Burt með BMW til að gera "Bandaríkin mikilfengleg á ný"?

Donald Trump dreymir um að gera Bandaríkin mikilfengleg á ný ( make America great again ) og innifalið í því er að bandarískur bílaiðnaður komist á svipað stig og hann var á fram til 1960 þegar meirihluti bíla heims var framleiddur þar og Packard og síðar Cadillac voru "standard of the world", bestu lúxusbílar heim. 

Hámark gæðanna í bandarískri bílaframleiðslu náðist á fyrstu tíu árunum eftir stríð. 

En þá fór samkeppnin innanlands að valda því að sett var í forgang að framleiða sem allra nýjastar gerðir og sem allra flesta bíla á kostnað gæðanna. Gott dæmi um þetta voru bílar Chrysler verksmiðjanna 1957 og árin þar á eftir, sem voru að vísu glæsilegir útlits og á undan í útliti ( "suddenly it´s 1960!") en liðu fyrir ryðsækni og bilanir. 

Það var dæmi um skyndgróða skammsýni að auglýsa að með bílum af 1957 árgerð væri komið árið 1960, því að þegar 1960 kom, voru bílarnir orðnir úreltir í augum kaupendanna. 

Á árunum eftir 1955 byrjaði innflutningur á ódýrum, litlum evrópskum bílum að vaxa vestra, og 1960 gripu allar "þrjár stóru" bílaverksmiðjurnar til þess að framleiða ódýra bíla til að mæta þessari samkeppni: Ford Falcon, Chevrolet Corvair og Chrysler Valiant.

Til að selja sem flesta Ford Falcon voru þeir bílar hafðir afar einfaldir og reiknað með því að þeim væri hent eftir 2-4 ára notkun. 

Japanir og Þjóðverjar fundu í þessu veikan blett á bandarísku bílaframleiðslunni og gerðu strandhögg á bandaríska markaðnum með litlum gæðabílum sem smám saman stækkuðu eftir því sem háskólafólkið, sem var upphaflegi markhópurinn, varð eldra og tækjuhærra.

Þetta bar þann árangur, að um 1990 höfðu Benz og BMW hrundið Cadillac af stalli sínum og sótt að bandarískum bílum af öllum stærðum.

Nú kvartar Donald Trump sáran yfir bílainnflutningi frá Þýskalandi og einkum er BMW skotspónn hans.

Hann hótar að setja háan innflutningstoll á Bimmerinn svo að kjörorðið "make America great again" verði að veruleika.

Þetta er auðvitað brandari. BMW er rokdýr í Bandaríkjunum og vinnuaflið Þýskalandi dýrt á alþjóðamælikvarða. Samt rokselst hann. Af því að hann er betri.

Að vísu er róbótatæknin í framleiðslunni orðin svo mögnuð, að hægt er að framleiða hluta bílanna í Mexíkó þar sem er ódýrt vinnuafl, en engu að síður verða gæðin að vera í fyrsta flokki til að bílmerkið haldi stöðu sinni.  

Þegar Benz setti M-jeppa sinn á markað var hann meira að segja framleiddur í Bandaríkjunum sjálfum.

Hann og aðrir þýskir gæðabílar gætu ekki hafa selst svona vel fyrir stórfé nema vegna þess að þeir voru og eru betri en sambærilegir bandarískir keppinautar.

Í stað þess að senda bandaríska bílahönnuði og bílaframleiðendur að teikniborðunum til að framleiða betri bíla "to make America great again" í raun og veru og gera betri bíla en Benz og BMW, ætlar Trump að fara uppgjafarleið að takmarkinu.

Því að í því felst í raun alger uppgjöf að geta ekki framleitt betri bíla en útlendingar og beita efnahagsþvingunum til þess að bola óþægilegum keppinautum burt af markaðnum.  

Þýskaland skuldi gífurlegar fjárhæðir

Athugasemdir

[Þorsteinn Briem, 18.3.2017 kl. 23:12]

Donald Trump í sinni sveit,
sjáið hversu hann er greit,
engum líkur,
afar ríkur,
með Ingjaldsfífli hann á beit.

[Helgi (IP-tala skráð) 19.3.2017 kl. 09:44]

Sæll.

Greining þín á falli bandaríska bílaiðnaðarins er röng. Skoðaðu aðeins þau áhrif sem UAW hefur haft. Bandaríski bílaiðnaðurinn er nú staðsettur annars staðar en bara í Detroit. Obama gerði svo illt verra með því að sturta peningum skattgreiðenda í bílaiðnaðinn í Detroit í kringum síðasta hrun. 

Ég er hins vegar alveg ósammála Trump varðandi það að Bandaríkjamenn hafi gert slæma viðskiptasamninga undanfarið, tek að sumu leyti undir það sem þú segir varðandi það. Vandi þeirra liggur annars staðar.

Eftir situr samt að enginn gerir heiðarlega tilraun til þess að greina hvers vegna kjósendur þar vestra kusu manninn? Ég spurði þig að þessu um daginn án þess að fá svar. Hver er þín skoðun?

[Ómar Ragnarsson, 19.3.2017 kl. 15:39]

Þegar framleiðslugrein er hvorki samkeppnisfær innanlands né erlendis hjá "the greatest nation on earth" er orsakanna fyrst og fremst að leita í framleiðsluvörunni sjálfri. 

Það sem ég segi um ástæður þess að þýskir, japanskir og suður-kóreskir bílar seldust æ betur byggi ég á því að hafa skoðað ítarlega árlegar sölutölur einstakra gerða og tegunda, lesa umfjallanir um gæði bilanna og bandaríska bílaiðnaðinn í hundruðum óháðra bóka og tímarita í 60 ár. 

[Ómar Ragnarsson, 19.3.2017 kl. 15:46]

Trump tókst það sem hann er bestur í: Að ná meiri athygli fjölmiðla og samfélagsmiðla en allir aðrir frambjóðendur beggja flokka til samans. Hann var og er langtímum saman fyrsta frétt. 

Sá sem nær því að velja sér vettvanginn eða orrustuvöllinn auk þess að knýja fram það plan og yfirbragð umræðunnar, sem hentar honum best, og nær að koma andstæðingunum niður á sama plan, sem sagt, að stjórna umræðunni og atburðarásinni, var búinn að leggja besta hugsanlegan grunn að því að vinna sigur í þeim ríkjum þar sem þetta hentaði best.

Þvi að ekki fékk hann meirihluta samanlagðra atkvæða.

Í hnefaleikunum og íþróttunum er þetta orðað svona á ensku: "he succeeded in fighting his fight."