Dreifbýli Evrópu í brennidepli á stóru dreifbýlisþingi í Póllandi.

Dreifbýlisfélög í rúmlega 40 löndum í Evrópu hafa um það samvinnu að halda fjögurra daga langt þing eða ráðstefnu á tveggja ára fresti til að fjalla um þau málefni sem brenna mest á evrópsku dreifbýli.

Þessi þing hafa spannað mun fleiri lönd en eru í ESB, nokkur þeirra austan Evrópu, en á þinginu nú vantaði nokkrar þjóðir frá áhrifasvæði Rússa.  

Þingið sátu meira en 400 fulltrúar þátttökuþjóðanna.

Af Íslands hálfu sátu nokkrir fulltrúar samtakanna Landsbyggðin lifi, skammstafað LBL.

Þau samtök hafa tekið þátt í fyrri þingum og sérverkefnum af ýmsu tagi með öðrum evrópskum aðilum. 

Fyrri þing voru haldin í Stokkhólmi, Brussel, Sharding í Austurríki 2015, Venhorst í Hollandi 2017, Candás á norðurströnd Spánar 2019 og í síðustu viku í Kielce í sunnanverðu Póllandi, sem er 200 manna borg í um 200 kílómetra fjarlægð frá landamærunum við Úkraínu.  

Síðan 2017 hefur orðið mikil breyting á helsta umræðuefninu á þessum þingum. 2017 fóru umhverfismál að setja vaxandi mark á umræðuna,

2019 voru þau orðin að meginstefi, og 2022 eru þau orðin að aðal málefninu. 

Úkraínustríðið hefur aukið mjög gildi dreifbýlis og matvælaframleiðslu Evrópu og af Íslands hálfu hefur verið reynt að gera málefni strandþjóða að stærra atriði á síðustu þingum. 

Í loftslagsmálunum hefur skort á umfjöllun um súrnun sjávar í drögum að stefnuyfirlýsingum síðustu þinga, og hefur dugað vel af hálfu Íslands, að varpa ljósi á og útskýra það, hvernig Ísland er á marga lund eins og lifandi rannsóknarstofa í loftslagsmálunum, þar sem hlýnun loftslags hefur mun fjölbreyttari og margslungnari áhrif hér á landi en kannski í nokkru öðru landi. 

Margt athyglisvert var að sjá í Póllandi og meðal annars vakti ráðstefnuhöllin sjálf athygli fyrir það, að með því að hanna hana sem ráðstefnuhús eingöngu, er úrval fundarsala og herbergja einkar mikið.  

Ein myndin hér á síðunni verður af litlum fundarsal í turni ráðstefnuhallarinnar. 

Mikið var fjallað um frumkvöðlafyrirtæki og gildi hugvits í eflingu dreifbýlisins, sem nú hefur fengið stóraukið vægi i matvælaframleiðslu heimsins. 

Lítið dæmi um hugvit má sjá á mynd af setubekk á lestastöðinni í Varsjá. 

Setbekkur, sem tæki tíu manns á Íslandi, er hannaður þannig að hann taki 20 manns, ef setið er bak í bak, eins og gert er fjærst á bekknum. 

Með þessu eru bök þeirra, sem sitja á bekknum,  gerð að sætisbökum á einkar einfaldan og þægilegan hátt. 

Og að sjálfsögðu eru ekki aðeins leigð út rafhlaupahjól, heldur líka rafreiðhjól með farangurskörfum. 

Miklar framfarir hafa greinilega orðið á mörgum sviðum í Póllandi síðustu áratugi, og til dæmis eru lestarsamgöngurnar nýtískulegar og þægilegar. 

Fyrir aðeins tveimur áratugum var smábíllinn Fiat 126, sem hafði  gælunafnið "Maluch", þjóðartákn Póllands líkt og Bjallan í Þýskalandi og Trabant í Austur-Þýskalandi og var "Lilli" afar áberandi víða, enda framleiddar tæpar fjórar milljónir af honum. 

Nú er "Maluch" að því er virðist gersamlega horfinn og sást ekki einn einasti á ferð á ferðum okkar um svæðið milli Varsjár og Kíelce og þar aústur af. 

Þetta voru magnaðir örbílar en huggun er þó að eiga tvo slíka á söfnum uppi á Íslandi. 

 

Gert ráð fyrir 150 fyrirtækjum í Laugardalshöll

Ekki veitir af eflingu hraðhleðslustöðvakerfisins.

Líklega er hraðhleðsluþjónustan aðal hindrunin í vegi greiðrar útbreiðslu rafbíla hér á landi. 

Þess vegna er sú viðbót, sem auglýst er í viðtengdri frétt, mjög kærkomin til að vinna bug á helsta vandanum, sem er kannski ekki skortur á hleðslustöðvum, heldur drægniskvíðinn svonefndi hjá rafbílaökumönnum. 

Þótt drægni rafbílanna sjálfra hafi tekið risastökk fram á við á örfáum misserum, þurfa hleðslustöðvarnar að dreifast nógu mikið til þess að þorfin fyrir afnot af þeim verði í samræmi við mismunandi aðstæður hjá rafbílum, sem eru á ferðinni hverju sinni. 

Athygli vekur hve afskiptir Vestfirðir eru og fleiri löng bil með engum eða örfáum stöðum er að sjá þegar kort yfir landið eru skoðuð. 

Mikið verk er framundan ef hraði nauðsynlegra orkuskipta á að vera nægur.  

20 nýjar hraðhleðslustöðvar