Kansellísstíll og veðurfregnir með dönskum hreim.

Varla er fullveldisdagurinn liðinn þegar skilaboð frá íslenskri ríkisstofnun, Veðurstofunni, eru lesnar með áberandi dönskum hreim lesarans.

Og á hinni útvarpsstöðinni glitrar á danskan kansellístíl þegar lesið er:

"Fjöldi þeirra, sem leita aðstoðar hjá Mæðrastyrksnefnd, er álíka mikill og í fyrra"

þegar einfaldlega var hægt að segja:

"Álíka margir leita til Mæðrastyrksnefndar og í fyrra."

Í fyrri setningunni eru óþarfa málalengingar sem eru til ills eins, en þetta var eitt af einkennum hins svonefnda danska kansellístíls á 19. öld, þar sem óþarfa málskrúð og málalengingar voru alls ráðandi og þótti fínt, og því fínna sem spuninn var lengri og erfiðara að skilja hann.

RÚV sýnir tvö jóladagatöl í ár

Athugasemdir

[Þorgrímur Gestsson (IP-tala skráð) 2.12.2015 kl. 14:14]

Ómar, þetta er þýskur hreimur, og mér finnst þessi þýski veðurfregnalesari gera þetta ágætlega. Ekkert óþjóðlegt við það, bara fínt að erlent fólk skuli ná svona góðum tökum á tungumálinu okkar!

Bestu kveðjur

[Hörður Þormar (IP-tala skráð) 2.12.2015 kl. 15:21]

Mér heyrðist reyndar hann tala með enskum hreim!

En það var allt í lagi, hann vandaði sig vel.

Reyndar sakna ég Jennýar Olgu, hvers vegna þurfti hún að fara?

[Ómar Ragnarsson, 2.12.2015 kl. 21:48]

Ég er sammála þér, Þorgrimur, um það að sem maður af erlendum uppruna að ræða les hann furðu vel og vandar sig. En til framburðar á tungumáli í ríkisreknu og opinberu útvarpi verður að gera sömu kröfur og til textans sjálfs, að hann sé 100%.   

Hreimurinn heyrist allan tímann og ég er viss um að erlendar útvarpsstöðvar í svipaðri stöðu og Ríkisútvarpið, svo sem BBC, myndi aldrei láta nokkurn þul sinn í svipaðri stöðu lesa þannig, að í öllum lestrinum heyrðist langar leiðir að um mann af erlendu bergi brotinn væri að ræða.

[Sigurður Þór Guðjónsson, 2.12.2015 kl. 22:34]

Mér finnst þetta allt í lagi. Og þetta kemur beint frá Veðurstofunni sem reyndar er ekki útvarpsstöð. Aðstoðarmenn lesa veðurfregninar með öðrum verkum. Ætti þá ekki að ráða neina aðstoðarmenn nema þeir tali eins og íslendingar.

[Jón (IP-tala skráð) 3.12.2015 kl. 07:39]

"Erlendur hreimur" heyrist oft í sænska útvarpinu og sjónvarpinu. Hef og heyrt hann í DR. Hjá NRK nota þeir oft mállýskur sem eru illskiljanlegar öðrum en þeim sem þær nota og margfalt verri en "erlendur hreimur".

[Þorvaldur S (IP-tala skráð) 3.12.2015 kl. 10:33]

Það sýnist ankannalegt að bjóða útlendinga velkomna í öðru orðinu en benda þeim á að samt geti þeir ekki orðið fullkomnir þegnar og unnið hvað sem er vegna þess að uppruni þeirra er ekki horfinn í hinu.

[g. ivar asgeirsson (IP-tala skráð) 3.12.2015 kl. 13:43]

hvort fólk noti óþarflega mörg orð eða ekki finnst mér ekki slæmt...það sem er miklu verra er að íslensk tunga er að tapa sér eða jafnvel að hverfa...það verða alltaf fleir og fleiri ensk orð og lýsingar teknar inn í tungumálið. það allra heimskulegasta er að íslendingurinn heldur að með þvi að skrifa orðið, eins og það er framborið á ensku, með íslenskri stafsetningu verði orðið íslenskt. þvílíkur bjánaháttur... tökum allra versta dæmið sem er nafnið jesus, í flestum tungumálum er nafnið skrifað jesus nema að englendingar bera það fram (náttúrulega) eftir eigin stafaframburði(djísus). og hvað gera íslendingar...þeir skrifa nafnið jesus eins og það er borið fram á enskri tungu, sem sagt 'djísus'....ég spyr er til eitthvað fáránlegra...er ekki kominn tími til að berjast gegn þessari vitleysu og að íslendingar fari að tala eigið tungumál aftur....

k.kv. ivar