Halda haus og horfa "Fram" á við.

Nú, þegar syrt hefur í álinn hjá Fram á lokaspretti Íslandsmótsins, ætti samt ekki að vera ástæða til þess að líta kolsvörtum augum á það, sem liðið hefur verið að gera í sumar. 

Þar vekur athygli að í viðureignum við bestu liðin í deildinni hafa Framarar ekki aðeins átt ýmsa mjög góða leiki, heldur tapað þeim furðu mörgum með litlum mun og jafnvel átt góða möguleika á jafntefli eða sigri.

Þetta hefur verið grátlegt, því að það hefði gagnast Frömurumum mun betur að vera upp á sitt besta og ná í stig frá neðstu liðunum frekar en hinum efstu og slá með því tvær flugur í einu höggi: Annars vegar að fjölga sínum stigum og hins vegar að fækka stigunum hjá þeim liðum, sem helst hafa keppt við Framara um að halda sér í deildinni.

Lið Fram er ungt og sömuleiðis þjálfarinn en geta átt framtíðina fyrir sér, sama hvernig fer í þetta sinn.

Þegar þannig háttar verður að gefa því og þjálfaranum minnst þrjú ár til að bæta sig og safna þeirri reynslu sem tryggir þann stöðugleika og sjálfstraust sem nægir til þess að ná því takmarki sem stefna þarf að.  

Stjörnumenn völtuðu yfir Framara

Athugasemdir

[Þorsteinn Briem, 28.9.2014 kl. 18:39]

Stjarnan hátt á himni skín,
til heljar Fram nú stikar,
að þeim margir gera grín,
gamlir vinna bikar.

[Sigurður Þorsteinsson, 28.9.2014 kl. 21:58]

Athyglisverð tilaun í ár hjá Fömmurum. Byggja liðið upp á ungum og efnilegum leikmönnum að mestu og fá til sín reyndan leikmann sem þjálfara. Það sem vantar í þessa blöndu er reynsla og þroski í þjálfunina. Með þjálfaranum er mjög reynslulítill þjálfari. Skoðum Stjörnuna sem andstæðu. Þar fer tiltölulega reynslulítill þjálfari þó ekki skuli vanmeta þá reynslu sem hann er kominn með. Rúnar er vel lesinn og kominn með reynslu hérlendis og í Noregi, þá fá Stjörnumenn Brynjar Björn með og það er blanda sem hefur þrælvirkað.

Reynsluleysi þjálfara Fram kemur fram hér og þar. Tók eitt sinn þátt í leik um fall í úrvalsdeildinni á móti KA. Okku tókst að vinna og halda okkur uppi en KA og Fram féllu. Eftir leik sagði ég við Frammarann, Elmar Geirsson sem þá lék með KA. Hef lesið að þið hafið verið óheppnir í sumar. Þá svaraði Elmar. ,,Ég trúi ekki á óheppni. Allt sem menn ekki skilja hafa menn tilhneigingu til þess að flokka undir óheppni". Það var og er viska í því.

[Ómar Ragnarsson, 28.9.2014 kl. 23:00]

Elmar Geirsson skorti að vísu leikni með boltann á við Ásgeir Sigurvinsson en allt annað hafði hann til brunns að bera til að vera stórgóður leikmaður. Elmar var geysi fljótur og hann var einn af þeim, sem var leikinn í að "hlaupa upp úr tæklingum" og láta ekki stöðva sig í stað þess að vera að fiska aukaspyrnur.

Elmar var leikmaður að mínu skapi.

[Sigurður Þorsteinsson, 28.9.2014 kl. 23:08]

Brynjar Björn, hafði heldur ekki tækninga, en hann, Elmar og fleiri höfðu karankter. Það höfðu reyndar margir félagar hans á þessum árum eins og Ásgeir, Marteinn og fleiri.

Það er synd að þessi tilraun í Savamýrinni hafi ekki tekist að þessu sinni en það að fá til sín unga efnilega leikmenn sem ekki fá tækifæri annar staðar var verulega áhugaverð. Veikleikinn virðist hafa verið í þjálfarateyminu. T.d. að láta Guðmund Magnússon frá sér, þegar markaskorara vantar.