Hvað kemur stjórnarskrármálið fjárlögunum við?

Ragnheiður Elín Árnadóttir var í kvöld innt í útvarpi eftir viðbrögðum við þeim ummælum Steingríms J. að það væri einsdæmi í sögu þingsins hefði verið stundað jafn mikið málþóf út af fjárlögum og nú.

Hún svaraði því til að stjórnarskármálið væri líka einsdæmi í sögu þingsins.

Og þá er spurningin: Hvað kemur það fjárlögunum við?

Á að skilja þetta sem svo að ef stjórnarskármálið væri ekki fyrir hendi, þá væri ekkert málþóf út af fjárlögunum?

Eða að í raun sé haldið uppi málþófi til þess að tefja önnur mál þingsins um leið?

Annar viðmælandi og málsvari málþófsfólks sagði að fjárlögin nú væru með eindæmum illa unnin.

Ég hef fylgst með fjárlagaumræðu þingsinsin í meira en 60 ár og ef þetta er rétt, hafa hin 60 fjárlögin verið vel unnin og þetta frumvarp það fyrsta, sem ekki er því marki brennt.

Nú þegar eru umræðurnar komnar yfir 30 klukkustundir, kvöldið í kvöld og nóttin eru framundan og ekki að sjá neitt lát á. Til samanburðar var lengsta umræðan, sem Illugi Gunnarsson fann í fortíðinni, um fjárlögin 2009, 20 klukkustundir.  

Ég datt inn í umræðuna á sjónvarpsskjánum í nótt og þá var einn þingmanna að ræða um fjárlögin og að blaða í ákvæði um framlag til náttúrugripasafns, en gripir þess hafa verið á hrakhólum og skemmst og eyðilagst vegna þeirrar vanrækslu.

Hann sagði að kannski væri réttara að láta þetta fé renna annað. Fleira tíndi hann til sem kannski væri betra að eyða í annað. Ekki var að heyra á honum að hann ætlaði að bera fram breytingartillögur.

En mér fannst athyglisvert að heyra þá skoðun þingmannsins að það væri í besta lagi að viðhalda því ástandi sem mér finnst lengi hafa verið hrein þjóðarskömm, að þjóð, sem falin hefur verið til varðveislu einstæðar náttúruminjar á heimsvísu, sem bera ættu hróður lands og þjóðar flestu öðru fremur um heimsbyggðina, skuli ekki eiga náttúruminja- eða náttúrugripasafn og vanrækja hlutverk sitt stórlega og láta minjar og gripi skemmast og jafnvel glatast.

P. S. upp úr hádegi daginn eftir. Umræðan stóð til klukkan að ganga sex í morgun. Sér ekki fyrir endann á henni. Einn þingmanna, sem komnir eru á mælendaskrá, er norður í landi! Umræðan þegar orðin meira en tvöfalt lengri en dæmi eru til um áður, samkvæmt upplýsingum Illuga Gunnarssonar.

Gafst upp á að flytja ræðuna

Athugasemdir

[Guðjón Sigþór Jensson, 4.12.2012 kl. 23:23]

Nokkuð algengt er þegar menn komast í rökþrot að blanda tveim ólíkum málum saman.

 Kannski væri hugmynd til að bæta starf Alþingis að fá sérþjálfaða sérfræðinga til að leggja gott til málann

Þá þarf:

1.  innleiða siðareglur meðal þingmanna. Sanngjarnar siðareglur hafa reynst mörgum starfsstéttum mjög vel og hvers vegna stjórnmálamönnum ekki einnig?

2. að kenna þingmönnum að koma fram að til fyrirmyndar sé. Ekki dugar að segja „háttvirti þingmaður“ í upphafi og koma síðan með verstu skammaryrði tungunnar í næstu setningu.

3. að kenna þingmönnum að skrifa og flytja ræðu. Sagt er að 3ja til 5 mínútna hnitmiðuð og gagnorðuð ræða sé margfalt áhrifameiri og betri en ræða sem er löng, leiðinleg og uppfull af innihaldslausum endurtekningum. Mjög fáar ræður virðast bera af. Mætti halda þeim til haga öðrum til fyrirmyndar.

Þegar sýnt er frá þingfundum sýnast flestir þingmenn ákaflega áhugalausir og jafnvel sýna að þeim dauðleiðist. Líklega er Alþingi Íslendinga einn leiðinlegasti vinnustaður landsins þar sem menn og konur auðvitað líka dunda sér við háværar ræður fram á rauða nótt. Þingmenn sækja þingfundi annað hvort með því augnamiði að „koma höggi á andstæðinginn“ eða „berja eitthvað í gegn“ sem stjórnarandstaðan er auðvitað gjarnan á móti.

