"Stærsta leiksýning veraldar".

Á svæðinu milli Vatnajökuls og Suðurjökla (Mýrdalsjökuls og Eyjafjallajökuls) á sér stað stærsta leiksýning veraldar, sem kalla mætti The Greatest Show on Earth á ensku.

Með 3-500 ára millibili verða þarna stærstu eldgos á Íslandi, 930, 1480 og 1783.  Eldgjárgosið 930 er stærsta gos sem vitað er af á jörðinni á sögulegum tíma, stærra en Skaftáreldar.

Leiksýningin skiptist í goskafla og sandburðarkafla. Þegar gaus 930 rann hraun allt niður í Meðalland og fór yfir land sem áður hafði ýmist gróið upp eða farið undir aurburð ánna á svæðinu.

Síðan kom uppgræðslu- og aurburðarkafli fram að Skaftáreldum, en hið nýja Skaftáreldahraun rann þá yfir það svæði sem gróður og sandur höfðu numið.

Nú stendur yfir uppgræðslu- og aurburðarkafli þar sem aur frá Skaftárkötlum og nýr gróður eins og mosi þekur æ stærra svæði af hrauninu, sem rann 1783.

Hver sá, sem fer um þetta svæði og fær að vita á hvað hann er að horfa hlýtur að hrífast af því að vera áhorfandi að "Stærstu leiksýningu veraldar".

Hugmyndir um virkjanir á svæðinu hafa miðað að því að grípa inn í þessa miklu leiksýningu náttúrunnar líkt að ruðst væri upp á svið í leikhúsi, þar sem verið væri að sýna grískan harmleik eða harmleik eftir Shakespeare og, og "tekið í taumana."

Nú um stundir er maður ekki viðræðuhæfur um hluti nema að allt sé mælt í peningum, því miður. Ég er þess fullviss að miklu meira fé er hægt að fá út úr þessu svæði með því að auglýsa það upp á viðeigandi hátt til að efla þar ferðamennsku heldur en með því að einblína á virkjanir.

Sá ágóði er til frambúðar og auk þess fæst heiður og virðing sem út af fyrir sig má meta til fjár í formi viðskiptavildar.

Umsvif af virkjanaframkvæmdum standa hins vegar aðeins yfir í nokkur ár og gróðahugsunin á bak við þær er mótuð af afar mikilli skammsýni.

Hugsunin er líka afar ágeng, samanber orðalagið "Búlandsvirkjun verður reist lengra frá Langasjó". Sem sagt: Hún verður reist, hvað sem tautar og raular, og fer þá fyrir lítið ályktun landsfundar Samfylkingarinnar 2009 þar sem lýst var þeirri stefnu flokksins að friða allt svæðið á milli Vatnajökuls og Suðurjökla.

Búlandsvirkjun verður reist lengra frá Langasjó

Athugasemdir

[Ómar S. Jónsson, 3.8.2011 kl. 23:02]

Búlandsvirkjun er aftarlega á lista yfir virkjanakosti í rammaáætlun.  Þessi frétt gæti hafa orðið til vegna áhuga virkjunarmanna til að koma henni  framar í röðina. Sem borinn og barnfæddur Vestur-Skaftfellingur skil ég ekki áhuga þeirra á þessum virkjanaáformum.  Þessar virkjanaframkvæmdir skapa að aðeins vinnu og tekjur í héraði  meðan á þeim stendur. Orkan verður síðan notuð í öðrum landshlutum.  Þá er búið að skemma ósnortið land og draga stórlega úr gildi þess fyrir ferðamenn og aðra sem unna ósnortinni náttúru.  Ferðaþjónusta er eina atvinnugreinin sem er í sókn á þessu svæði. Röksemdum með virkjunum þarna mætti kannski líkja við það að það skapaði lækninum vinnu að tappa blóðinu af sjúklingnum.

[Ólafía Jakobsdóttir (IP-tala skráð) 4.8.2011 kl. 01:00]

Fyrirhuguð virkjanaáforn í Skaftárhreppi eru hreint út sagt skelfileg fyrir náttúruna, landslag, lífríki og samfélag. Það á einfaldlega að láta jökulárnar í Skaftárhreppi í friði og nýta náttúruna á sjálfbæran hátt fyrir landbúnað, ferðaþjónustu og þekkingarstarfsemi.

Ég reyndi að blogga um fréttatilkynninguna en tókst ekki að tengja. Hér er slóð á bloggið mitt. Vona að Ómar Ragnarson fyrirgefi  mér það.   http://www.olafiaj.blog.is/blog/olafiaj/