ÓRÖSKUÐU SVÆÐIN HANS DOFRA.

Enginn hefur sýnt það betur en Dofri Hermannsson að undanförn að með hugmyndum um álver í Helguvík og önnur áform um orkusölu á suðvesturlandi er búið að lofa meiru en hægt verður að standa við. Dofri minnti nú rétt í þessu í Kastljósinu á það ákvæði stjórnarsáttmálans að ekki verði farið í virkjanaframkvæmdir á "óröskuðum svæðum."

Nú sýnist heldur betur samkvæmt skrifum Dofra að muni reyna á skilgreininguna um "óröskuð svæði." Eru Ölkelduháls, Nestún, Leirhnjúkur, Gjástykki og Neðri-Þjórsá ekki óröskuð svæði? Eða telst Neðri-Þjórsá vera á röskuðu svæði vegna þess að búið er að raska ánni ofar? Er Ölkelduháls á röskuðu svæði af því að búið er að virkja vestar á Hellisheiði?

Hvernig ætla menn að uppfylla orkukröfurnar án þess að fara inn á þessi svæði og jafnvel fleiri?

Eru Leirhnjúkur og Gjástykki á röskuðu svæði vegna þess að þau liggja í framhaldi af Kröflu? Gaman væri að heyra um skilgreiningu eins aðal höfundar Fagra íslands á þessu.

GJÖFUL ÞRÓUNARAÐSTOÐ.

Í febrúar í fyrra minntist ég á það í Silfri Egils hve miklu nýting íslenskrar þekkingar á sviði virkjunarmála gæti skilað hinum fátæku þjóðum heims og um leið varðað leið til að gera nýtingu jarðvarma og vatnsorku að hluta lausnar loftslagsvandans. Í þessu væri fólgin gjöfulasta þróunaraðstoðin.

Að vísu getur öll samanlögð vatnsorka og jarðvarmaorka heims aðeins gefið í mesta lagi um 10% af orkuþörf heimsins þannig að ítrasta framlag eitt og sér á þessu sviði er engin alheimslausn eins og margir klifa á til að réttlæta eyðileggingu íslenskra náttúruverðmæta. En það munar um allt, rétt er það.

En nú er rétt að spyrja: Hvað um náttúruverðmæti, sem fórnað væri í þessum fjarlægu löndum? Auðvitað þarf að gæta að því en ekki þarf annað en að líta á nýja bók um 100 undur veraldar til að sjá, að Jemen og Yellowstone í Bandaríkjunum ættu að koma fyrr til virkjunar en hinn eldvirki hluti Íslands, því hann er í hópi 100 undranna en hvorki Yemen né Yellowstone.

REI gerir samning í Jemen