Nýir greftrunarsiðir?

"Af moldu landsins kæra kominn er ég.

Ég hverf til moldar og af henni rís.

Til jökulsins og himinsins frjáls fer ég.

Þar fegurð ofar hverri kröfu er vís."

Ég hef óskað þess að þessi sungnu orð verði hluti af minni moldun þegar þar að kemur en hins vegar er ólíklegra að hugmynd mín um breytta greftrunaraðferð verði að veruleika í bráð því að fastheldni á forna siði er mikil. En ég ætla samt að lýsa þessu.  

Hugmynd mín byggist á því að láta greftrunina verða táknrænan hluta af óhjákvæmilegri kröfu þessarar aldar um betri nýtingu gæða jarðarinnar, - að nýta rýmið í kirkjugörðunum betur en nú er gert og komast nær kröfu moldunartextans og jarðlífsins sjálfs með því að nota margnota kistur í smærri gröfum en nú tíðkast.

Líkið verði í sérstökum lífrænum poka og kistan verði með botni á hjörum.  Þegar hún verði látin síga niður í gröfina liggi tveir auka spottar upp á yfirborðið, sem tengdir verða við lása öðru megin á botninum. Þegar kistan er komin niður er kippt í þessa spotta og þá opnast botninn þannig að þegar kistan er dregin upp á yfirborði verði líkið eftir í pokanum í gröfinni.

Kostir þessarar aðferðar:

1. Óþarfa eyðsla á trjáviði verði afnumin.

2. Minni kostnaður.

3. Moldunin stenst kröfuna um,  að því sem jörðin gaf okkur við fæðingu sé skilað að sem mestu leyti án aukahluta til moldarinnar. Við fengum þennan líkama við fæðingu sem hið eina efnislega, sem okkur var gefið til jarðvistarinnar og skilum því aftur að lokinni notkun í jarðlífinu, gróðri jarðar til uppbyggingar og Móður Jörð og hringrás lífsins til dýrðar.  

4. Ekki sú loftmengun og orkubrennsla sem felst í líkbrennslu.  

Kannski munu greftrunarsiðir breytast í tímans rás, þótt varla verði það meðan ég lifi. En mér finnst allt í lagi að viðra þessar hugmyndir og heyra álit fólks.

Lítil mengun frá líkbrennslu

Athugasemdir

[Þorsteinn Briem, 21.12.2012 kl. 16:14]

Á himnum sjallinn enginn er,
en af góðum mikið ger,
Ómar fer í englaher,
einn í skjóðu þar allsber.

[Ásgrímur Hartmannsson, 21.12.2012 kl. 17:08]

Alveg er mér drullusama hversu mikið við mengum

en þegar ættingjar framtíðarinnar finna mig dauðan

vil ég að þeir feli líkið og segi engum.

[Gunnar Th. Gunnarsson, 21.12.2012 kl. 20:32]

Ef lík er brennt án kistu þá er lítið meiri mengun en af greftrun og ekkert meiri ef hitinn er nýttur. Með hefðbundinni greftrun frestarðu gasmengun og geymir hana í 6 fetunum. En hún skilar sér að lokum í andrúmsloftið.... held ég.

[Rafn Haraldur Sigurðsson (IP-tala skráð) 21.12.2012 kl. 20:53]

Ég ætla bara rétt að vona að þú látir ekki grafa þig í plastpoka sem tekur hundruðir ára að eyðast upp, þótt svo að pokasjóður fái sinar 15 krónur.

[Haraldur (IP-tala skráð) 21.12.2012 kl. 20:59]

Góð hugmynd og þörf, samt grunar mig að margir eigi erfitt með að skilja við ástvin svona.

[Sigurður Kristján Hjaltested (IP-tala skráð) 21.12.2012 kl. 21:13]

Táknræn athöfn á líkbrennslu er sú, að viðkomanidi skilji við sitt jarðneskja líf í reykjarmekki, sem síðar fellur til jarðar í regni. Þar með er viðkomandi/fráfarandi búina mynda hringrás á upphafi lífs og endi. Síðan er það afkomenda að kveðja viðkomandi með dreyfingu á öskunni,  eftir óskum þess sem kvaddi.

Virðuleg og sjálfsögð kveðja.

[gísli (IP-tala skráð) 21.12.2012 kl. 21:52]

góð hugmynd.

[Ómar Ragnarsson, 23.12.2012 kl. 16:52]

Ég sagði sérstaklega að pokinn ætti að vera úr lífrænu efni sem leysist mengunarlaust upp í moldinni. Ég sagði alls ekki að hann ætti að vera úr plasti.

[Rafn Haraldur Sigurðsson (IP-tala skráð) 23.12.2012 kl. 18:24]

Fyrirgefðu Ómar minn, auðvitað hefurðu það lífrænt, þetta var bara púkinn sem kom upp í mér. Gleðileg Jól.

[Gunnar Th. Gunnarsson, 23.12.2012 kl. 20:42]

Lífrænt rotnar sem veldur gasmyndun (mengun)

[Þþ (IP-tala skráð) 24.12.2012 kl. 23:02]

Nota pappakassa US 20 í kína stykkið ef pöntuð eru 100 stk. Þorgeir