prófaði hjólið, átt það í heilt ár og var sjálfur búinn sjóða þessi samskeyti upp og styrkja þau verulega. 

2. Hjólin eru ýmist með loftfylltum dekkjum eða með dekkjum, sem eru gúmmí í gegn. Í sumum tilfellum mæltu prófendur með því að skipta úr loftfylltum dekkum yfir í dekk, sem væru heil í gegn. Ástæðan var sú, að hjólin undir skutlunum eru svo lítil, að sífellt vofði yfir hætta á að sprengja dekk. Hægt væri að fá dekk með dúnmjúku gúmmíi, sem tækju loftfylltum dekkjum fram.   

 


mbl.is Innkalla skilyrðislaust 930 Enox-rafskútur
Tilkynna um óviðeigandi tengingu við frétt

Hve margir leggja í það að "valda vandræðum"?

Í góða veðrinu í kvöld var víða fólk á ferli, og margir sjálfsagt að viðra sig á fyrsta degi ársins, þegar það er átján stiga hiti. Sólarlag 22.maí 2020

Hætt er við að 2ja metra reglan hafi viljað gleymast við að njóta sólsetursins, sem myndir hér á síðunni eiga að gefa hugmynd um. 

Það verður athyglisvert að sjá hvernig nýjar nálægðarreglur og fleira, sem í vændum er, á eftir að reynast. 

Verður "þeim það vilja þiggja boðið að halda tveggja metra fjarlægð" samkvæmt minnisblaði Þórólfs Guðnasonar sóttvarnarlæknis, að ósk sinni vandaræðalaust? Sólarlag 22.5.2020

Viðfangsefnið í boðaðri nýrri skipan vegna útfærslu á 2ja metra reglunni er spánnýtt og margar spurningar vakna. 

Hér um árið var í gangi þróun varðandi nálægð reykingafólks og reyks við fólk, sem ekki vildi láta reykja ofan í sig og lenda þar með í áhættuhópi varðandi það að fá krabbamein. 

Þetta var tímabilið þegar búið var að finna það út, óbeinar reykingar væru ekki síður óhollar og krabbameinsvaldandi en beinar reykingar. 

Til að reyna sætta þessi sjónarmið var veitingastöðum og öðrum stöðum, þar sem saman kom reykingafólk og þeir sem ekki reyktu, var þessum rýmum oft skipt og leyft að reykja í hluta þeirra. Sólarlag 22.5.2020 (2)

Þetta gekk ekki til lengdar. Reykurinn virti ekki nein mörk og breiddist út yfir mun meira svæði en veiran gerir nú.  

Það má sjá það fyrir sér, að þar sem fólk hefur hópast saman, verði það ekki vel séð ef aðvífandi fólk tekur upp á því að krefjast réttar síns til að vera með 2ja metra fjarlægð í næsta mann. 

Það má líka sjá það fyrir sér, að erfitt verði að framfylgja eins konar nýrri aðskilnaðarstefnu með því að afmarka svæði fyrir hvorn hóp. 

En til þess eru viðfangsefni og vandamál að leysa þau og það verður fróðlegt að fylgjast með því hvernig þetta muni ganga þegar þar að kemur. 

Kannski gengur þetta misjafnlega eftir stöðum og aðstæðum, og þá er bara að taka á því á lausnamiðaðan hátt og finna viðunandi lausn.  


mbl.is Leyfilegt að standa þétt saman
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband