Hótanir og refsiaðgerðir eru ær og kýr Trumps.

Þegar Donald Trump var ekki ánægður með úrslit atkvæðagreiðslu á Allsherjarþingi Sameinuðu þjóðanna, hótaði hann því að hann myndi skrifa niður nöfn þeirra þjóða hjá sér, sem ekki greiddu atkvæði að hans skapi og myndi refsa þeim, þótt síðar yrði. 

Þetta er í fullu samræmi við þær ráðleggingar, sem hann gaf í bók þess efnis, að meðal þess sem fjármálamenn þyrftu að gera til þess að ná árangri í viðskiptum, væri að skrifa niður hjá sér allar ávirðingar keppnautanna til þess að geta hefnt sín á þeim síðar. 

Nú líður varla sá dagur sem Trump hótar ekki þjóðum og fyrirtækjum á báða bóga og boðar refsiaðgerðir á hendur þeim, sem ekki lúta vilja hans í einu og öllu. 

Þetta er hin nýja stefna BNA "to make America great again." 

Trump hótar öðrum þjóðum

Aðalleiðirnar líða fyrir hjáleiðirnar.

Þegar hinn mikli og óhjákvæmilegi niðurskurður á útgjöldum til vegamála skall á í Hruninu var vegakerfið enn langt frá því að vera fullnægjandi fyrir nútíma umferð. 

Við niðurskurðinn, sem hefur raunar staðið síðan þrátt fyrir uppsveifluna af völdum margföldunar tekna af ferðaþjónustu, versnaði ástandið ef eitthvað var. 

Þetta hefur komið óþyrmilega í ljós þegar orðið hafa árekstrar eða aðalleiðir lokast af öðrum sökum, því að þá hefur það orðið ljóst, að hjáleiðirnar eru afar bágbornar og vart bílum bjóðandi. 

Telft á tæpasta vað í þeim efnum og er átta mánaða lokun Þingvallavegar um Bláskógaheiði dæmi um afar slæmar afleiðingar af lélegu vegakerfi. 

Leiðin um Meðalland og sunnanvert Landbrot var lengi vel notuð sem sérleið í ralli, og er enn í dag í slæmu standi. 

Það liggur beint við að verja stærri hluta af tekjunum af umsvifum ferðaþjónustunnar í að bæta þennan hluta innviðanna, sem reynir á í vaxandi mæli. 

 

Rennslið áfram í rénun

"Þjóðin á að éta sig út úr vandanum."

Fyrir um 40 árum óx svonefnt kjötfjall stöðugt, - það var framleitt meira kindakjöt en markaður var fyrir. 

Minnsstæðustu orðin, sem féllu í sambandi við vandann, sem af þessu hlaust, sagði líklega Lúðvík Jósepsson alþingismaður og formaður Alþýðubandalagsins:  

"Það er ein leið út úr þessu: Þjóðin á að éta sig út úr vandanum." 

Í þessu fólst sennilega eins konar þjóðarátak, sem hugsanlega var knúið áfram af niðurgreiðslum. 

Þjóðin borgaði þá sjálfri sér fyrir að borða íslenska lambakjötið. 

En hvenær skyldi koma að því að menn líti nú yfir sviðið og sjái, að í stað þess að bændur á þeim svæðum, þar sem afréttir eru góðir og ekki í mörg önnur hús að venda, eins og til dæmis á norðvestanverðu landinu, fái að halda stofni sínum, en að í staðinn verði hætt beit á viðkvæmustu afréttunum sem eru jafnvel óbeitarhæfir, og bændur styrktir þar til í þessu skyni? 

Þar er í mörgum tilfellum um að ræða svæði, þar sem uppgangur hefur verið í ferðaþjónustu og um fleiri atvinnu- og tekjumöguleka að ræða en til dæmis í Vestur-Húnavatnssýslu. 

Fækka þarf um rúmlega 100 þúsund fjár