"Minnkandi flugvélasæti" að hálfu leyti villandi orðalag.

Það er ekki fyrr en í lok annars ágætrar fréttar á mbl.is sem það kemur í ljós að með orðalaginu "minnkandi flugvélasæti" er átt við enska orðið "pitch" sem táknar það, hve langt bil er á milli sætaraða í flugvélum, en sú vegalengd hefur ekkert með stærð sætanna að gera, heldur eingöngu bilið á milli sætaraða. 

En þetta bil ræður því hve mikið rými er fyrir hnén á farþegunum, og ef hnén ná alveg fast upp að sætaröðinni fyrir framan, verður ómögulegt fyrir fólk sem situr í innri tveimur sætunum, að komast út á ganginn, nema að þeir, sem eru nær ganginum, standi upp og fari á undan út á ganginn. 

Til fróðleiks má geta þess, að þegar meðalmaður að stærð situr í sæti, er fjarlægðin frá sætisbakinu, sem hann er með bakið upp að, og fram að afturbrún sætisins fyrir framan um 66 sentimetrar eða 26 tommur. 

En vegna þess að sætisbök verða að vera að lágmarki um 5 sentimetra þykk og sum eru reyndar þykkari, sést að 71 sm "pitch" veldur því að meðalmaður er með hné sín fast upp að sætinu fyrir framan hann. 

Sú þróun að minnka þessa fjarlægð um 10 sm að meðaltali síðustu 40 ár er alveg á skjön við það að meðalstærð fólks hefur vaxið um 5-10 sm á þessum árum. 

Það er nefnilega lengd lærleggsins sem skiptir mestu máli varðandi hæð fólks, og það er einmitt lengd lærleggsins sem skiptir máli varðandi það að nægt rými sé fyrir hnén hjá farþegunum. 

 

Rannsaki dularfullu minnkandi flugvélasætin

Athugasemdir

[Ragna Birgisdóttir, 30.7.2017 kl. 22:11]

Ég var samferða hópi íslenskra golfara til Portúgal fyrir nokkrum árum og ferðuðumst við með flugvél sem var einstaklega "þröng" .Stærð fjölmargra manna þarna í hópnum var yfir 1.90 og sárvorkenndi ég þeim sem reyndu að sitja samanreknir í sætum sínum kvaldir og engin furða að starfsfólkið hafi verið pirrað vegna þess að stanslaust ráp þessarra manna gerði störf þeirra enn erfiðari.Þetta er varla boðlegt lengur þessi þrengsli í venjulegum farþegavélum. En auðvitað geta þeir sem hafa aurana borgað fyrir betri sæti....það er eins og í heilbrigðiskerfinu :)

[Jóhannes Birgir Jensson, 30.7.2017 kl. 23:07]

Sæll Ómar.

Fréttin er ekki rétt reyndar, í upphaflegri frétt kemur líka fram "Average seat width has narrowed from about 18 inches (46 cm)to 16.5 inches (42 cm) over the last decade."

http://www.reuters.com/article/us-usa-planes-idUSKBN1AD28Y

[Þorsteinn Briem, 30.7.2017 kl. 23:53]

Á móti kemur að Framsóknarflokkurinn er alltaf að minnka.

[Hannes (IP-tala skráð) 31.7.2017 kl. 01:09]

ÉG hef haft gaman af því að ferðast en hef ekki nokkurn áhuga á því lengur þar sem ég get ekki gegnið að því sem vísu að geta sest nema þurfa að byrja að láta færa mig þar sem ég er 196cm og það þó borgað sé fyrir auka rými.

[GunniS, 31.7.2017 kl. 10:55]

eru þessar vélar búnar til í Asíu, ? fólk þar er minna en í Evrópu. en þessi sæti eru í þægilegri stærð fyrir 10 ára.