Tsunami umhverfis jörðina?

Mikið hefur verið skrafað og skrifað um þá loftsteina, sem fallið hafa á jörðina í milljóna og milljarða ára rás, og áhrifin af árekstrum þeirra við jörðina.

Meðal annars giskað á að risaeðlurnar hafi dáið út af völdum falls stórs loftsteins á jörðina.

Allt eru þetta þó smámunir miðað við það sem menn velta nú fyrir sér varðandi áhrif gríðarlegs flykkis sem fallið hafi á haf, sem hafi verið á mars fyrir 3,4 milljörðum ára og valdið 120 metra hárri flóðbylgju, "Tsunami".

Þar sem mikill meirihluti yfirborðs jarðar er þakið sjó, yrðu mestar líkur til að ofurloftsteinn félli í haf ef hann rækist á jörðina.

120 metra há flóðbylgja er ekkert smáræði. Kæmi slík flóðbylgja við Ísland myndi nánast öll byggð á landinu lenda í henni. Öll íbúðahverfi á höfuðborgarsvæðinu eru í minni en 120 metra hæð yfir sjávarmáli og sama er að segja um öll þéttbýlissvæði landsins.

Svipað er að segja um meirihluta byggðar í heiminum. Lönd eins og Holland og Bangladesh myndu drukkna alveg og meginhluti þéttbýlis í flestum löndum.

En á móti kemur að það er með sanni hægt að nota orðið "stjarnfræðilegur" niður á við um líkurnar á því að svona flóðbylgja geti orðið til á jörðinni.

En sama má auðvitað segja um mars, og þar gerðist þetta sennilega samt ef kenningar þar um eru réttar.

120 metra öldur eyddu ströndum Mars

Tæplega 100 ára aldursmunur hjólafólks í Kópavogi í dag.

Reiðhjólafólk setti svip sinn á þennan bjarta laugardag beggja vegna Fossvogar í dag.

Í Öskjuhlíð spreyttu börn innan ellefu ára sig á þrautum og sjá mátti hjólafólk á ýmsum aldri þar.

En hinum megin við Kópavoginn var fjölbreytni hjóla og fólks ennþá meiri og það var gaman að taka þátt í hjólaferð meðfram ströndinni umhverfis Kársnesið ásamt um 60 manns á bæði tveggja og þriggja hjóla reiðhjólum af mjög fjölbreyttu tagi.

Staðkunnugir menn fræddu ferðafólkið um merkisstaði á leiðinni og það var afar gaman að verða samferða þessum fjölskrúðugaða hópi á rafhjólinu Perslu, sem er systir hjólsins Sörla, sem var notaður til að hjóla frá Akureyri til Reykjavíkur í fyrrasumar.

Veður var bjart og þarna var ég að upplifa í fyrsta sinn alveg nýja sýn á þennan hluta höfuðborgarsvæðisins.

Á einu þriggja hjóla rafhjólinu í dag mátti sjá tvo farþega, sem voru samtals 194 ára, hannn 203ja og hún 91, þannig að meðalaldurinn um borð var 97 ár.

Þau eru á neðstu myndinni hér á síðunni.

Spreyttu sig á hjólum í Öskjuhlíð

Minnir á Heklu.

Hekla er eldfjall, sem sýnist vera býsna líkt eldfjallinu í Indónesíu, sem gaus í morgun.

Hekla er kannski mesta ólíkindatól íslenskra eldfjalla og hugsanlega eitt það hættulegasta.

Hekla, Katla og Eldfellið á Heimaey hafa öll kostað beint eða óbeint mannslíf á þessari öld, glóandi hraunbjarg féll á Steinþór Sigurðsson jarðfræðing við Heklu 1947, maður fórst af völdum eldingar, sem kennd var Kötlu 1928 og eiturgufa í kjallara frá Eldfelli varð manni að bana í Heimaey.

Hekla er nú á því stigi, að hún gæti gosið fyrirvaralaust innan klukkustundar frá fyrstu vísbendingum um gos, og það er ekki útilokað að einhvern tíma verði gríðarlegt sprengigos í fjallinu með ófyrirsjáanlegum afleiðingum, jafnvel á þann hátt að fjallið klofni og gífurlegt eimyrjuflóð, sem eyði öllu lífi, sem á vegi þess verður æði með ógnarhraða frá því, líkt og þegar bæirnir St. Pierre og Pompei eyddust.

Fleiri eldfjöll en Hekla geta verið stórhættuleg hér á landi, en um aldir, allt fram að gosinu í Eyjafjallajökli, var full ástæða til þess að Hekla væri illræmdasta eldfjall Íslands og jafnvel anddyri sjálfs helvítis.

