"Við lifum ekki lífið af, - er það, - eða hvað?"

"Þökkum það, sem guð oss gaf, 

við gleði´og sorg

og söng og skraf. 

Við lifum ekki lífið af, 

er það?

Eða hvað?

 

Einhvern veginn svona hefst ljóð sem ber heitið "Vangaveltur í óendanleikanum" og fjallar um lífið og tilveruna.

Strax í upphafi ljóðsins er tæpt á því einfalda atriði, sem mætti orða á þann veg, að ekkert eitt atriði í tilveru fólks sé eins lífshættulegt og það að fæðast. 

Dauðinn er það eina sem er fullkomlega víst fyrirbæri hjá hverri lifandi veru, líka hjá konungbornu fólki eins og Elísabetu annarri Bretadrottningu. 

Í allri umfjöllun um hverja lifandi manneskju eru það tvær viðmiðunarpunktar sem marka hana, fæðingin og dauðinn, og setja mörkin fyrir lífshlaup eða ævi viðkomandi mannveru,

Það að elli hafi orðið 96 ára gamalli mannveru að aldurtila þykir frétt, en er það kannski ekki í raun og veru, heldur óhjákvæmilegur fylgifiskur samspils lífs og dauða. 

 

Upplýst um dánarorsök drottningar

Athugasemdir

[Húsari. (IP-tala skráð) 5.10.2022 kl. 01:21]

Sæll Ómar.

Lífsháskinn er við hvert skref, frá vöggu til grafar, en blessunarlega
vita það fæstir.

Af hverju ekki "í gleði´ og sorg" sem ætti hvað best
við um lífið allt?

Steinn Steinarr skrifar um Magnús Ásgeirsson, skáld og þýðanda við lát hans:

"...hvernig má það ske, að þessi skæri logi lífs og snilldar
sé nú að engu orðinn."

Nærtækust er kenning Einsteins um orkuna sem umbreytist frá
einu sviði til annars og þannig hljóti að vera um allt líf
í alheimi. (ekki gleyma því að allt er lífs og lifandi
þó okkur sé tamt að sjá það ekki þannig)

Hjartsláttur allrar skepnu í alheimi slær sama takti
og örlög alls þessa þau sömu að umbreytast í sífellu frá einu formi til annars eins og áður var rakið.

Kalt og malt þá mætti það skoðast sem sjálfhverfa að geta ekki sætt sig
við að dauðinn eru endalokin þá og strax er hann ber að.

Vitnisburður fjölmargra bendir til að þetta sé ekki svo heldur sé það skynvilla mannsins að sjá ekki allar þær aðrar víddir alheims sem svo margir segja að "fjallgrimm vissa er fyrir því" eins og Jón Ósmann
orðaði það!

Mestar líkur eru fyrir því að allar línur hvers einasta lífs alheimsins
hafi verið ákveðið að meginhluta til fyrir billjónum ára; við upphaf sitt.

Allt annað er úrvinnsla, langflestum óskiljanleg.

Far að dæmi Sáls konungs og kallaðu fram þann Samúel hvar þú vilt leita
véfrétta og svarið berst í svefni eða vöku og tak mark á því
þó það komi fram í öðru en þú reiknaðir með.