GPS má aldrei koma alveg í staðinn fyrir allt annað.

Marg sinnis kemur það fyrir að ofurtrú á gps tækjum leiðir fólk á villigötur.

Fyrir allmörgum árum tók ég á leigu bíl á Amsterdamflugvelli og ætlaði til Neckarsulm í Bæjaralandi.

Stillti inn og ók af stað. Það var ágæt tónlist í útvarpinu og um sitt hvað að spjalla þannig að það leið alltof langur tími þar til ég áttaði mig á því að eitthvað var ekki eins og það átti að vera.

Endalaus og tafsamur akstur um þrönga sveitavegi.

Loks hætti ég að fara eftir tækinu, fann góða hraðbraut og komst á gott skrið, en hafði tapað dýrmætum tíma.

Slökkti á gps tækinu og notaði bara gömlu kortalestursaðferðina. 

En fyrir bragðið hafði ég kynnst vel hinu raunverulega "blauta Hollandi" sem Jón Hreggviðsson skálmaði um á leið til Kaupmannahafnar.

Fann síðar út að tækið hafði verið stillt á stystu leið en ekki fljótförnustu leið.

Í fyrra býsnaðist ég yfir því við Inga R. Ingason, tengdason minn, sem var í heimsókn hjá mér austarlega í Grafarvogshverfi, að flugmálayfirvöld væru búin að láta fjarlægja gps tæki úr ýmsum einkaflugvélum, og það hefði komi sér illa daginn áður.

Þá hefði ein þeirra á leið frá Akureyri til Reykjavíkur meldað sig yfir norðanverðum Kjalvegi og sögðust flugmennnirnir ekki vitað hvar þeir væru og ætti aðeins eftir fimm mínútna flugþol.

Allt var sett í gang, Fokker beðinn að svipast um eftir vélinni, en skömmu síðar kom kall frá henni, og sögðu flugmennirnir að þeir sæju flugbraut framundan og myndu lenda á henni.

Kom þá í ljós að þetta var flugvöllurinn í Vík í Mýrdal.

Ingi hafði litla samúð með gpslausu flugmönnunum og sagði að auðvelt væri að nota góðan snjallsíma til að nota gps á honum.

Ég trúði honum varla, svo að hann tók upp snjallsímann minn og sýndi mér hvernig hann gæti virkað á staðnum sem við stóðum á, skammt frá Borgarholtsskólanum.

"Hér stendur meira að segja stórum stöfum, hvar þú ert niður kominn núna" sagði Ingi.

Ég leit á nafnið, sem blasti við, og svaraði: "Víst efa ég ekki að svona snjallsímar geti sýnt hvar maður er staddur svart á hvítu, en þótt þeir séu snjallir ættu þeir ekki að vera spá svona fram í tímann."

"Hvað meinarðu? spurði Ingi.

"Jú,",svaraði ég, "sjáðu hvað stendur hérna um það hvar ég er niður kominn:  GRAFARVOGSKIRKJUGARÐUR!" 

  

Þar munaði um r-ið!

Athugasemdir

[Gunnar Heiðarsson, 2.2.2016 kl. 00:11]

Það eru margar spaugilegar sögur til um GPS tæknina. Sjálfur var ég með konu minni í Minneapolis og höfðum við bílaleigubíl til afnota. Eitt kvöldið, þegar við ætluðum út að borða, valdi ég matsölustað í tækinu flotta. Síðan var ekið af stað og eftir að hafa þrætt íbúðagötur um nokkuð langa stund komumst við loks á leiðarenda. Engan matsölustað var þar þó að finna, einungis auða byggingalóð sem greinilega hafði staðið auð í áratugi.

Þarna hafði einhver spaugari, sem leigði tækið á undan mér, sett í mynni þess þennan matsölustað og valið staðsetningu hans á auðri lóð.

Eftir þetta tók ég upp fyrri háttu og fann matsölustaði á korti áður en lagt var af stað frá hóteli.

[Haukur Kristinsson (IP-tala skráð) 2.2.2016 kl. 10:47]

 "GPS má aldrei koma alveg í staðinn fyrir allt annað."

Þetta er rétt en gildir einnig um allra flugumferðastjórn. Aldrei treysta henni 100%. Fylgjast vel með hvar maður er og með annarri flugumferð. Nógu mörg slys hafa orðið vegna mistaka hjá "controle".

[Haukur Kristinsson (IP-tala skráð) 2.2.2016 kl. 11:10]

Edit: control.

[Gestur (IP-tala skráð) 2.2.2016 kl. 12:46]

Held að í þessu tilfelli sé ekki við GPS tækið að sakast þar sem ferðamaðurinn sló heimilisfangið sem auglýst var inn, kemur þar inn sú leiðinda árátta fyrirtækja við Laugaveginn í Reykjavík að setja inn Laugarvegur þegar þau auglýsa heimilisfang sitt.

[Ómar Ragnarsson, 2.2.2016 kl. 14:39]

Þegar maður er á ferð með gps tæki í bíl erlendis er oftast greint frá því í hvaða borg, fylki eða ríki viðkomandi staður sé.

Síðan er náttúrulega einstakur sofandaháttur fólginn í því að aka langt framhjá Reykjavík án þess að átta sig á því.