"Fámennir öfgahópar" skulu það vera !

Niðurstaða skoðanakönnunar um stofnun þjóðgarðs á miðhálendi Íslands er mjög afgerandi, en samt er byrjaður söngurinn um að ekkert sé að marka hana af því að orðalagið sé leiðandi og villandi í spurningunni.

Einn bloggarinn segir að spurningin hefði átt að vera svona: Ertu hlynnt/ur því eða andvígur að allt miðhálendið verði gert að hálendi.

Þetta sýnir fáfræði viðkomandi bloggara, vegna þess að ef á að gera "allt" miðhálendi Íslands að þjóðgarði þarf að leggja niður eftirtaldar virkjanir sem þegar eru á miðhálendinu:  Sultartangavirkjun, Búðarhálsvirkjun (í smíðum), Hrauneyjafossvirkjun, Sigölduvirkjun, Vatnsfellsvirkjun, Kvíslaveitu 1, 2, 3, 4 og 5, Hágöngulónsmiðlun, Blönduvirkjun, Kröfluvirkjun og Kárahnjúkavirkjun.

Héðan af verður augljóslega aldrei hætt að gera allt miðhálendi Íslands að þjóðgarði því að flestar þessar virkjanir hafa valdið óafturkræfum umhverfisspjöllum. Kárahnjúkavirkjun ein og sér felur í sér mestu mögulegu óafturkræfu umhverfisspjöll sem hægt er að valda hér á landi.

Allir Íslendingar hafa séð kort af landinu og vita í grófum dráttum hvar miðja þess er og þar með hvar miðhálendið er.  Vatnajökulsþjóðgarður er í suðausturhorni miðhálendisins og því augljóst að þjóðgarður á miðhálendi Íslands myndi fela í sér að friðunin næði að minnsta kosti vestur yfir Hofsjökul og suður undir Suðurjökla.

Það er þessi grófa heildarmynd sem fólk hefur í huga þegar það svarar svona spurningu.

En auðvitað geta sumir alls ekki sætt sig við annað en að þeir sem ekki eru sammála þeim um virkjanir út í eitt séu "fámennir öfgahópar." 

 

Meirihluti vill þjóðgarð á miðhálendinu

Meira en tvö þúsund tonn af fitu ?

Ef þeir Íslendingar, sem vaxnir eru úr grasi eru að meðaltali 10 kíló yfir kjörþyngd, samsvarar það alls meira en 2000 tonnum af hreinni fitu !

Íslenskir flugfarþegar innanlands eru líkast til nokkuð fleiri en þetta á hverju ári, en ef Flugfélag Íslands yrði beðið um að flytja þessa umframfitu sérstaklega og miðað yrði við meðalþyngd af farmi um borð í hverri ferð, þyrfti um 100 flugferðir á ári á Fokker F50 til fituflutninganna eða tvær fituferðir í viku !

Og allri þessari fitu þyrfti að lyfta frá jörðu upp í meira en fimm kílómetra hæð í hverri ferð. Eitthvað kostar slíkt í eldsneytiskostnaði auk tímatafar.

Þjóðin verður að grennast