"Farið ekki langt!" "Ekki missa af !"

Oft hef ég skemmt mér yfir því þegar þessar skipanir hljómar í ljósvakamiðlum. Einver gaur fann þetta upp fyrir mörgum árum og síðan apa aðrir eftir.

Mér finnst fyrri skipunin hlægileg þegar ég er kannski nýlagður af stað í tímapressu í langferð og í útvarpinu er mér er allt í einu skipað að fara ekki langt. Ef eitthvað hvetur mig til að skipta um rás, þá er það þetta.

Í ljósvakamiðlum er hvimleið árátta til að hagræða sannleikanum, en aðall fjölmiðlunar á einmitt að vera að segja sannleikann.

Til dæmis þann sannleika að til þess að afla tekna fyrir útsendingunni þarf að vera með sem flestar og mestar auglýsingar. Þær eru oft ekki aðeins langdregnar heldur er æsingurinn svo mikill í leiknum auglýsingum að þær verða þreytandi. Þegar allt, sem auglýst er, er "frábært" og nánast hrópað á mann, hlýtur niðurstaðan að verða sú að ekkert er eftir annað en þetta frábæra.

Orðið frábært er eitt af þeim orðum sem hefur verið verðfellt hvað mest á Íslandi.

Síðan hef ég aldrei heyrt rétt sagt frá lengd auglýsinga í ljósvakamiðlum, heldur er því oft logið að þær taki "örskamma stund" og meira að segja ekki nefndar sínu rétta heiti, "auglýsingar", heldur "örstutt skilaboð" þegar í raun er um langa auglýsingarunu að ræða.   

Í ljósvakamiðlunum er sífelld árátta til að æra upp óþol í neytendunum með því að vera í tíma og ótíma með skipunina "ekki missa af". Ekki missa af þessu og ekki missa af hinu!

En lífið er nú einu sinni þannig að maður missir óhjákvæmilega af flestu sem á boðstólum er, - kemst ekki yfir nema mjög takmarkað og verður að sætta sig við það.

Amma mín upplifði til dæmis Kötlugosið 1918 í návígi og sagði mér frá því, en ég missti alveg af því.

Missti líka af því að vera á Þingvöllum við lýðveldisstofnuna 1944.  

  

  

Athugasemdir

[Árni Guðmundsson (IP-tala skráð) 13.7.2014 kl. 00:23]

Ein er útvarpsstöð sem ég hlusta mjög oft á, en ég skifti yfir á aðra stöð , þegar Gamall þulur SKIPAR mér að. Þú VERÐUR að hlusta. En, frekar að ég ÆTTI  að hlusta, því að það er margt áhugavert í dagskránni.

[Sæmundur Bjarnason, 13.7.2014 kl. 09:22]

Allur þessi skyldulestur á fésbókinn er líka óttalega leiðigjarn.

[Ómar Ragnarsson, 13.7.2014 kl. 23:24]

Það ræður því hver um sig hvað hann telji "skyldulestur á fésbókinni. Ég sé miklu fleiri jákvæðar en neikvæðar hliðar á henni.