Forsætisráðherrann gömul tölva.

Fyrir 45 árum, árið 1967, var árið 2012 langt frammi í hulinni framtíð og tíminn þangað til leit út eins og heil eilífð, vegna þess að um var að ræða að flytja sig í huganum úr miðri öld í lok árþúsunds og vel yfir á næstu öld í nýju árþúsundi.

Þegar við Magnús Ingimarsson settum saman textann "Árið 2012" þótti okkur líklegt að tölvurnar og vélmennin myndu taka öll völd þegar komið yrði vel fram á næstu öld.

Um það leyti sem textinn var gerður, var svonefnd Háskólatölva langfullkomnasta tölva samtímans.

Hún tók næstum heilt herbergi en nú myndi lófatölva afkasta því sem hún gerði.

Við erum orðin miklu meira háð tölvunum en við gerum okkur grein fyrir. Vatnsveður í Kaupmannahöfn hefur til dæmis slegið út dönsku veðurstofunni og kom þar vel á vondan.

Smá bilun í tölvukerfi hér heima stöðvaði öll bankaviðskipti nýlega og viðskipti hundraða fyrirtækja, ekki bara við bankakerfið, heldur við hvert annað, lágu niðri klukkustundum saman.

Þess vegna var spá okkar Magnúsar um margt ótrúlega rétt og svo kann að verða að veruleikinn í myndinni Transformers þegar vélmennin taka allt yfir verði ekki bara kvikmynd heldur raunveruleikinn í sínu hæsta veldi.

Í textanum 2012 sögðum við:

 

"...allt var orðið breytt,

því vélar unnu störfin og enginn gerði neitt."

 

Það var nokkur sannleikur í þessu því að við erum nú algerlega háð tölvum og vélum og við myndum varla þurfa að gera neitt nema vegna þess að milljónir manna vinna við að framleiða, selja og gera við allar þessar tölvur og vélar.

Áfram héldum við:

 

"Og ekki hafði neitt að gera útvarpsstjóri vor

því yfirmaður hans var gamall vasatransistor

og þingmennirnir okkar voru ei með fulle fem

því forsætisráðherrann var gamall IBM."

 

Við reyndum að fara á sem mest flug í ímyndununum sem textinn átti að vera fullur af, en frekar datt okkur í hug að forsætisráðherrann árið 2012 yrði gömul tölva en gömul flugfreyja.

Við notuðum orðin vasatransistor og IBM yfir tölvurnar, tölvukerfin og tölvutæknina og þegar grannt er skoðað hefur þessi tækjakostur þegar tekið að stórum hluta til ráðin af okkur.

Það eina sem virðist ætla að verða nokkuð óbreytt árið 2012 frá því sem var 1967 er þetta með þingmennina, sem eru ei með fulle fem.

 

Við sáum fyrir mesta fíkniefnavandann:  "Er dóninn tók upp sprautu, þá flýtti ég mér út..."

og sáum líka fyrir gríðarlegar framfarir í læknavísindunum, svo tæknfrjóvganir, þegar við sögðum:

 

"Mig dreymdi´að ég væri giftur þeirri sömu sem ég er.

Hún sagði: Ó, mér leiðist þetta barnaleysi hér.

Ég gerðist nokkuð bráður og vildi bæta úr því strax.

"Nei, bíddu," sagði´hún, "góði, við notum pillur nú til dags."  

 

Veruleiki spádóms textans "Árið 2012" er kannski ekki kominn fram nema að hluta, en kannski verður hann kominn allur fram árið 2112 eða jafnvel árið 2067, þegar textinn á aldarafmæli.

Vélmennin taka yfir

Orkan þar og orkan hér.

Víst er Yeollowstoneáin falleg, um það get ég vitnað eftir að hafa ferðast meðfram henni á löngum köflum.

Og Yellowstonefossarnir og gljúfrin eru líka fögur smíðisverk náttúrunnar.  Fossarnir búa yfir mikilli orku en samt kemur ekki til greina að virkja þessa miklu vatnsorku, hvað þá að snerta við einum einasta af tíuþúsund hverum þjóðgarðsins.

Þetta myndu vera taldar hreinar öfgar og afturhald ef Íslendingar hefðu um þetta svæði að segja, því að hinn eldvirki hluti Íslands, þar sem talið er sjálfsagt að virkja allt sundur og saman, er nú talinn eitt af helstu náttúruundrum heims, en Yellowstone kemst ekki einu sinni á blað.

