Veðrið er alveg nógu gott mestallan veturinn.

Satt er það, að Ísland er að jafnaði einhver vindasamasti staður jarðar frá desember til marsloka.

En á milli lægða koma oft ágætir dagar með mildu veðri, eins og var í gær.

Í kvöld verða komnir meira en tveir sólarhringar með allt að átta stiga hita. 

Þá er hrein hressing og unun fólgin í því að teyga hreint loft og fara ferða sinna á hjóli. 

Og eftir þriggja ára reynslu af notkun tveggja ódýrra hjóla, rafreiðhjóls og léttrar Honda PCX "vespu" sem aðalfarartækja, hefur komið í ljós að það er hægt að láta þessa farkosti koma að notum í stað bíla allar vikur ársins ef rétt er að málum staðið, hafa góð vetrardekk og réttan klæðnað og öryggisatriði (lokaður hjálmur, vélhjólaklossar og varnarhanskar). 

Fyrir mann, sem á heima utarlega í úthverfi leysir hraðskreiðara hjólið samgönguvandann betur en bíll hvað snertir það að vera fljótur í förum, vandræðalaust. 

Auk þess sem tilvist hjólsins í umferðinni þýðir í raun, að rými sparast fyrir einn bíl í stað þess einkabíls, sem hjólamaðurinn hefði annars ekið.  

Ef vindhviður fara ekki yfir 20 m/sek (hægt að tékka á því á vedur.is)  er vindurinn ekki aðal vandamálið á vespu-hjólinu, heldur mikill tjörupækilsaustur á dögum með slíkum skilyrðum. 

Á rafreiðhjólinu kemur sér vel að þessi tjörpækilsaustur er ekki fyrir hendi á hjólastígum. 

Og sé tíminn naumur og veglengdirnar langar á slíkum dögum hefur minnsti og ódýrasti rafbíll landsins komið sér vel síðustu mánuði, auk þess sem svona stuttur bíll sparar rými í umferðinni og auðveldar það að finna stæði, sem aðrir bílar geta ekki notað.  

Athugasemdir

[Hallgrímur Hrafn Gíslason, 4.2.2018 kl. 07:29]

Ég hef grun um að þú sért ekki mikið á ferðinni á þessum hjólum snemm morguns yfir vetrartímann þegar ekki er búið að hreinsa vel gangstíga og brautir.

Og helvíti held ég að þú sér vel pæklaður og með skert útsýni í þessum pækli sem ýrist upp , með umferðinni, af götunni, þegar bílstjórar þurfa að rúðupissa stanslaust til að hafa óhindrað útsýni.

[Ómar Ragnarsson, 4.2.2018 kl. 13:57]

Lestu betur það sem ég segi. Ég er ekki á ferðinni á vélhjólinu þegar pækillinn er mikill heldur á rafreiðhjólinu á gangstígum, þar sem enginn slíkur pækill ýrist upp eða þá á minnsta rafbíl landsins í pæklinum á götunum. 

Ég á oft erindi eldsnemma dags, til dæmis nú síðasta á föstudaginn.