Getur markvörðurinn þvingað fram stangarskot?

"Sætt er sameiginlegt skipbrot" segir máltækið og kannski er hægt að nota það um leiki Íslendinga og Tékka gegn Svíum sem sárabót að Svíarnir skyldu vinna miklu stærri sigur á Tékkum en okkur. 

Sænski markvörðurinn lék enn stórt hlutverk og þegar við slíkan mann er að etja, geta sóknarmenn ýmist farið á taugum eða farið að taka aukna áhættu í skotum, til dæmis með því að reyna að hitta bláhornin. 

En því nær sem miðað er stöngum og þverslá, því meiri hætta á því að boltinn fari í tréverkið. 

Og kannski má á vissan hátt skrá óvenju mörg stangarskot Arons Pálmarssonar í leiknum gegn Svíum sem varin skot. Hver veit?

Svíar unnu 14 marka sigur

Athugasemdir

[Ómar Bjarki Kristjánsson, 18.1.2015 kl. 23:41]

Það er rétt.  Líkurnar aukast á stangarskotum.  Þ.e.a.s. þegar leikin er svona firnasterk vörn með sterkan markmann að baki, eins og svíar virðast hafa gert aftur í dag eins og geg íslendingum, - þá verða skotin erfiðari og þurfa að vera hnitmiðaðri.  Skotstaðan eða vinkillinn verður líka erfiðari gegn slíkum varnarleik.  Það þurfa helst að vera nokkuð margar fantaskyttur í liði í dag til að brjóta svona vörn á bak aftur.  Það er engu líkara en meðalhæð varna í handboltanum hafi hækkað.  Sem dæmi má nefna að Snorri Steinn og Arnór hjá Íslandi sem voru svo sterkir fyrir nokkrum árum að koma hratt á vörnina og skjóta snöggt með litlu upphoppi o.s.frv., - þeir koma varla skoti á markið í dag.  Varnirnar taka þetta bara.  Íslendingar virkuðu hálfpartinn eins og smátittir við hliðina á svíum í fyrradag.  Þ.e. það var greinilegur hæðarmunur á liðunum.

[Trausti (IP-tala skráð) 19.1.2015 kl. 00:15]

Það er mikið rétt..það er hægt að þvinga menn í að taka erfiðari skot þó svo að þeir séu í alveg dauðafæri eins og það kallast. Ég æfði handbolta með FH á unglingsárunum, sem eru alveg góð 12 ár síðan og var í markvarðarstöðunni.Á þeim tíma lærði ég hvernig væri hægt að loka rammanum betur með ákveðnum líkamsstellingum og gabbhreyfingum sem attu að fá andstæðingin til þess að skjóta á þann stað sem ég reiknaði best með að geta varið. Svo var það líka þannig að ef vörnin stóð sig vel í að koma meira út í mennina þannig að þeir neiddust til þess að taka langsskot án þess að geta almennilega staðsett hvert þeir ætluðu að skjóta á ramman þá náði maður annað hvort að verja eða skotið fór framhjá eða yfir markið. Og þannig skot átti Aron nokkur í gær..sem enduðu annað hvort í tréverkinu eða fóru yfir markið. Ég man vel eftir Aroni á þessum æfingum í denn enda voru við báðir að æfa með FH á okkar yngri árum og maður sá strax kænskuna og leikskilningin sem hann hafi yfir að búa, og sem klárlega endurspeglast á vellinum í dag. Enda gull af manni.