Nú er keppst við það hér á landi að sækja að náttúruperlum lands okkar, nú síðast með því að hefja fjárfestingar vegna undirbúnings Búlandsvirkjunar og með því að hefja boranir vegna rannsókna á Grændal.

Ástæðan er einföld og svínvirkar: Ef eytt er nógu miklum peningum í þessar undirbúningsframkvæmdir, helst hundruðum milljóna eða mörgum milljörðum, verður ekki aftur snúið, því að ef það er reynt, verður hægt að saka "öfgamenn" um það ef þeir dirfast að andmæla þessu og "eyðileggja" með því þá peninga sem búið er að eyða.

Vegna orkunotkunar liggur olíuleiðsla undir Yellowstoneána og þegar hún brast varð áin olíumenguð.

Ef Íslendingar væru þarna við völd yrði nú heimtað að virkja ána með þeim rökum að það sé í þágu þess að hamla gegn hlýnun loftslags vegna gróðurhúsalofttegunda, því að þá yrði hægt að hætta við að nota olíuna sem leidd hefur verið neðanjarðar um þetta svæði.

Einnig væri að sjálfsögðu fyrir löngu búið að leyfa "rannsóknarboranir" og milljarða rannsóknir á svæðinu.

Það verður hins vegar ekki gert.  Allt slíkt er bannað, ekki aðeins í Yellowstone, heldur á svæði umhverfis þjóðgarðinn, sem er álíka stórt og Ísland.

Í hópi þeirra "öfgamanna" sem ekki vilja leyfa þarna það sem sjálfsagt þykir hér á landi, eru allir forsetar Bandaríkjanna síðustu 130 ár!

Olíubrák á náttúruperlu

Hef lengi haft grun um þetta.

Mig hefur um árabil grunað að ekki væri allt með felldu varðandi kenninguna um það sykurskertir gosdrykkir væru grennandi fyrir fólk.

Upphaf þess að mig fór að gruna þetta var það, að ég tók eftir því langflestir þeir sem feitastir voru drukku Diet Coke eða Pepsi Max.

Oft mátti sjá þetta sama fólk háma í sig "ruslfæði" með tilheyrandi sósum og "knansæðakítti" (coctail-sósu) og einnig var það grunsamlega oft með stóra rjómaísa og smurði þykku smjöri ofan á brauðin.

Ný rannsókn sýnir að sætuefnin í sykurskertu drykkjunum æsa upp sult í fólki en mig grunar að fleira komi til.

Þeir sem drekka sykurskertu drykkina einblína á áróðurinn um það hve fitandi hinir sykruðu drykkir séu.

Rétt er það, að þeir innihalda fleiri hitaeiningar en sykurskertu drykkirnir en samt er það hvergi nærri eins mikið og sú orka og fita sem til dæmis er að finna í súkkulaði.

Staðreynd: Í 100 ml af Coca-Cola eru næstum tíu sinnum færri hitaeiningar en í jafnmiklu magni af súkkulaði og í súkkaðinu eru 40% fita, en í kókinu er engin fita.

Kók og Prins, - Prinzið er níu sinnum meira fitandi miðað við það magn sem neytt er.

Kókið inniheldur einhverjar fæstu hitaeiningar miðað við magn sem hægt er að finna í neysluvöru.

Þetta held ég að fituhlunkarnir viti ekki, enda hafa þeir aðeins fengið að heyra það margsinnis að sykurskerti drykkurinn sé lausnin og komi í veg fyrir hin fitandi áhrif venulegra gosdrykkja.

Rétt er þó að geta þess að í gosdrykkjunum er hvítasykur sem er afar óhollur og eitt af helstu heilsufarsvandamálum okkar tíma.

Ég hef einnig heyrt þá kenningu að þegar fólk neyti mikils af sykurskertum drykkjum geti það með tímanum orðið til þess að heilinn fari að hætta að láta "plata" sig þegar hann fær skilaboð um sykur sem séu röng og hætti því að bregðast við þegar raunverulegur sykur er á ferðum með því að senda boð um insúlínframleiðslu.

Afleiðingin verði áunnin sykursýki.

Í meginatriðum eru aðeins tvö atriði sem duga til að koma í veg fyrir ofþyngd:

Að gæta þess vandlega hve hitaeiningar eru innbyrtar í fæðinu.

Að hreyfa sig nógu mikið og helst að taka nógu oft meira en 20 mínútna langar skorpur.

Auk þess þarf að varast að að rjúka út í mikið svelti því að líkaminn getur átt það til að bregðast við því með því að breyta efnaskiptum sínum, svo að fæðið nýtist sem best.

 

Sykurskertir drykkir fitandi