Að ráða vettvangnum og stjórna atburðarásinni.

Það er þekkt lögmál í hernaði og hvers kyns viðureignum og átökum að mikilvægt sé að stjórna atburðarásinni, ráða vettvangnum og nú með því frumkvæði, sem mótherjarnir þurfi að bregðast við.

Eitt afbrigði þessa er svonefnd smjörklípuaðferð sem Davíð Oddsson gaf þetta heiti á sinni tíð; þ.e. að aðili að heitu og mikilsverðu máli varpi fram einföldu smáatriði, sem vegna eðlis síns dregur alla athyglina frá meginmálinu. 

Allt frá valdatöku Adolfs Hitlers til 10. maí 1940 var það hann sem stjórnaði atburðarásinni og vettvangnum í viðskiptum sínum og inna Öxulveldanna við önnur stórveldi. 

Hann og Öxulveldin réðust inn í Rínarlönd, Eþíópíu, Mansjúríu, Kína, Austurríki, Súdetalönd, Tékkóslóvakíu, Albaníu, Pólland, Danmörku og Noreg. 

10. maí hóf Hitler sigurför sína um Niðurlönd og Frakkland, en varð ævareiður við að frétta það að Bretar hefðu sama dag hernumið Ísland.

Nú varð hann að bregðast við og gerði það samstundis með því að skipa Raeder yfirmanni sjóhersins að gera áætlun um að ná Íslandi af Bretum.  

Fram að því höfðu Vesturveldin ævinlega orðið að bregðast við því frumkvæði sem Öxulveldin höfðu, en varðandi Ísland snerist þetta við.

Donald Trump byggði sigurför sína síðastliðið haust á því að gæta þess að hafa ævinlega skýrt frumkvæði í kosningabaráttunni.

Við athugun á því eftir á hefur komið í ljós að hann fékk næstum tvöfalt meiri umfjöllun en keppinautarnir með því að tryggja sér "fyrstu frétt" sem oftast með stórkarlalegum og stundum glæfralegum yfirlýsingum.

Theresa May virtist hafa allt sem þurfti á dögunum til að halda því frumkvæði sem hún náði með óvæntri ákvörðun sinni um kosningar.

Hún gæti í framhaldinu stjórnað atburðarásinni og umræðuvettvangnum.

En síðan gerði hún tvöföld mistök á einu bretti:

1. Kom fram með yfirlýsingu varðandi kjör gamla fólksins án þess að hafa ráðfært sig nægilega við alla þá sem stóðu í kosningabaráttunni með henni.

2. Tók með því upp umræðuefni sem hefur verið klassískt eftirlætis mál allra krataflokka, þar sem þeir hafa kappkostað að gera þann málaflokk að sínum.  

Vængbrotnir kratar tóku því að sjálfsögðu fagnandi að hafa fengið með þessum aðal vettvangi að taka að sér að stjórna atburðarásinni í kosningabaráttunni og nú er jafnvel hugsanlegt að May geti tapað í þingkosningunum eftir viku. 

Þegar Halldór Ásgrímsson varð að láta af formennsku í Framsóknarflokknum og flokkurinn beið síðan mikinn kosningaósigur, var það skýrt dæmi um það, hvaða afleiðingar það geti haft að tapa frumkvæðinu og stjórn atburðarásarinnar. 

Sigmundi Davíð Gunnlaugssyni tókst hins vegar meistaralega 2013 að gera sig og sinn flokk og stefnu hans í málefnum "hrægamma og vogunarsjóða" þar sem þjóðin gæti farið með allt að 700 milljarða króna frá borði, að miðpunkti allrar umræðu í kosningabaráttunni, vinna með því stórsigur og verða forsætisráðherra.

Besta dæmið varð yfirheyrslan yfir honum í sjónvarpi, þar sem fjölmiðlamennirnir, sem reyndu að sinna því höfuðhlutverki að fara ofan í saumana á stefnu Sigmundar, þurftu svo mikinn tíma til þess, að önnur kosningamálefni flokksins féllu algerlega í skuggann.   

