Hræðilega illa unnið mat á umhverfisáhrifum oft á tíðum.

Svonefnd Búlandsvirkjun er einhver versta hugmyndin af mörgum slæmum, sem sjá má í upptalningunni í tengdri frétt á mbl.is. 

Áberandi er að virkjanirnar eru yfirleitt með dulnefni hvað snertir að nöfnin greini frá því hvað á að virkja. 

Hvaða Búland er þetta, sem á að virkja? Svar: Auðvitað ekkert Búland. Það er Skaftá. 

Hvaða Kjalalda er það sem á að virkja í Kjalölduveitu?  Svar: Það eru þrír af stærstu fossum landsins. Virkjunin ætti að heita Þjórsárfossavirkjun. 

Skrokkölduvirkjun. Hvaða Skrokkalda er það, sem á að virkja?  Svar: Það á að virkja Köldukvísl. 

Svona má lengi telja. 

Síðuhafi skoðaði mat á umhverfisáhrifum Búlandsvirkjunar fyrir Framtíðarlandið 2011. Það var beinlínis ömurleg lífsreynsla. 

Hvergi var hægt að sjá í matinu að ætlunin væri að þurrka Skaftá upp á kafla, þar sem hún rennur um einstakt hraunhólmalandslag með kvíslum sem erlendir ljósmyndarar tóku andköf yfir, og einnig að tortíma fimm fallegum smáfossum norður af bænum Skaftárdal. 

Í skýrslu verkfræðistofunnar var þess getið sem smávægilegs og auðleysanlegs verkefnis að beina heilu Skaftárhlaupunum ummerkjalaust framhjá virkjuninni. 

Í skýrslu vegna virkjunar Hólmsár í næsta nágrenni var kjarr skilgreint sem lyng, lyng skilgreint sem gras og gras skilgreint sem mosi! 

Þetta var sýnt á fundi eystra á sínum tíma.  


mbl.is Myndi spilla ummerkjum Skaftárelda
Tilkynna um óviðeigandi tengingu við frétt

Atburðir og andrúmsloft erlendis höfðu áhrif hér 1918.

Kristján 10. var konungur í sambandsríki Danmerkur og Íslands árið 1918. 

Um vorið gerðu Þjóðverjar síðustu tilraun sína til að vinna sigur í Heimsstyrjöldinni fyrri með stórsókn á vesturvígstöðvunum í Frakklandi sem byggðist á því að Rússar voru slegnir út úr stríðinu um veturinn og þá gátu Þjóðverjar flutt herafla af austurvígstöðvunum til Frakklands. 

En þessi sókn var dæmd til að mistakast, því að nú höfðu Bandaríkjamenn slegist í hóp Bandamanna og komnir með mikið og öflugt herlið á vesturvígstöðvarnar. 

Í ræðu til frönsku þjóðarinnar í júní 1940 minnti Petain forseti leppstjórnarinnar á það til að réttlæta uppgjöf Frakka fyrir Þjóðverjum, að í lok Fyrri heimsstyrjaldarinnar hefðu Bandamenn Frakka lagt til 185 herdeildir samanborið við 20 vorið 1940. 

Kristján 10. var mikill áhugamaður um það að Danir endurheimtu Slesvík og Holtsetaland í fyrirsjáanlegum stríðslokum, land, sem Þjóðverjar tóku af þeim rúmri hálfri öld fyrr.  

Það hjálpaði til í þessum málatilbúnaði að séð var að Þjóðverjar myndu tapa í stríðiu mikla, og Wilson Bandaríkjaforseti setti í 14 punktum sínum fram kröfuna um sjálfsákvörðunarrétt þjóða sem stórveldin höfðu sölsað undir sig á undanförnum öldum. 

Íslendingar höfðu krafist sjálfstæðis og fullveldis og það leit ekki vel út fyrir Dani að harðneita slíkum óskum en krefjast á sama tíma sjálfsákvörðunarréttar fólksins í Slésvík-Holstein. 

Það var að vísu ekki bein tenging á milli þessara tveggja mála, en í þessu alþjóðlega andrúmslofti var þrefað í samninganefnd Dana og Íslendinga með þeim árangri sem var síðan negldur niður 15. maí. 

Endanlegt samþykki Kristjáns 10. gaf hann með semingi með von um að konungssambandið gæti enst lengur en í 25 ár. 

1918 ríkti það alþjóðlega andrúmsloft að þjóðir eins og Pólverjar og Ungverjar fengju frelsi og fullveldi og að við Íslendingar gætum átt von um að verða með í þessari bylgju nýfrjálsra þjóða. 

Í dag berast þær fréttir til okkar á fullveldisdaginn að Mannréttindadómstóllinn í Strassborg kveður upp endanlegan úrskurð sem hefur áhrif hér á landi.

