Hvað um suðausturhluta Bárðarbungu?

Á víðu myndinni hér á síðunni er horft yfir suðausturhluta Bárðarbungu, en sigkatlarnir tveir, sem blasa við, eru á suðausturbrún öskjunnar. 

Myndirnar eru teknar rétt áður en fyrsti septembersnjórinn fellur og fer að loka sprungum og minni misfellum á jöklinum og er horft til suðurs í átt til Grímsvatna þar jörð skalf fyrir nokkrum dægrum. 

Þarna sást í fyrsta sinn svo vitað sé, eitt til tvö hundruð metra lóðrétt niður til jarðar í gegnum bráðna íshelluna ofaná suðaustanverðri Bárðarbungu.

 Þarna er vaxandi jarðhiti og greinilegt að áhugaverð þróun er í gangi, sem getur haft miklar afleiðingar.  

Af þessu náðust bæði ljósmyndir og þó einkum kvikmyndir, sem ég hyggst setja inn á facebook. 

Þetta eru þó ekki bestu myndirnar, sem eru ekki eins tiltækar í augnablikinu, en á þeim er horft alveg lóðrétt niður á sjóðandi botn hins lóðrétta íshellis. 

Hugsanlega tengist þetta hitasvæði öðru rétt fyrir austan eða norðaustan það, en um það er líklega ekkert vitað nú. 

Á jarðskjálftakorti vedur.is fyrir nokkrum dægrum sást röð skjálfta frá þessu svæði, sem teygði sig til norðnorðausturs nokkkurn veginn eftir kunnuglegum ferli skjálfta í undanfara gossins í Holuhraun 2014. 

Raunar var röðin lengri, alveg suður undir Grímsvötn í suðri og og var hluti að skjálftaröð um Öskju allt norður í Herðubreiðartög. 

Einhvers staðar á þessu svæði í vestanverðum Dyngjujökli virðist vera að myndast svipað fyrirbæri og hefur verið við lýði í Skaftárkötlum fyrir sunnan Bárðarbungu í næstum hálfa öld. 

Þetta nýja og vaxandi jarðhitasvæði færir jarðvísindamönnum ný viðfangsefni og spurningar, sem kalla á svör.

Á neðstu myndinni má sjá jarðskjálftakort dagsins fyrir Vatnajökulssvæðið og á því sést, að enn eru leifar óróans um daginn í gangi, allt frá Bárðarbungu í suðri um Dyngjujökul til Herðubreiðar. 

Sennilegt að jarðhitavatnið eigi upptök vestar í Vatnajökli

Hefðu enn þriggja þingmanna meirihluta.

Ef af ríkisstjórn Vg, Framsóknar og Sjálfstæðisflokks verður að veruleika og allir þeir þingmenn, sem nú samþykkja stjórnarmyndunarviðræður, fylgja stjórninni, hefur slík stjórn 33 þingmenn að baki sér en stjórnarsandstaðan 30, ef þeir tveir Vg þingmenn, sem nú tóku afstöðu gegn viðræðum, greiða afkvæði á móti stjórninni. 

Það hefur áður gerst að flokkar hafi farið í stjórnarsamstarf án þess að allir þingmenn hafi verið samstíga um það. 

Eitt besta dæmið var þriggja flokka stjórn Sjálfstæðisflokks, Alþýðuflokks og Sósíalistaflokks 1944 þegar fimm þingmenn Sjálfstæðisflokksins voru andvígir myndun þeirrar stjórnar og einnig var mjótt á munum á tímabili að samstaða væri um það innan þingflokks Alþýðuflokksins. 

En stjórnin hélt öruggum meirihluta og sprakk af ófyrirséðum ástæðum, utanríkismálum í upphafi Kalda stríðsins. 

Ekki gott veganesti inn í viðræðurnar

Hin yfirvofandi óvissa getur verið nagandi.

Framsóknarmenn guggnuðu á fjögurra flokka stjórn þeirra, Vg, Samfylkingar og Pírata vegna undirliggjandi óvissu um að eins manns þingmeirihluti héldi eins og var hjá stjórninni sem sprakk í september. 

Raunar gengu fjórir þingmenn úr skaftinu í þeirri stjórn í einu og það sýnir að óvissan ge4tur verið bundin við fleiri en einn þingmann. 

Svo að aftur sé vitnað til langs átakafunds hjá Vinstri grænum þegar þeir voru í stjórn með Samfylkingunni í brunarústabjörgunarstjórninni, sýnir reynslan af þeim fundi, að jafnvel þótt eindregin niðurstaða fáist á slíkum innanflokksfundum, getur það iðulega komið upp að aðeins degi síðar sé eins og að engin niðurstaða hafi fundist, - fólk fer aftur í nákvæmlega sama farið. 

Það er afar lýjandi að reyna að leiða stjórnmálasamtök þar sem þannig háttar til, því að fólk tekur miklu meira inn á sig átök við samherja en mótherja. 

Að vísu þarf fleiri en þrjá "villiketti" til að ganga úr skaftinu í V-D-G stjórn, en reynslan úr síðustu stjórn að það er óþægilegt ef vafi getur komið upp um stuðning. 

Efinn er jú oft móðir vantraustsins. 

Óvissa um viðræður