Tær snilld. Miklu verra hjá hinum flokkunum í öllum skilningi.

Klaustursmálið er nú komið hringinn og snýst ekki lengur um það sem raunverulega var sagt á barnum og á sér engin dæmi í umræðum, sem sannanlega hafa farið fram, heldur um tvennt sem er miklu verra:

Annars vegar miklu svakalegri ummæli þingmanna annarra flokka en þeirra, sem áttu fulltrúa í umræðunum sem voru tekin upp, og þessi svívirðilegu ummæli þingmanna annarra flokka teljast vera staðreynd þótt engin áþreifanleg gögn séu til um þau. Undir þessu situr nú þorri allra þingmanna. 

Hins vegar eru álíka slæm eða verri ummæli, sem sett hafa verið niður í reyfarakenndum leikritum og eiga að sýna það sama, að þingmenn Miðflokksins og Flokks fólksins, sem voru sannanleg á barnum, séu þeir þeir skástu á þinginu, já, nánast hreinir kórdrengir í samanburðinum við þingmenn annarra flokka! 

Málið er komið í hring. Glæpurinn felst í því að vinstri sinnaðir samsærismenn hafi staðið fyrir því að tekin voru upp hin sönnuðu ummæli, og að þingmenn VG, Samfylkingar og Sjalla hafa sagt miklu verra, bæði i raun og í uppskrifuðum leikritum eða reyfurum. 

Dæmið hefur snúist við: Skáldskapurinn er sannari en sannanlegur veruleikinn. Skúrkarnir, með versta orðbragð allra, eru ofsækjendur fórnarlambanna á Klausturbarnum.  

Nú verður leikur einn að skrifa leikritsreyfara fyrir þúsund sinnum stærri markað, - Bandaríkin - um verstu skúrka síðari áratuga þar í landi, Deep Throat og blaðamennina á Washington Post, sem birtu illa fengnar og ólöglega fengnar upplýsingar um Nixon forseta, ofsóttu hann og hröktu úr embætti. 

 

VG og Samfylkingin sitja á bar

Athugasemdir

[Húsari. (IP-tala skráð) 17.12.2018 kl. 07:52]

Sæll Ómar.

Maður, líttu þér nær!

Þessi pistill þinn er skrifaður
af ótrúlegri rætni og illkvittni.

Ráðlegg þér eindregið að hætta
að hræra í þessu blóði svo ekki
komi það yfir þig sjálfan svo sem oft vill
verða í lögmáli orsaka og afleiðinga.

Jól eru handan hornsins, - hefur þú ekkert annað að gera?

[Bjarni Gunnlaugur (IP-tala skráð) 17.12.2018 kl. 08:46]

Það er að verða nokkuð þreytandi þessi eineltisrök sem víða er slegið fram og pistill er angi af að "svo megi böl bæta að benda á annað verra" eða að ekki afsaki það hegðun eins að benda á hegðun annars. 

Fólk sem vill af ýmsum ástæðum "pönkast" endalaust á ákveðnum aðilum og langt út fyrir allt tilefni, nýr þeim sama um nasir að vilja fría sig sök þegar bent er á að mjög sé valkvæmur siðferðisstaðall þeirra er að vikomandi finna. 

Klausturstalið léttvægt sem það raunverulega er (einkaspjall léttkendra aðila) er mun meinlausara en stöðug kynferðisleg áreitni (án þess að tekin sé afstaða í málum þeirra kratafyrirmenna Á.Ó. og H.H. hvar ávirðingar eru þrátt fyrir allt meintar en þó sumar játaðar).

Augljós hefur orðið í þessum málum hlutdrægni RÚV og undirþjónkun þess apparats við vinstri sinnuð pólitísk og eða ESB sinnuð öfl einkum á rófi Samfylkingar. 

Til dæmis var ekki orð að finna um málið á vef RÚV tveim dögum eftir að upp kom í fréttum um mál Helga Hjörvars,né neitt um mál Ólafs Á. en hvorki meira né minna en þrjár Klaustursbarstengdar fréttir náði RÚV að kreista úr sér þá síðustu tvo eða þrjá daga. 

Stærsta fórnarlambið í þessu samfélagsmiðlaða upphlaupi er þó líklegast sú hugmynd að reka hér ríkisútvarp.  

[Ómar Ragnarsson, 17.12.2018 kl. 11:21]

Það eru aðrir en ég sem hafa "hrært í þessu blóði" daglega að undanförnu og sett hræruna í nýjan kraft, svo að þetta er aftur orðið "mest lesið" hér á blogginu. 

Ekki hefur verið minnst á Klausturmálið hér á síðunni í tvær vikur á sama tíma og aðrir bloggíðuhafa hafa verið jafnvel með fleiri en einn pistil á dag um það, og því fráleitt að kenna mér um þær nýju víddir og hæðir, sem málið hefur nú verið keyrt í af öðrum en mér.