Efsta sætið til enda af því að báðir tapa ?

Tyrkneska knattspyrnulandsliðið virðist vera á góðri siglingu um þessar mundir og keppir að því að komast í umspil með því að komast í þriðja sæti riðilsins og fella Hollendinga út.

Hollendingar standa frammi fyrir ögurstundu í næsta leik vegna þess mikla hnekkis sem það getur orðið að komast ekki inn á EM. Þeir verða að vinna Tékka og treysta á að Íslendingar sjái um að Tyrkir haldi ekki þriðja sætinu.  

Bæði Íslendingar og Tékkar eiga á hættu að tapa næstu leikjum sínum, en það myndi þýða óbreytta stöðu þeirra í riðlinum sem tvær efstu þjóðirnar í lokin, með Íslendinga efsta.  

Engum hefði dottið í hug svona staða fyrirfram.   

Ísland heldur toppsætinu - Tékkar töpuðu

Tónn agaskorts var gefinn í fyrri hálfleik.

Eftir að Íslendingar voru í krafti djarflegs leiks komnir í tveggja marka forystu rétt eftir miðjan fyrri hálfleikinn fóru að koma brestir í hinn sænska aga sem hefur einkennt liðið síðustu misseri.

Menn fóru aðeins of langt út úr stöðum sínum og voru aðeins of seinir til baka til að koma vörninni til aðstoðar.

Örlítill herslumunur og einbeitingarleysi á mikilvægum augnablikum voru nóg til að gefa Lettum færi á að jafna leikinn.

Þessi tónn var gefinn strax í seinni hluta fyrri hálfleiks og við hann losnaði liðið ekki í síðari hálfleik.

Nú þarf að skerpa sænska agann og samheldnina til þess að setja undir þennan leka og þá mun sólin skína á heiði að fullu á ný.

Jafntefli gegn Lettum

Á loksins að fara að dæmi Norðmanna?

Norðmenn komust að þeirri niðurstöðu að eini raunhæfi kosturinn varðandi sjúkrahús í Osló væri að reisa nýtt sjúkrahús frá grunni en fara ekki út í bútasaum, eins og þeir töldu víti til varnaðar í Þrándheimi.

Hvort sjúkrahúsið á Akureyri er alveg sambærilegt við þessi norsku dæmi er erfitt að segja í fljótu bragði.

En setningin: "Nýbygging er eini raunhæfi kosturinn" er vafalaust rétt út af fyrir sig.

Nýbygging eini raunhæfi kosturinn

Ein af komandi afleiðingum launahækkananna ?

Í pistlum hér á síðunni þegar stærstu kjaradeilurnar voru í gangi var farið yfir reynsluna af stórfelldum launahækkunum í þrjá aldarfjórðunga.

Hún var ævinlega sú, að ef hækkanirnar fóru yfir ákveðin mörk, knúðu þær af stað víxlhækkanir launa og verðlags með tilheyrandi verðbólgu og gengisfellingu krónunnar þannig að kaupmáttur jókst sáralítið.

Spurt var hvað hefði breyst, þannig að þetta gerðist ekki nú og bent á, að hlutur sveitarfélaga og ríkis væri meiri nú í launagreiðslum en áður, og þessir opinberu aðilar ætti í meginatriðum aðeins um tvennt að ræða: Að fækka starfsfólki og hagræða eða að hækka opinber gjöld launþega.

Nú hefur fyrsta hækkunin af mörgum dunið yfir hjá Reykjavíkurborg, stórfelld hækkun gjalds fyrir afnot sundlauga, og gefið upp, að það sé aðeins byrjunin.

Litlu sveitarfélögin úti á landi eiga enn erfiðara en hin stóru að mæta launahækkunum starfsfólks og spurningin er aðeins hvort fækkkun starfsfólks og minni þjónusta, hækkun gjalda, eða hvort tveggja fer að dynja yfir.

Opinberum störfum fækkar í Borgarbyggð

Aðeins eftir 22 % af árinu fyrir 58 % útgjaldanna ?

Ef það er rétt hjá Vigdísi Hauksdóttur að 230 milljónum hafi verið varið í viðhaldsframkvæmda á innanlandsflugvöllum í ár, en að 545 milljónir sé hins vegar áætlun Isavia, er ljóst að til þess að þeim peningum verði varið í þessar framkvæmdir þarf að nota 22% ársins til að framkvæma fyrir 58% útgjaldanna.

Þessi 22% ársins eru vetrarmánuðir og vægast sagt bjartsýni að segja að framkvæmdahraðinn verði næstum þrefaldaður á þessum óhentuga árstíma til þess að koma öllu í lóg.

Af hugsjón held ég úti næst stærsta flugvelli landsins sem öryggisflugvelli á hálendinu og þarf að borga Isavia fyrir það gjöld.

Þessi rekstur svona stórs flugvallar næstum því eins langt frá Reykjavík og hugsast getur kostar mig að meðaltali 6-800 þúsund krónur á ári og ég hefði svo sem ekkert á móti því eftir 15 ára rekstur flugvallarins, þar af 5 ár sem skráðum flugvelli viðurkenndum eftir alþjóðlegum reglum, að eitthvert smábrot af þessu fé sem Isavia virðist ekki ætla að geta komið lóg til viðhalds flugvalla sinna, rynni til Sauðárflugvallar, þótt ekki væri nema úr svonefndum samfélagssjóði fyrirtækisins.  

   

 

Hálfsannleikur hjá Isavia