Og hvað heitir svo þessi fallegi foss í Þjórsá á þeim slóðum þar sem stefnt er að því að virkja hana?  Búðafoss heitir hann, oft kallaður Búði, eitt af býsna vel varðveittum leyndarmálum íslenskrar náttúru.

Þrír létu lífið í eldgosi

Hvernig Eurovision var gerð áhugaverð og arðvænleg.

Árum saman var reynt að spara sem allra mest varðandi þátttöku Íslendinga í Eurovisionkeppninni.

Engin undankeppni var haldin hér heima, einn ákveðinn fulltrúi var valinn til ferðar og þannig var útgjöldum haldið niðri sem mest mátti verða.

En sagt er, að það þurfi stundum peninga til að búa til peninga og síðustu árin hefur sú aðferð verið prófuð á þann hátt að gera keppnina, bæði undankeppnina hér heima og alla þátttökuna, sem áhugaverðasta og glæsilegasta og nýta sér útvarps- og sjonvarpsrásir til þess að fá inn sem mestar auglýsingatekjur og áhorf.

Megnið af keppninni fer fram á þeim tíma ársins þegar mest þörf er fyrir áhugavert sjónvarpsefni í skammdeginu og þess vegna gott mál að hafa eitthvað í gangi sem vekur umtal og þar með áhorf.

Þegar þetta er borið saman við þau ár, sem svo mikið varð að spara að keppendur hurfu nánast þegar þeir komu á kepppnisstað og urðu þar með að bíða mikið afhroð, stundum að ósekju, er gott að sá tími sé liðinn.

62,2% horfðu á Gretu Salóme

En hvað þetta var líklegt og eftir öðru.

Orðið fáránlegt á við sum fyrirbærin, sem þrífast undarlega vel í öflugasta lýðræðissamfélagi heims sem bjargaði Evrópu frá ógn hræðilegs og villimannlegs einræðis í Seinni heimsstyrjöldinni.

Í Bandaríkjunum fer saman fáránlega mikil byssueign og fáránleg há tíðni manndrápa með byssum.

Röksemdir byssufíkla fyrir byssuvæðingunni er sú að í landnámslandi (frontier country) sé eðlilegt að byssur séu svona margar og drápstíðnin svona há.

En þetta heldur ekki vatni. Kanada, Ástralía og fleiri sambærileg lönd geta alveg eins talist "frontier" en þar eru bæði byssueign og manndráp miklu færri en í Bandaríkjunum.

Það var eftir mörgu öðru að Donald Trump sé sólginn í stuðning hinna fáránlega valdamiklu hagsmunasamtök byssueigenda í landi hans.  

Þyrftu að „kyssa byssurnar bless“

Afleiðing af fjölgun frambjóðendanna.

Bent hefur verið á það að fjöldi tilskilinna meðmælenda fyrir forsetakosningar sé úr takt við það, að kjósendur nú meira en tvöfalt fleiri en þegar lögin um þær voru sett.

Þess vegna þurfi að hækka þessa tölu.

En það er önnur hlið á málinu. Þegar frambjóðendur eru orðnir á annan tug eins og nú, vegur það alveg upp á móti því sem þurfti þegar frambjóðendur voru tveir til fjórir.

Ástæðan er sú, að hver meðmælandi má aðeins nota nafn sitt hjá einum frambjóðanda.

Það bitnar mest á þeim frambjóðendum, sem síðast byrja að safna meðmælendum.

„Það geta ekki allir unnið“

Mikið í pípunum?

Lítil verðbólga síðustu misseri skýrist af lækkandi verði á olíu á heimsmarkaði og gríðarlegri fjölgun ferðamanna, sem hefur hækkað gengi krónunnar um 16% ef marka má frétt í útvarpi í gær.

En í sömu frétt kom fram að verslunin hefði í meginatriðum svikið landsmenn um ábatann af skattalækkunum og gengishækkun.

Ef olíuverð fer að hækka aftur og gengi krónunnar getur ekki hækkað meira má búast við að mikið sé í pípunum eins og það er stundum orðað, varðandi þrýsting á verðhækkanir og vaxandi verðbólgu.

Verður fróðlegt að sjá framvinduna í þeim efnum.

Bensín ekki dýrara síðan í september

Nú byggja menn skurði í stað þess að grafa þá.

Orðafátækt veldur því að ýmis góð og lýsandi orð hverfa úr málinu. Orðin svona, þannig og hvernig eru að víkja fyrir orðalengingunni "með þeim hætti".

