Alkul er alltaf algert.

Fyrstu tvö orð fréttarinnar um alkul í bílasölu fela í sér tvítekningu sem er bæði óþörf og merkingarlaus. Annað hvort er alkul alkul eða ekki alkul. Það er ekkert kaldara til en alkul. Að tvítaka orðið "al" er óþarft.

Orðin "algert alkul" eru dæmi um tilhneigingu blaðamanna til að ofgera og nota hástigsorð í slíkum mæli að í lokin verða þau máttlaus.

Nýleg dæmi um þarflausa notkun hástemmdra lýsingarorða er vaxandi notkun orðanna "gríðarlegur" og "hrikalegur." Orðið "mikill" er á undanhaldi, - þykir ekki nógu krassandi.

Um daginn heyrði ég mann tala um að það væri gríðarlega lítil bílasala. Lýsingarorðið "gríðarlegur" táknar eitthvað mjög mikið eða stórt. Þetta minnir á orð ráðherra eins hér í gamla daga þegar hann sagði: "Gengi krónunnar sígur upp á við."  

Alkul í bílasölu

Athugasemdir

[Ásgrímur Hartmannsson, 16.2.2009 kl. 11:21]

Blessaður maður, þetta er allt svona.  Og hefur reyndar verið lengi.  Hver kannast til dæmis ekki við menn sem hafa verið hálf-dauðir?

[Benedikt Bjarnason, 16.2.2009 kl. 11:30]

Ómar, það koma alltaf upp einhver tískuorð í fréttaflutningi. Manstu eftir því þegar alltaf var talað um að „kúvenda?“ Þegar fólk skiptir algerlega um skoðun.

[Jón Snæbjörnsson, 16.2.2009 kl. 11:34]

já eða hálfdán - og svo mikil sól eða næstum logn

[Þór (IP-tala skráð) 16.2.2009 kl. 11:41]

Satt að segja ætlast maður ekki mikils af íslenskum fréttamönnum í dag.

[Haraldur Bjarnason, 16.2.2009 kl. 11:55]

Hvernig ætli hálfgert alkul sé?

[Ég (IP-tala skráð) 16.2.2009 kl. 12:05]

... ætli það sé þá ekki -136,58°C

[Benedikt V. Warén, 16.2.2009 kl. 12:15]

Segir ekki í auglýsingunni um Toyota Yaris "risa smár"??

[Ari (IP-tala skráð) 16.2.2009 kl. 12:37]

Já alger tátólógía eða klifun.

Er ekki til slatti af örnefnum á Íslandi sem hefur slíkt? Dæmi: Blautamýri.

[EE (IP-tala skráð) 16.2.2009 kl. 13:09]

Já, vitlaust hjá Mogganum.  Alkul = algert kul.

EE

[Hallgrímur Egilsson, 16.2.2009 kl. 13:39]

Blessaður vertu Ómar, ef þú ætlar að fara að elta allar vitleysurnar sem íslenski blaða- og fjölmiðlamenn í dag viðhafa, þá endaru á kleppi!

Eftir að Fréttablaðið tók til starfa þá fjölgaði vitleysunum mjög mikið. Þetta er sérstaklega slæmt á vefmiðlunum í dag. Hraðinn er svo mikill að blaðamenn lesa ekki textann sinn yfir, held ég.

[Þorsteinn Briem, 16.2.2009 kl. 16:01]

Það sem einum finnst lítið, eða "bara" mikið, finnst öðrum gríðarlegt. Þannig tala loðnusjómennirnir (í einu orði) til dæmis um "gríðarlegar loðnugöngur" þegar þeir verða varir við tvær loðnur.

Eitt sinn kom til mín loðnuskipstjóri á Moggann með grein sem hann hafði skrifað um svakalega mikla loðnugöngu út af Vestfjörðum. Í greininni stóð að gangan væri gríðarlega löng og tveggja sm. (sjómílna) breið.

Ég breytti hins vegar að gamni mínu sm. í sentímetra, þar sem lesendur Moggans hefðu væntanlega gaman af að sjá fyrir sér gríðarlega langa og tveggja sentímetra breiða loðnugöngu hlykkjast um í hafinu.

Og að sjálfsögðu var stelpunum í prófarkalestrinum kennt um þessa vitleysu.

[Ómar Ragnarsson, 16.2.2009 kl. 17:13]

Mýrar geta verið misblautar en alkul er alltaf alkul.

Þetta minnir mig á það þegar þingmenn Frjálslynda flokksins voru sárir út í mig fyrir það að kalla þá stórðjusinna. Þeir sögðust nefnilega vera fylgjandi "hóflegri stóriðju með hæfilega litlum álverum."

Fjölmiðlafulltrúi Alcoa Fjarðaráls atyrti mig fyrir að segja að Alcoa vildi reisa stór álver. 

Rúmlega ári síðar var það síðan gefið út hjá Alcoa að álverið á Bakka yrði að verða minnst 350 þúsund tonn, margfalt stærra en sú stóriðja sem ég og samtímamenn mínir samþykktu á sjöunda áratugnum. 

[Bjarni Benedikt Gunnarsson, 16.2.2009 kl. 17:58]

Í viðbót við þessa umræðu er einnig margt ansi slæmt í málfræði og réttritun sem maður sér. Í nýlegu blaði af tímaritinu Sagan öll er Egyptaland kallað Egiftaland. Maður veltir fyrir sér þegar maður sér svona hvort fólk sem svona skrifar vilji þá kalla Keflavík Keblavík, og svo framvegis. Alveg með ólíkindum.

[EE (IP-tala skráð) 16.2.2009 kl. 22:32]

En við suðuðum svo mikið um villuna, bæði í þessu bloggi og öðru, að Mogginn lagaði villuna fyrr í dag. 

EE elle

[Ómar Ragnarsson, 16.2.2009 kl. 23:40]

Raunar hefði orðið alkul eitt og sér verið röng lýsing á bílasölunni, því að í fréttinni kom fram að það hefðu þó selst nokkrir bílar.