Þegar orðin tímamót á Reykjanesskaga.

Svo er að skilja á vísindamönnum, að nú séu likur meiri á eldgosi en að það gjósi ekki. 

En héðan af skiptir það ekki máli, því að jafnvel þótt mælingar vanti frá fyrri öldum, sem eru sambærilegar við nútíma mælingar, er kyrrstöðutímabilinu frá lokum umbrotatímans fyrir 800 árum lokið. 

Myndin hér við hliðina er tekin á Grindavíkurvegi, og er fellaröðin vestur af Fagradalsfjalli vinstra megin, en Þorbjarnarfell hægra megin. 

Svo var að sjá á skjálftakorti núna áðan að jörð skylfi þarna þvert yfir myndflötinn, en að eins og væri, yrði lítið gos í Nátthaga líklegast lengst til vinstri á myndinni.

Ekki finnast sambærilegir 14 mánuðir með jarðskjálftahrinur sem allir á Reykjanesskaga finna mí þessum mæli mánuðum saman. 

Þegar svona stendur á er aðalhættan sú, að mönnum gleymist, að framundan gæti verið 400 ára langt tímabil eða jafnvel enn lengra, þar sem gýs á hverri einustu öld. 

Til þess að átta sig á því þarf svolítið víðari sýn en að segja sem svo efit hvert gos: Nú er þessari hrinu lokið og hægt að slappa af í hundrað ár.  

Rétt eins og að ákafir fylgendur gerðar alþjóðaflugvallar í Hvassahrauni segi:  Það rann að vísu hraun ofan í Straumsvik fyrir 900 árum, en það er miklu lengra síðan hraunið, sem flugvöllurinn á að standa á, rann.  

Með svona röksemdafærslu gefa menn sér að hægt sé að ráða því, hvar og hvenær gýs á margra kílómetra langri gossprungu, sem hér eftir getur opnast hvenær sem er.  

Skjálfti 4,3 að stærð fannst víða

Athugasemdir

[Vagn (IP-tala skráð) 16.3.2021 kl. 03:30]

Flugvöllur er tiltölulega ódýrt mannvirki og þó flugvöllur fari undir hraun þá raskar það ekki miklu í daglegu lífi fólks. Það er verra ef hraun stöðvar flutning á heitu vatni, köldu og rafmagni. Ef þjóðvegir lokast. Og ef rýma þarf heilu bæjarfélögin.

Að skipuleggja flugvöll á stað sem gæti einhvern tíman lent undir hrauni er því í góðu lagi. Flestir flugvellir á Íslandi gætu orðið ónýtir vegna hinna ýmsu náttúruhamfara sem geta riðið yfir á morgun eða næsta ár eða eftir 1000 ár. Og þá redda nokkrar jarðýtur og haugur af malbiki nýjum flugvelli á nokkrum dögum. Það eru engin geimvísindi að malbika flugbraut.

Kyrrstöðutímabilinu frá lokum umbrotatímans fyrir 800 árum er ekkert endilega lokið núna, hafi það verið til. Ef verið er að tala um jarðskjálftana þá gæti þetta verið ein af mörgum svona hrinum á síðustu 800 árum. Og ef eldgos eru mælikvarðinn þá eru vísbendingar um nokkur eldgos í sjó á þessum 800 árum og enn er ekki hafið neitt eldgos á landi til að enda tímabilið. Við gætum þurft að bíða önnur 800 ár eftir næsta eldgosi á þessum slóðum. Það gæti allt eins gosið nokkrum sinnum í Vestmannaeyjum, Heiðmörk og Viðey áður en gýs nálægt fyrirhuguðu flugvallarstæði, Öskju, Kötlu og Heklu og þúsund öðrum stöðum sem við höldum að aldrei muni gjósa.

Eldgos eru einstaklega léleg í líkindareikningi og kunna ekkert á dagatöl.

[Horður Þormar (IP-tala skráð) 16.3.2021 kl. 11:33]

Þann 3. maí 1943 rakst bandarísk flugvél á Fagradalsfjall í dimmviðri. Meðal farþega sem fórust var Frank Maxwell Andrews yfirhershöfðingi sem var á leið til Bretlands til þess að skipuleggja innrás Bandamanna í meginland Evrópu.

[Ómar Ragnarsson, 17.3.2021 kl. 11:34]

Þetta var í sjálfu sér jafn heimssögulegur viðburður og ef Dwight D. Eisenhower eftirmaður hans hefði farist þarna. 

Þessi tiltekna Liberator B-24 flugvél var fyrsta bandaríska sprengjuflugvélin sem náði því að fara í 25 leiðangra yfir Þýskaland og beið ásamt áhöfn sinni eftir því að verða heiðruð fyrir það sérstaklega.

Í staðinn varð að bíða í nokkra mánuði með það að láta B-17 vélina Memphis Belle taka við þessum verðlaunum og alla tíð síðan vekur sú vél mikla athygli, hvar sem hún er á ferðinni. 

Marshall varnarmálaráðhera sagði síðar að Andrews hefði að sínu mati verið lang hæfasti maðurinn til að gegna embætti yfirmanns alls herafla Bandamanna í Evrópu.