Í stað orðana verður og mun heyrði ég veðurfræðing einn segja í sjónvarpin "kemur til með að" eða "koma til með að" sjö sinum í röð í nokkrum setningum.

Í stað þess að segja að einhverju fjölgi eða fækki er talað um aukningu eða minnkun á fjölda.

Nú eru menn að byggja allan andskotann;  - í tengdri frétt er talað um að byggja skurði í stað þess að grafa þá og menn byggja göng í stað þess að bora þau .

Næsta skref gætir orðið að grafir verði ekki grafnar í kirkjugörðum heldur byggðar, og að maður verði byggður í kirkjugarði. 

Orðalengingarnar eru alls staðar. Dæmi: Í stað þess að segja einfaldlega "ferðamönnum fjölgar" er sagt: "Við erum að sjá aukningu á fjölda ferðamanna."

Já, það þykir fínt að troa sem víðast inn orðunum "við erum að sjá." 

 

Ráðast í gríðarmikið veituverkefni

Þjóðir í hlekkjum hugarfarsins.

Baldur Hermannsson gerði athyglisverða sjónvarpsþáttaröð fyrir um aldarfjórðungi sem hét "Þjóð í hlekkjum hugarfarsins og fjallaði um þjóðfélagsástandið á Íslandi á síðustu öldum.

Áhrif olíualdarinnar á þjóðir heims eru svo yfirþyrmandi, að nota má orðalagið "hlekki hugarfarsins" um það mál.

Þrátt fyrir ráðstefnur og fundi í allar götur frá ráðstefnuni í Ríó 1992, samþykktir og viljayfirlýsingar, miðar þjóðum heims lítt úr hlekkjum hugarfars olíuvinnslunnar.

Nærtækt dæmi um það eru Norðmenn og Íslendingar sem enn hafa ekki brotist út úr viðjum í þessum efnum, heldur halda því áfram í sameiningu að gefa leyfi til borana og rannsókna og vinnslu á nýjum olíusvæðum norðan heimsskautsbaugs.

Í blaðagrein þáverandi íslensks ráðherra um rannsóknarleyfi á Drekasvæðinu var ekki orð um vinnsluleyfið í fyrirsögn, heldur varð að leita að tveimur orðum um það, "..og vinnslu.." aftarlega í greininni.

Ráðherrann í næstu stjórn á undan stærði sig af því að vera olíumálaráðherra Íslands.

Báðar þjóðir fela sig á bak við það, að í kröfum um að minnka notkun jarðefnaeldsneytis er vinnsla jarðefnaeldsneytis ekki innifalin og báðar stefna að því að berja sér á brjóst og monta sig fyrir skerf sinn umhverfismálum.

Sem gerir það siðleysi enn meira en ella að stunda rányrkju á kostnað komandi kynslóða með tvíþættum afleiðingum: ´Ástandi lofthjúpsins og velta því yfir á afkomendur okkar að vinna úr þeim hrikalegu viðfangsefnum sem sóun auðlinda jarðar hefur í för með sér.

Frændþjóðirnar við Norður-Atlantshaf eru þjóðir í hlekkjum hugarfarsins, því miður.  

 

 

 

Veita umdeild olíuvinnsluleyfi

Sannleiksbroddur í full harkalegum ummælum.

Einu sinni var íslenskur ráðherra sem sagði að þekktur erlendur efnahagssérfræðingur, sem var gagnrýninn á íslenska efnahagsstefnu 2008 ætti að fara í endurhæfingu.

Það reyndust full harkaleg ummæli svo ekki sé meira sagt, eins og kom á daginn nokkrumm mánuðum seinna.

Ummæli Bill Clintons um pólska og ungverska ráðamenn eru kannski full harkaleg en fela þó í sér sannleiksbrodd.

Í sumum löndum í Austur-Evrópu hafa stjórnlyndir og mjög þjóðernissinnaðir menn lengi átt nokkur hljómgrunn og Adolf Hitler þurfti ekki að hafa mikið fyrir því að þar kæmust til valda fasistar í aðdraganda innrásarinnar í Sovétríkin 1941. Þeir voru þegar komnir til valda. 

Að sönnu er langur vegur frá því að slíkir menn nái svipuðum völdum í þessum ríkjum nú og þá, en ákveðnar viðvörunarbjöllur hringja þegar fréttist af ýmsum tilburðum þar til að kæfa frjálsa skoðanamyndun í nafni nauðsynjar á "sterkri stjórn."

 

Bill Clinton leiti sér hjálpar