Stundum þarf aðeins eitt orð í texta til að lama hann.

Þótt jarðefnaeldsteyti eins og kol sé loksins komið inn í texta loftslagssamnings minnir breyting á orðinu að "hætta" í að "minnka" á hliðstæður úr textagerð laga og samninga á tilfelli, þar sem aðeins eitt viðbótarorð verður til þess að ónýta textann.  

Til dæmis stóð hér á árum áður styrr um orðalag um notkun stefnuljósa í umferðinni og endaði það mál þannig, að þeir sem andæfðu skyldu til notkunar þeirra, sem birt var í upptalningu á þeim aðstæðum, sem bílstjórar ættu að gefa ljós, fengu því framgengt að á undan upptalningunni var bætt orðinu "einkum".  

Þetta var gert, en afleiðingarnar urðu þær að ákvæðið varð gersamlega máttlaust. Hvergi í okkar heimshluta er viðlíka ástand og hér. Engu er likara en að meirihluti líti svo á að það sé óþolandi skerðing á persónufrelsi hvers og eins að skylda til notkunar stefnuljósa, þer sem það á við og gerir gagn.  

Svipað má segja um það, þegar andófsmenn gegn stjórnarskrárákvæði um auðlindir vilja setja orðið "að jafnaði" inn í textann.  

Vissulega væri æskilegt að nóg framför fáist með hinum útvatnaða texta í Glasgow, en með orðalagsbreytingunni opnast engu að síður leið til að lama textann alveg. 

Það opnar á leið til þess að hver þjóð um sig reyni að komast af með sem allra minnstri minnkun framleiðslunnar. 

Segir samninginn vera „fall fram á við“

Athugasemdir

[Bjarni (IP-tala skráð) 14.11.2021 kl. 19:47]

Þeir eru ekki víðförlir sem halda að umferðarmenningin á Íslandi sé slæm.

[Ómar Ragnarsson, 14.11.2021 kl. 22:03]

Ég hef kynnst umferðinni í mörgum tugum landa í öllum heimsálfum og hún er vissulega verri og vanþróaðri en hér í mörgum löndum sem nefnd eru þróunarlönd. 

En hins vegar yfirleitt mun betri en hér í okkar heimshluta. 

Ef skipt væri um bílstjóra á torginu við Sigurbogann í París á einni svipstundu, þannig að að allt í einu væru allir bílstjórarnir Íslendingar, yrði þar stærsti fjöldaárekstur ársins innan fimm mínútna.