Og það fylgir líka, að þessi úrskurður er kveðinn upp í andrúmslofti, sem hefur skapast vegna þróunar fyrirkomulags stjórnmála í Póllandi og Ungverjalandi. 

P.S. Nú er lagið Frelsisvor komið á facebook síðu mína í tilefni dagsins. 


mbl.is Niðurstaðan veldur vonbrigðum
Tilkynna um óviðeigandi tengingu við frétt

Ísland 1918: Dánartalan samsvaraði 2000, eldgos í lok langverstu kreppunnar.

Tveir dagar á árinu 1918 standa upp úr í sögunni: 15. júlí þegar samkomulag varð um Sambandslögin svonefndu, sem tryggðu Íslendingum fullveldi og rétt til þess að gerast lýðveldi 25 árum síðar og síðan fullveldisdagurinn sjálfur, 1. desember, fyrir réttum 102 árum. 

Að þjökuð og sárafátæk örþjóð á mörkum hins byggilega heims skyldi áorka þessu er kraftaverk, sem vert er að mun meira á lofti en gert hefur verið.  

Árið áður, 1917, hafði dunið yfir langversta efnahagskreppa 20. aldarinnar, sem gerir núverandi kreppu að hjómi einu í samanburðinum, svo langt niður fóru lífskjör þjóðarinnar, neðar en í kreppunni miklu á fjórða áratugnum.  

Árið hafði byrjað með frostavetrinum mikla og nýlokið var miklu Kötlugosi sem olli gríðarlegu tjóni. 

Verst var þó drepsóttin, sú versta síðustu tvær aldir, sem geysaði haustið 1918 og var ljúka við að leggja 500 manns í gröfina þegar fullveldisdagurinn var þó haldinn hátíðlegur.  

Talan 500 gefur ekki rétta mynd, því að þjóðin er fjórum sinnum fjölmennari nú en þá, þannig það þessi dánartala samsvaraði 2000 látnum nú. 

Hvernig skyldi okkur líða nú ef 80 sinnum fleiri væru dánir úr drepsótt en horfst er nú í augu við? 

Ofan á þetta bættist að Ísland var eitt fátækasta land Evrópu. Bílaöldin var ekki komin enda landið að mestu vegalaust og ekki bílfært á milli landshluta.

Flug var ekki komið né útvarp og meirihluti húsakosts torbæir. 

Þegar alls þessa er gætt, er full ástæða til að lúta höfði og votta þeim formæðrum og forfeðrum okkar virðingu, sem sem barðist við óblíð öfl en eygði þó von um að þrátt fyrir þessar aðstæður væri að renna hér upp frelsisvor í krafti einbeittrar jákvæðni og baráttuhugar. 

 

FRELSISVOR. 

 

Frelsisvor - framtíðarspor! Frelsisvor - áræði´og þor!

 

Það var árið með drepsótt og eldgos og ís

en samt árið sem birtist oss vonanna dís. 

Líkt og morgunsól albjört í austrinu rís

hófst nú öld þegar lausnin var vís.  

 

Þá var sungið um vorið hið ljúfasta ljóð

eftir lamandi vetur með svita og blóð. 

Það var söngur um frjálsa og fullvalda þjóð

og hinn fegursta hugsjónaóð. 

 

Eftir aldanna böl var loks birtu að sjá

þegar brustu hér hlekkirnir þjóðinni á. 

Máttur fjöldans úr læðingi leystur var þá

svo að ljómaði gleði á brá. 

 

Frelsisvor - framfaraspor! Frelsisvor - áræði´og þor!

 

Síðan flogin er glæsileg framfaraöld

þegar færð voru´í landið hin ítrustu völd; 

þegar lýðveldi stofnaði fagnandi fjöld

svo að fært var á sögunnar spjöld. 

 

Landið og fólki, lifandi mál, 

ljóðin og sögurnar, þjóðlífsins sál, 

tónar og myndir, formæðra fjöld, 

fósturjörð hjartkær, andi og hold!

 

Undir fánanum bjarta nú brunar vort fley

inn í brim nýrrar aldar í vonanna þey. 

Þó að gefi á bátinn þá æðrumst við ei, 

heldur eflist hver sveinn og hver mey. 

 

Enn er sungið um vorið hið ljúfasta ljóð

þegar logar á tindunum jöklanna glóð. 

Það er söngur um frjálsa og fullvalda þjóð

og hinn fegursta hugsjónaóð. 

 

Frelsisvor - framfaraspor!  Frelsisvor - áræði´og þor!


mbl.is „Búið ykkur undir nýja bylgju“
Tilkynna um óviðeigandi tengingu við frétt

Bloggfærslur 1. desember 2020

Innskráning

Ath. Vinsamlegast kveikið á Javascript til að hefja innskráningu.

Hafðu samband