Enn tveir mánuðir eftir af vetrinum.

það hefur verið áberandi í vetur, að hitaspár veðurfræðinga hafa oft verið of lágar, og að skipting veðurs úr hlýindum yfir í kalda norðanátt hefur ekki nærri því alltaf ræst, né heldur hefur kuldinn orðið eins mikill og spáð var. 

Meira að segja hefur norðaustanáttin hvað eftir annað borið hlýtt loft yfir landið, og meira en fimm stiga meðalhiti á Akureyri undanfarnar vikur er ótrúlega há tala. 

Á bilinu 10-15 febrúar er meðalhiti lægstur í Reykjavík, en það þýðir að ennþá eru tveir mánuðir eftir af vetrinum, frá 20. febrúar til 20. apríl, og þeir mánuðir hafa oft orðið kaldir þau ár, sem tíð hefur verið óvenju hlý fyrr um veturinn.

Svo að ennþá má búast við flestu af því sem vetur konungur getur tekið upp á til að sýna veldi sitt.    

Alvöru vetrarveður á leiðinni

Athugasemdir

[Þorsteinn Briem, 17.2.2017 kl. 17:04]

Alltaf sumum er nú kalt,
allir Trumpinn kjósa,
lítið vit og loft þar svalt,
loks þeir saman frjósa.

[Daníel Sigurðsson, 17.2.2017 kl. 19:25]

Skv. gamalli árstíðaskiptingu, sem kennd er við Snorra Sturluson, byrjar vormisserið á vorjafndægri sem er í kringum 20 mars.  þetta árið nákvæmlega 20. mars.  Engin ástæða að reyna að hafa vit fyrir Snorra með þetta.

[Ómar Ragnarsson, 18.2.2017 kl. 01:57]

Samkvæmt núgildandi almanaki er síðasti vetrardagur í ár 19. apríl og fyrsti sumardagur 20. apríl. Samkvæmt hitatölum er meðalhiti um það leyti 3,3 stig í Reykjavík, eða sá sami og er í lok október. 

3,3 stig verða seint talin til hlýinda. 

[Daníel Sigurðsson, 18.2.2017 kl. 19:52]

Gallinn við svokallað “núgildandi“ almanak er sá að skiptingin felur aðeins í sér tvær árstíðir en ekki fjórar.  Vor- og haustárstíðum er sleppt.   Þessi skipting misvitra manna kemur þó ekki í veg fyrir að vor og haust sé í vitund almennings.  Almennt þá vill fólk viðhald skiptingu ársins í fjórar árstíðir en ekki bara tvær.   Að negla niður dagsetningu á sumardeginum fyrsta en kasata dagsetningu byrjun vors fyrir róða og láta svífa í lausu lofti, eins og byrjun hausts, er bara rökleysa og rugl.    Snorri heitinn Sturluson áttaði sig alveg á þessu og kom með mjög vel röksutdda ástæðu fyrir skiptingunni sem hann valdi.  Þar skipa náttúrulögmálin stóran sess þegar hann velur jafndægrin sem ráðandi hlut.  En þau ákvarða annars vegar lok vetrar og byrjun vors (í kringum 20. mars) og hins vegar lok sumars og byrjun hausts (í kringum 20. sept.).   Lengra mál er að gera grein fyrir árstíðaskipingu Snorra vor/sumar og haust/vetur en eru eigi að síður vel rökstuddar.