Samsvarar öllum Mýrdalsjökli á síðustu 15 árum.

Þeir, sem lítið gera úr hlýnun loftslags, haga sér svolítið eins og sumir bændur, sem sögðu við mig þegar ég var að gera sjónvarpsþætti um gróðureyðingu á Íslandi, að ég hefði ekkert vit á þessu, því að þeir, heimamenn, vissu það betur en ég að þetta hefði alltaf verið svona. 

Að vísu var ég mikið í ferðum með landgræðslustjóra á þessum tímum svo að þeir áttu erfiðara með þetta gagnvart honum. 

Loks koma að því að ég fékk svörin varðandi fákunnáttu mína í Kaldárrétt. En þar rétt hjá var ég í sumardvöl þrjú heil sumur 1947-49 og þurfti því ekki að láta segja mér hvernig búið var að fara með landið þar. 

Á árunum, sem ég ók Kjalveg í rallkeppni, lagði ég rofabörð á minnið til þess að þekkja helstu beygjurnar. 

Á örfáum árum hurfu þau svo hratt að ég gat ekkert notað slíkt. 

Menn yppta öxlum yfir 500 ferkílómetra minnkun jöklanna á aðeins 15 árum. 

En Mýrdalsjökull er skráður vera rúmlega 500 ferkílómetrar, og þegar sagt er, að á síðustu 100 árum jafi jöklarnir minnkað um alls 2000 ferkílómetra samsvarar það samanlögðu flatarmáli Hofsjökuls og Langjökuls og vel það. 

Jöklarnir hopa hratt og örugglega

Víst munaði einhverju, - annars hefði orðið árekstur.

Ef munur er enginn á milli tveggja farartækja, þar sem þau mætast á þeim stað þar, sem ferlar þeirra skerast, hlýtur að verða árekstur. 

Orðalagið er órökrétt og skárra að segja að það hefði mátt engu muna eða að hafa bara fyrirsögnina eins og fyrstu setninguna, "minnstu mátti muna." 

 

Munaði engu að illa færi

Síendurtekinn flótti frá staðreyndum.

Til eru alþjóðlega viðurkenndar aðferðir við meta slysatíðni á vegum. Ein þeirra er sú evrópska, alvarleg slys á hverja milljón ekna kílómetra. 

Skemmst er frá því að segja að hér á landi hefur ríkt og ríkir enn flótti frá þeim staðreyndum, sem liggja að baki þessari aðferð. 

Svo virðist sem menn geti ekki einu sinni beitt þessu á sambærilega kafla eins og til dæmis á suðvesturhorni landsins. 

Þannig var gersamlega nýr Álftanesvegur látinn hafa forgang yfir alla aðra sambærilega kafla á höfuðborgarsvæðinu 2013, ekki bara þegar hann var lagður, heldur í heilan áratug framundan. 

Þó voru 22 aðrir sambærilegir kaflar með hærri slysatíðni. 

Vel hefði verið hægt að lagfæra veginn sem fyrir var, fyrir brot af þeirri upphæð sem fór í nýja kaflann, sem er nú með lengstu blindbeygju á suðvesturhorninu, ef ekki enn stærra svæði. 

Ruglið virðist halda áfram um víðan völl. 

Útlendingar, sem koma til landsins, hljóta að verða undrandi við það að sjá, að eftir því sem komið er nær Hafnarfirði á leiðinni frá Keflavíkurflugvelli, þrengist vegurinn og verður seinfarnari og hættulegri. án þess að hægt sé að kenna aðþrengjandi byggð um.  

28 slys á kílómetra

Nóbelsverðlaun Obama voru vægast sagt vafasöm.

Sú tillaga, að Bandaríkjaforseti, sem virðist umhugað um að þiggja ekki frið við Íran ef ófriður er í boði, ætti að fá friðarverðlaun Nóbels, felur í sér fáránleikann sjálfan. 

En engum myndi detta í hug að orða þetta núna ef þau mistök hefðu ekki verið gerð að láta Barack Obama fá þessi verðlaun. 

Sú ráðstöfun er að koma mönnum í koll með því að setja vægast sagt vafasöm viðmið varðandi þessi verðlaun. 

Gæti Trump fengið Nóbelinn?