Skjálftar á norðurleið?

Um daginn kom nokkuð stór jarðskjálfti við mynni Fagradals suðaustur af Upptyppingum og Herðubreið og var fjallað dálítið um hann hér á blogginu með tilvísun í skjálftahrinu á þessum slóðum 2007-2008 sem fór frá Upptyppingum norðaustur í Álftadalsbungu og þaðan til norðvestus yfir Krepputungu yfir í Herðubreiðartögl og Herðubreið. 

Nú sjást nýir skjálftar norðar og er annar þeirra tvö stig á Richter. 

Þeir sýnast vera norðar en skjálftarnir komust í 2008. 

Þegar litið er á skjálftakortið af vedur.is sést að virknin núna er á nokkuð beinni línu frá Bárðarbungu eða Dyngjujökli og norður um Herðubreið.

Nýjustu skjálftarnir á kortinu eru rauðlitaðir 

Á eftir gosinu mikla í Öskju 1875 gaus í Sveinagjá sem er um 20 km fyrir norðan Herðubreið. 

Annar nýjustu skjálftanna er milli Eggerts og Hrúthálsa, en hinn á Kverkfjallaleið um tíu kílómetra fyrir sunnan Möðrudal. 

Allt svæðið norðan Vatnajökuls austur að Hálslóni og Kárahnjúkum er á hinum eldvirka hluta Íslands og því ávallt forvitnilegt að fylgjast með jarðhræringum, þótt þær þurfi svo sem ekki að boða neitt sérstakt. 

Athygli vekur skjálftahrúgan í Öræfajökli, sem er líka nokkuð nýtt hin síðari árin. 

En það tók Eyjafjallajökul 16 ár alls, frá 1992 til 2010, að safna í eldgosið sem kom Íslandi á hvers manns varir um alla jörð. 

Skjálftahrinan í Öræfajökli kom í morgun, og skjálftarnir eru örlitlir. En samt nægilega margir til þess að setja þarf sérstaka vakt á fjallið, líkt og gert var 1999 með Eyjafjallajökul. 

Athugasemdir

[Jón Frímann Jónsson, 7.4.2018 kl. 07:13]

Jarðskjálftinn sem þú vísar í var villa í kerfinu hjá Veðurstofunni og var eytt út nokkru síðar. Enda kom þessi atburður ekki fram á neinum þeim mæla sem ég er með í gangi og jarðskjálfti að stærðinni 3,3 gera það alveg óháð því hvar þeir verða á landinu.

Hjá Global Volcanism Program er ekki neitt eldgos skráð í Sveinsgjá rúmlega 20 km norðan við Öskju (Upplýsingar, https://volcano.si.edu/volcano.cfm?vn=373060). Það getur auðvitað verið að það vanti upplýsingar í gagnagrunn Global Volcanism Program.

Samkvæmt jarðfræðikorti sem ég á þá eru Herðubreiðarfjöll eldstöð innan sprungusveims Öskju, ekkert stór eldstöð en nægjanlega stór til þess að valda veseni ef þar yrði eldgos skyndilega.

[Jón Frímann Jónsson, 7.4.2018 kl. 07:16]

Ég sá að Sveingjárgosið er fellt undir eldgosið 1875. Ég tók auðvitað eftir þessu eftir að ég var búinn að senda inn fyrra svarið.