Einu sinni rak strætóbílstjóri víst farþega óvart út.

Sagan af reykvíska strætisvagnabílstjóranum sem rak alla farþegana út í dag og gerði það að aprílgabbi minnir á sögu frá sjötta áratug síðustu aldar. 

Á þeim tíma kölluðu bílstjórar upp heiti stoppistöðva, og voru sumar þeirra kenndar við einstök hús eins og Jófríðarstaðir við Kalkofnsveg og Ás, sem var lítið snoturt hús við Laugaveg, beint við vesturenda Þjóðskjalasafnsins, sem þá var Mjólkustöðin í Reykjavík. 

Sagan gamla segir, að eitt sinn, þegar hópur Þjóðverja var staddur í vagni, sem ekið var niður Laugaveg, og bílstjórinn kallaði "Ás!" um leið og hann stöðvaði vagninn við Ás, hafi Þjóðverjarnir haldið að hann væri að skipa öllum að fara út úr vagninum og þust út, allir sem einn.  

Svona voru aprílgöbbin 2018

Af hverju ráðgefandi en ekki gild?

Þótt aldurshópurinn 16 og 17 ára fengi kosningarétt er ekki þar með sagt að þátttakan yrði mikil í honum. Miðað við minni áhuga hjá yngstu kjósendunum í undanförnum kosningum en hjá hinum eldri, má búast við enn minni áhugi verði hjá 16 og 17 ára, enda segir í tilkynningu um málið að þetta verði ráðgefandi kosning.

Þýðir það að atkvæðin verði ekki gild og því talin sérstaklega? Þetta hljómar svipað og ef konur hefðu fengið að kjósa í ráðgefandi kosningum þegar þær fengu fyrst kosningarétt. 

Áhugi og þekking á stjórnmálum er afar misjöfn hjá 16 og 17 ára unglingum, en stórum hluta þeirra er alveg eins treystandi til að kjósa í "bindandi kosningu" og þorra eldri kjósenda. 

Sem nörd frá níu ára aldri hvað varðaði stjórnmál hefði ég, þegar ég lít til baka, alveg treyst mér til að taka þátt í kosningum frá og með forsetakosningunum 1952. 

Varð hins vegar að bíða alveg til 1963 til þess að taka þátt í Alþingiskosningum, og hefði ráðstafað atkvæði mínu alveg eins í kosningunum 1959 ef ég hefði haft atkvæðisrétt.  

Þeir unglingar, sem telja sig ekki hafa næga þekkingu, taka líklegast almennt síður þátt í kosningum en hinir.  Og er það bara ekki allt í lagi?

Og hvers vegna að hafa óskaplegar áhyggjur af ráðgefandi kosningu ef hún hefur engin bein áhrif?

P.S. Eins og vænta mátti, var þessi frétt um "ráðgefandi kosningarétt" aprílgabb, en fyrirsögnin á þessum pistli afhjúpar það reyndar óbeint auk fleiri orða síðar, - og auk þess er það er bara allt í lagi að spjalla um kosningarétt 16. og 17. ára fólks. 

Til upplýsingar fyrir tvo menn, sem gerðu athugasemdir. Ég var að fá tilkynningu um eitthvað tilfallandi í "server" og sá að þessi pistill hafði óvart farið tvisvar inn með sex mínútna millibili, kl. 14:11 og 14:17. Ég eyddi því eldri pistlinum, en við hvorugan pistil stóð, að athugasemdir hefðu verið gerðar. Pistillinn fór samt ekki út strax  og við næsta innlit mitt sá ég, að komið hefðu tvær athugasemdir við hann. Ég hefði frekar átt að fela hann en eyða honum, því að nú gat ég ekki tekið neitt til baka og fengið athugasemdirnar fram. Fróðlegt væri að sjá þær og ég biðst afsökunar á þessu klúðri. 

Sérkennileg og breytt "norðanáhlaup" vegna ísleysis.

Fyrir mann, sem er búinn að fylgjast af áfergju með veðri og veðurspám hér á landi frá því að veðurfregnir fengust að nýju fluttar í útvarpi í stríðslok 1945, blasir sérkennileg breyting á svonefndum norðanáhlaupum við: Þau eru ekki eins köld og oft er spáð og þau líta út fyrir að vera á veðurkortunum, sem sýna þau helblá. 

Einar Sveinbjörnsson tæpir á einni helstu ástæðunni þegar hann segir frá komandi "hastarlegu" kuldakasti, eins konar páskahreti: Kalda loftið fer yfir miklu stærra íslaust hafsvæði en áður var norður af landinu, og hinn íslausi sjór hitar neðstu lög loftmassans upp. 

Allt þar til að spákortin í sjónvarpinu birtust virtist vera von á snjókomu á suðvesturlandi næstu daga, en síðan sást í kvöld, að spáð var nokkurra stiga hita, sem væntanlega þýðir, að snjókoman af völdum lægðardrags við suðurströndina verði aðeins á norðvesturlandi. 

Yfirleitt verður nú orðið hlýrra þegar norðlægir vindar blása en spáð er og var, áður en hafísinn minnkaði jafn mikið og mælingar hafa sýnt. 

Mun algengara virðist vera en fyrr á árum, að norðaustanhátt sé tiltölulega hlý og að úrkoma úr henni verði rigning í stað snjókomu eins og langoftast var hér á árum áður.

 

P.S. Nú sé ég á Hungurdiskum Trausta Jónssonar að veturinn í vetur hafi verið með nákvæmlega sama hita og verið hefur meðalhiti á þessari öld, en talsvert hlýrri en var á árunum fyrir aldamót. Tölurnar tala sínu máli, þótt sjá hafi mátt skrif á netmiðlum um það hve þessi vetur hafi verið kaldur.  

 

Hastarlegt kuldakast í vændum