Tapar Theresa May meirihluta sínum?

"Hvort eð er" útskýring.

Stundum er notuð afsökun eða útskýring á ýmsu, sem nefna mætti "hvort eð er" útskýring. 

Það er rétt hjá dómsmálaráðherra að Alþingi var ætlaður allt of knappur tími til þess að athuga niðurstöðu, sem sérstök matsnefnd kunnáttumanna hafði fengið margar vikur til að komast að. 

En í stað þess að fallast þá á að fresta endanlegri afgreiðslu málsins um mánuð, kemur "hvort eð er" útskýring,- að niðurstaða matsnefndarinnar hefði hvort eð er ekki verið að fullu samþykkt.

Ein stórkostlegaasta "hvort eð er" afsökun okkar tíma er sú sem virkjana- og stóriðjufíklar nota, sem sé sú, að náttúra Íslands sé "hvort eð er" sífellt að breyta landinu og þess vegna sé í góðu lagi að framkvæma nokkurn veginn hvaða óafturkræfu náttúruspjöll sem er.

Það muni "hvort eð er" verða stórgos í Friðlandi að Fjallabaki, Þingvallavatn muni hvort eð er hækka og flæða yfir Vellina, Mývatn muni hvort eð er grynnka og hverfa smám saman o. s. frv.  

Niðurstaðan hefði ekki fengist samþykkt

Þeir bora líka í bensíngeyma.

Býsna mikil sérhæfing virðist oft á tíðum ríkja í undirheimum og koma til skjala þjófar, sem sérhæfa sig á ýmsan veg.

Nú er gengi á ferð sem stelur hvarfakútum undan bílumm.

Þjófar, sem stálu bíl mínum af bílasölu fyrir fjórum árum vor greinilega atvinnumenn, gengu skipulega til verks og næstum því smásmugulega. Þetta var Toyota 4runner ´92 breyttur fyrir jöklaferðir á 38 tommu dekkjum á afar góðum felgum. 

Dekkin voru ný og þess vegna var bílnum stolið, dekkin og felgurnar hirtar og auk þess sagaðar af bílnum allar breytingar á honumm svo sem gangbretti og brettakantar. 

Borað var gat á bensíngeyminn til að stela bensíninu af honum og haft fyrir því að taka þurrkurnar af bílnum, auk númera. 

Númerin oft notuð til að se5ja á aðra bíla sem notaðir voru til að stela bensini af bensínstöðvum þar sem ekki voru notuð greiðslukort.  

Ég var hársbreidd frá því að upplýsa málið því að sá sem stal bílnum var með viðurnefnið "litli" ef ég man rétt, og gleymdi að færa bílstjórasætið fram á ný eftir að hafa setið undir stýri. 

Fingrafar fannst en munaði örlitlu það væri sönnunargagn.

Auk þess sást til ferða breytts jeppa sem þjófurinn hafði hugsanlega umráð yfir, en aftur munaði hársbreidd að hægt væri að góma hann.  

Ég fékk vitneskju um geymslustað, sem notað væri fyrir alls konar þýfi, en ekki voru næg gögn til að fá fógetaúrskurð til húsleitar. 

Bíllinn fannst lemstraður og strípaður á uppslitnum smádekkjum vestur á Granda. 

Í leiðangri mínum við að leita að 38 tommmu dekkjunum fékk ég sérkennilegt tilboð um að kaupa hálfslitin 38 tommu dekk og felgur á hlægilega lágu verði.

Í gangi er markaður fyrir svona hluti og mig grunaði að þeir sem stálu bílnum stæðu að því að ég fengi smá sárabætur án þess að ég gæti rakið hvaðan þær kæmu.

Það veitti áhugaverða sýn inn í undirheima þjófnaða að vasast í þessu máli og fá smá nasasjón af verkaskiptingu þjófnaðargengjanna.

Sumir sérhæfðir í afmörkuðum vörum eins og dekkjum, felgum eða breyttum bílum.  

Saga hvarfakúta undan bifreiðum