Samræmt íslenskt málfar: Aðilar, meðlimir og samnemendur.

Oft er engu líkara en í gangi sé samræmd aðför að fjölda góðra og gegnra íslenskra orða í formi andlausrar notkunar eins konar tískuorða, sem fara eins faraldur um orðaforðann.

Eitt snilldarorðið, "líðsmeðlimir" lítur dagsins ljós í viðtengdri frétt á mbl. 

Hvers á orðið "liðsmenn" að gjalda, tvö atkvæði i stað fjögurra? 

Orðið "áhafnarmeðlimur" hefur fyrir löngu orðið að síbylju og nær útrýmt ágætum orðum eins og "skipverji" og þar með orðinu áhöfn. 

Næsti áfangi gæti orðið að eyða orðinu ríkisstjórn og taka upp "ríkisstjórnarmeðlimur". 

Að ekki sé nú talað um orðið "aðili" sem veður um og slátrar góðum og gegnum orðum. 

Sum þessara nýju og ömurlegu orða eins og "samnemandi" skilja eftir sig slóða af drepnum orðum, samanber skólabróðir, skólasystir, skólafélagi, skólasystkin...

Björgunarsveitarfólk er orðið að "viðbragðsaðilum" og enginn er maður með mönnum, afsakið "aðili með aðilum" nema að drattast með viðhengið "aðili" af einu eða öðru tagi.  

Svara gagnrýni þjálfara og fljúga þeim út

Athugasemdir

[Húsari. (IP-tala skráð) 26.2.2023 kl. 01:32]

      Það verður að segja síðuhafa til hróss að hann hefur einstakt
lag á að koma athugasemdum sínum um málfar á framfæsri.

Í mínum huga er það svo að aldrei hafi nokkrum bloggara
farnast þetta betur og ber hann reyndar höfuð  herðar yfir alla aðra í þessu efni.

[Wilhelm Emilsson, 26.2.2023 kl. 03:37]

Skemmtilegur og gagnlegur pistill. Í greininni frægu "Politics and the English Language" bendir George Orwell á að húmor virkar vel í baráttunni fyrir betra máli og skýrari hugsun. Lokaorð síðuhafa eru gott dæmi um þetta