Búinn að gefa tóninn: "Ekkert að flýta mér"?

Það getur verið misjafnt, hvort það sé jákvætt eða neikvætt að breyta um stefnu eða hegðun í samræmi við nýjar upplýsingar eða aðstæður. 

Þegar herskáar og ógnvekjandi yfirlýsingar Bandaríkjaforseta fyrir tveimur árum í garð Norður-Kóreu eru bornar saman við kúvendingu, sem nú virðist orðin hjá honum í garð einræðisherrans í því ríki kúgunar og sults, er hægt að túlka það sem varasama eftirgjöf. 

Um alllangt skeið hafa Norður-Kórea og Venesúela verið nefnd í sömu andránni sem dæmi um skipbrot kommúnismans. 

En olíuauðurinn í Venesúela ræður áreiðanlega mestu um það, hve hart Bandaríkjamenn sækja í að "fjárfesta í" ( les: eignast) þessum auði og nýta sér hrun landsins. 

Á tímabili eftir að Kóreustyrjöldinni lauk ríkti mikil spilling í Suður-Kóreu og efnahagurinn var ekki beysinn. 

Sem dæmi má nefna að svo seint sem 1986 voru framleiddir 130 þúsund bílar í landinu, en aldarfjórðungi seinna voru þeir orðnir 30 sinnum fleiri, fjórar milljónir, fleiri en Frakkar, Bretar og Ítalir framleiða samanlagt!  

Landið hafði risið úr öskustó og er nú eitt af helstu iðnríkjum heimshlutans. 

Og þessi endurfæðing er líklega ástæða þess, hvernig Trump hefur kúvent gagnvart Norður-Kóreu. 

Það eru fyrst og fremst Suður-Kóreumenn sem neyðast til að friðmælast við þjóðbræður sína, vegna þess að hinn kosturinn; kjarnorkustríð, er ekki í boði. 

Suður-Kóreumenn og Japanir eru afar mikilvægir bandamenn Bandaríkjamanna í Asíu og því er vel, að Trump reynir frekar að leysa vandamálin á svæðinu á friðsamlegan hátt heldur en að láta sverfa til stáls. 

Ef honum tekst það, fær hann prik frá síðuhafa. 

 

 

, 

 

 

Trump tilfinningaríkur á Twitter

Athugasemdir

[Gunnar Rögnvaldsson, 28.2.2019 kl. 02:47]

Fyrsta verk Trump var að koma böndum á einræðisherrann (e. containment). Það hefur hann gert og hann gerði það með því að hóta eldi og brennistein (e. deterrence). Öll tilraunaskot hættu frá og með  haustinu 2017. Engar rakettur hafa flogið yfir höfuð nágrannaríkjanna. Og allar prófanir á langdrægum eldflaugum sem ná til Bandaríkjanna eru hættar.

Hvað meira viltu Ómar á fyrstu tveimur árum Trumps í embætti? Þetta er vandamál sem hefur fengið að grasseera frá því að NK hljóp frá sáttmála sem gerður var við það árið 1985. Við erum að tala um raunheima en ekki teikniborð.

Trump sá að einræðisherrann var ekki klikkaður eins og ætlun hans var að reyna að frá alla til að halda. Í staðinn gerði Trump sjálfan sig óúrreiknanlegan og einræðisherrann trúir því, vegna þess að Bandaríkin hafa efni á að vera óútreiknanleg, þegar að svona málum kemur. Þess vegna óttast einræðisherrann þau. Kína líka óttast þau líka.

Næsta skref er að komast áfram án þess að viðurkenna NK formlega sem kjarnorkuveldi. Reyna að beina því inn á braut sem er betri en sú sem landið er á. Það er ekki víst það að það takist. En einræðisherrann veit að Trump hefur líf hans og stjórnar hans í hendi sér. Ekki að kostnaðarlausu, en í hendi sér samt.

Bandamann einræðisherrans reyna því að koma höggi á Trump hvar sem þeir geta um allan heim, til að hönd hans um háls einræðisherrans sé ekki með eins öruggt tak á lífi hans. Til dæmis eru þeir að í Venesúela og í stjórnarandstöðunni í Bandaríkjunum sjálfum. Og líka hér á þessari síðu þinni, sýnist mér.

Kveðja

[Ómar Ragnarsson, 28.2.2019 kl. 08:09]

"Ef honum tekst það, fær hann prik frá síðuhafa." Þarf ég að segja meira?