Hvernig getur svona gerst ?

Blæðandi þjóðvegir svo hundruðum kílómetra skiptir í heilu landshlutunum hlýtur að vera einsdæmi í heiminum og spurningarnar hrannast upp.

Um lönd heims liggja milljónir kílómetra af bundnu slitlagi og stór hluti þeirra vega liggur um lönd, sem eru á norðurhveli og með veðurskilyrði sem eru oft lík því sem hér er, til dæmis á Norðurlöndunum.

Af hverju gerist þetta allt í einu út um allt og það bara í einu landi? Og söngurinn hans Bubba byrjar strax að hljóma: Ekki benda á mig. 

Í lögfræði er hugtakið bona fide viðurkennt, að menn séu í góðri trú, - grandalausir. Þeir ökumenn, sem hafa orðið fyrir tjóni gátu ekki annað en verið í góðri trú þegar þeir fóru út á vegi, sem eiga að standast sömu kröfur og vegir í öðrum löndum. 

En myndin, sem fylgir fréttinni á mbl.is segir mikla sögu. Hvernig í ósköpunum gat ökumann bílsins, sem tættist í sundur, átt von á öðru eins?

Raunar er "þetta reddast" hugsunin víða í gerð samgöngumannvirkja hér á landi. Til dæmis er notað lélegt grágrýti í bundna slitlagið á götum Reykjavíkur margfalt endingarminna en er í nágrannalöndunum og myndi líklegast ekki staðist kröfur í þeim löndum. 

Þess vegna slitna göturnar í Reykjavík svo hratt að djúpar og varasamar vatnsfylltar rásir myndast á götunum og svifryk er miklu meira af völdum slits sem negldir hjólbarðar valda en vera þyrfti. 

 

 

Blæðandi þjóðvegur stórhættulegur

Athugasemdir

[GB (IP-tala skráð) 22.1.2013 kl. 12:54]

EES samningurinn sem bannaði stuðning við strandsinglingar var mikill happafengur og ESB verður vart verri. Bráðum kemst maður ekki norður nema siglandi..

[Jack Daniel's, 22.1.2013 kl. 14:17]

Lestu hérna Ómar.

Ísland er eina landið í heiminum í dag sem notar klæðningar á vegina sem mest umferð er á.  Í öðrum löndum er þetta hreinlega bannað.

[Jósef Smári Ásmundsson, 22.1.2013 kl. 15:07]

Þetta skil ég nú ekki alveg Jack minn.Hvað með alla malbikuðu vegina í Noregi.Hvað meinarðu?

[Ari (IP-tala skráð) 22.1.2013 kl. 15:08]

Ætli þetta sé enn ein afleiðingin á einu mesta efnahagshruni vesturheims, sparnaður á vegaefni eða eitthvað þvíumlíkt sem leiðir til þessa.

[Guðjón Sigþór Jensson, 22.1.2013 kl. 18:45]

Líklegt er að einhvers konar fúsk hefur viðgengist við efnisnotkun í vegagerð.

Mjög vel ígrunduð skýring á hvað gerist má lesa í færslu Ágústar H. Bjarnasonar:

http://agbjarn.blog.is/blog/agbjarn/entry/1278311/

Umferð þungra ökutækja er allt of mikil miðað við hvernig stofnvegir voru lagðir fyrir um 20-25 árum. Þeir þola einfaldlega ekki alla þessa þungu umferð.

Góðar stundir.

[Guðmundur Eyjólfur Jóelsson, 22.1.2013 kl. 20:25]

Malbik og klæðning eru 2 ólíkir hlutir og þessi handabakavinnubrögð eru til skammar ,það er betra að fara hægar í hlutina og gera það almenninnilega.

Það er alveg rétt Guðjón eftir að strandsiglingar lögðust af þá urðu vegirnir á Íslandi ónýtir og reynt að lappa upp á þá með bráðabirgðaviðgerð.Það er sjaldan horft til lengri tíma í þeim efnum samanber suðurstrandarveginn á hann var lögð klæðning hvað má búast við að hann endist lengi?

[Jack Daniel's, 22.1.2013 kl. 20:33]

Jósef Smári.  Hér á landi er notuð tjörudrulla sem er sullað niður á undirlagið og síðan hörpuð möl sett yfir og þetta kallað malbik.  Á mannamáli heitir þetta klæðning og búið er að banna þetta á vegum í Evrópu þar sem þungaumferð er mikil svo ég tali nú ekki um hraðbrautir og aðra vegi þar sem umferðarþungi er mikill.  Það má nota þetta til viðgerða í neyðartilfellum en ekkert annað.

Malbik er bik sem er soðið saman og flutt á staðinn á vörubílum og lagt með sértökum vélum sem eru til þess gerðar í 10 til 20 cm lögum.  Oftast eru notuð tvö þykk lög, 20 cm að jafnaði og síðan sett slitlag ofan á sem er um 7 til 10 cm þykkt.  Slík vegagerð þekkist ekki hér á landi enn sem komið er en væri farið að ESB reglum væri skylt að leggja þannig malbik á hringveg 1.

[Þorvaldur S (IP-tala skráð) 23.1.2013 kl. 03:45]

Hvað ætli vegur með malbiksslitlagi samtals 47-50 sentimetra þykku kostaði?

Er ekki eitthvað saman við þessar tölur?

[Karl J. (IP-tala skráð) 23.1.2013 kl. 10:12]

Steypa er einnig mikið notuð á stórar umferðaræðar erlendis, Reykjanesbrautin hin eldri var steypt og ekkert alltof langt síðan malbik var lagt ofan á það. Annars voru það mikil mistök að steypa ekki nýju tvöföldunina, færa umferðina yfir og rífa malbikið upp af gömlu steypunni og gera hana steypta aftur.

[Jósef Smári Ásmundsson, 23.1.2013 kl. 10:48]

Þakka þér fyrir þessar upplýsingar Jack.Þetta vissi ég ekki.En það kemur fram hjá vegagerðinni að repluolía hefði verið notuð sem íblöndunarefni í malbikið.Hvernig má það vera ef ekki hefur verið malbikað.Hafa þeir sett þetta á undirlagið í stað tjörudrullunnar og síðan mölina yfir?

[Guðmundur Ásgeirsson, 25.1.2013 kl. 01:08]

Komið hefur í ljós að kadmíumblönduðu iðnaðarsílikonmalbiki var um að kenna.

FME og seðlabankinn hafa nú þegar gefið út tilmæli um leiðréttingu: hærri vexti.