Því miður hefur þingið þróast í að vera n.k. stríðsvettvangur, þar sem stöðug átök eru daglegt brauð. Stundum af mjög litlu tilefni. Á þessu þarf að ráða bót, breyta úr þessu „vitleysingjahæli“ í vinnustað þar sem mennog konur vinna saman. Spurning er að bæta verkstjórnina. Hugmyndir í þessa átt hafa verið settar fram sem þarf að skoða.

Mætti biðja guðina að forða okkur frá þeirri vitleysu sem virðist tröllríða húsum við Austurvöll að ætla að háværasta vitleysingjahæli þjóðarinnar sé þar að finna!

Góðar stundir. 

[Þorsteinn Briem, 5.12.2012 kl. 06:03]

Gísli á Uppsölum hefði flutt mun fróðlegri og skemmtilegri ræður á Alþingi en þeir fjörulallar sem þar gapa nú klukkan sex að morgni.

"Það eru einir sex þingmenn Sjálfstæðisflokksins sem hafa aðallega skipst á að fara í pontu í nótt."

[Haukur Kristinsson (IP-tala skráð) 5.12.2012 kl. 07:07]

Það þarf að refsa sjallabjálfunum, rassskella þá. Þeir haga sér eins og ílla uppaldnir Valhallar krakkar. En það verður aðeins gert með því að veita þeim háðulega  útreið við næstu kosningar. Hinsvegar eru ekki miklar líkur á því, innbyggjarar virðast ætla að kjósa þetta  heimska klíkugengi enn einu sinni.

Kexrugluð þjóð, eins og Ómar Bjarki orðar það réttilega.

 

[Þórir Kjartansson, 5.12.2012 kl. 09:31]

Ég hef horft nokkuð á fjárlagaumræðuna frá Alþingi undanfarna daga og verð að segja  að það hefur valdið mér vonbrigðum og undrun.  Örfáar málefnalegar ræður.  Langlokuræður  sem aðallega byggjast upp á endalausu og hundleiðinlegu nöldri.  Engar  tillögur um hvernig betra væri að gera hlutina. Undarlegar spurningar og andsvör. Verið að velta sér upp úr málum sem koma fjárlögum sáralítið við.   Veit ekki hvort á að kalla þetta málþóf eða tilgangslausa tímaeyðslu.  Alla vega held ég að stjórnarandstaðan vinni sig ekki í álit hjá kjósendum með þessu.  Vill þeim kannski til happs hvað fáir horfa á Alþingisútsendinguna.

[Ómar Ragnarsson, 5.12.2012 kl. 13:09]

Nýjustur fréttir eru þær að málþófinu linnti ekki fyrr en klukkan að ganga sex í morgun og enn sést ekki fyrir endann á því.

Þegar stillt er inn á Alþingisrásina núna á öðrum tímanum eftir hádegi er ekkert að gerast, heldur aðeins endurtekið efni !

Búið að snúa sólarhringnum við!

[Guðjón Sigþór Jensson, 5.12.2012 kl. 17:00]

Gott dæmi um nöldrði er gagnrýni Bjarna Benediktssonar á stöðunni í Landspítalamálinu.

Hann leyfir sér að gagnrýna stefnu stjórnvalda varðandi Landspítalann en vegna hrunsins var skorið nokkuð harkalega til þess að hreinsa til eftir fjármálaóreiðu Sjálfstæðisflokksins.

Sjálfstæðisflokkurinn réri því öllum árum að einkavæða sem mest fyrir bankahrunið og einnig heilbrigðiskerfið. Var ekki Vífilsstaðaspítali lagður niður sem liður í þeim áformum?

Þá stóð til að byggja stóran einkarekinn spítala í Mosfellsbæ en ekki fer neinum sögum af þeim áformum. Og ekki má gleyma dekurverkefni Guðlaugs Þórs stórbraskara og fl.: Hátæknisjúkrahús!!!

Þegar ekki tekst að reka lágtæknihús með reisn hvernig ætlar Sjálfstæðisflokkurinn að byggja og reka hátæknisjúkrahús? Símapeningarnir sem áttu að verja í bygginguna hurfu í höndum braskliðs Framsóknar og Sjálfstæðismanna.

Góðar stundir en án braskliðs Framsóknar og Sjálfstæðisflokks!

[Þórarinn (IP-tala skráð) 5.12.2012 kl. 18:20]

Mikið vildi ég óska þess að við værum lengra komin en þetta. Og mikið vildi ég að þingið væri jafn líflegt og í bretlandi þar sem framíköll og rökræður eiga sér stað um leið og ræðumaður flytur mál sitt. það er mikill munur á rökræðum og síðan vitleysunni sem fer fram í sandkassaleiknum á alþingi okkar.